佳人餐廳 (Closed)

無甚特別的門面,引起我注意反而係有少少浪漫又好似好攪笑的名字... 佳人餐廳.每次經過都好匆忙,所以我一直以為只係一間普通茶餐廳; 終於有次停低睇睇,原來出名pizza,再上網睇下食評又好似好得喎,於是有日去界限街打波前拉隊一試.餐牌上有近三十種pizza,仲有套餐選擇; 叫個四人餐,有一大一細pizza,一個焗飯和一個小食.小食先上檯 - 椒鹽豆腐. 碟頭比想像中大碟,大大粒豆腐幾惹味,不過幾辣...焗類揀千層麵. 嘩,油到爆... 都知道焗類一定多油,但拎舊放係隻碟度我以為自己做緊勞作油緊顏色,成隻碟即刻有層反光紅色...主菜兩個pizza,大批係海鮮 - 批底夠鬆化,邊夠脆; 海鮮主要都係魷魚&微型青口,再加幾隻蝦. 芝士同醬都夠多,味道唔錯.細批揀個佳人pizza,個餡主要係茹類,唔係好記得內容,因為大家一致認為個海鮮批較好食.個餐一百蚊有找,質素唔差; 食得連鎖店的pizza多不妨試下食這類小店,又會有另一番風味.