Video
Read full review
2011-10-07
1153 views
有機會黎到Le Jardin de Joël Robuchon享用高級西餐，深感十分榮幸！大家可能會覺得好奇怪，點解同一個地址會有三間唔同o既Robuchon餐廳架呢？！ＸＯ未去哂三間名字相近o既餐廳之前，一路都以為佢地Ｄ餐牌係互通o既，點知原來三間所提供o既食物都好唔同，就算有相同，價錢同份量都絕對唔一樣，等小弟簡略地講解一下：Le Salon De Thé de Joël Robuchon （"Le Salon De Thé" 可解作「茶室」）係一間咖啡／茶室，主要食物係西餅，三文治，玫瑰形雪糕，等等。負責店內西餅o既係日藉o既中村師傅。L'Atelier de Joël Robuchon （"L'Atelier" 可解作「工作坊」）係一個圍繞住開放式廚房o既吧枱形餐廳，有多款tapas式小碟，客人可以一邊進膳，一邊欣賞廚師們o既廚藝表演，氣氛輕鬆。Le Jardin de Joël Robuchon（"Le Jardin" 可解作「花園／果園」） 係名副其實o既Fine Dining，由環境，服務，到食物，由外表到內在，所有野o既要求都比較嚴格同講究，當然價錢亦不例外啦。Robu
Le Salon De Thé de Joël Robuchon （"Le Salon De Thé" 可解作「茶室」）係一間咖啡／茶室，主要食物係西餅，三文治，玫瑰形雪糕，等等。負責店內西餅o既係日藉o既中村師傅。
L'Atelier de Joël Robuchon （"L'Atelier" 可解作「工作坊」）係一個圍繞住開放式廚房o既吧枱形餐廳，有多款tapas式小碟，客人可以一邊進膳，一邊欣賞廚師們o既廚藝表演，氣氛輕鬆。
Le Jardin de Joël Robuchon（"Le Jardin" 可解作「花園／果園」） 係名副其實o既Fine Dining，由環境，服務，到食物，由外表到內在，所有野o既要求都比較嚴格同講究，當然價錢亦不例外啦。
Robuchon餐廳o既裝修多以紅黑為主，聽講係大廚御用設計師o既signature 顏色。Le Jardin地方同座位比出面闊落，燈光柔和，空氣好夠流通；身材「健碩」o既爸爸重大讚Ｄ皮櫈夠大又舒服（據說是真皮也）！
當晚一行十人，因為爸爸同ＸＯ o既聲線比較響亮，所以特別安排左間房等我地唔洗咁失禮，大家又唔洗咁拘謹。衣著整齊，態度溫文儒雅o既服務生們非常細心，一入門口就幫客人續一掛起大褸，加櫈擺放女士們o既手袋同戰利品。落單時，經理親自推介美食，更預備好幾份以不同招牌菜式組合而成o既餐單比大家參考及選擇。見我一邊抄寫筆記，哥哥重慢慢詳述每道菜式o既結構同烹調放法，感激感激！
L’AMUSE BOUCHE （開胃小點）- Pumpkin Custard with Bacon Foam and Bread Stick：底層係滑滑o既南瓜custard，面層係好有分子料理feel o既煙肉味泡沫。用杯頂上脆脆o既麵包條，點入面頭o既咸味泡泡，加埋有粒粒南瓜o既甜custard，無論係口感或味道都好有層次，成功地一邊娛樂ＸＯ同其他男士們o既味蕾，一邊令主婦們敬佩廚師o既廚功同心思！
LE CAVIAR OSCIÈTRE（Osciètre魚子醬） - Caviar Box：招牌菜之一o既魚子醬盒連個賣相都獨特過人，完全冇令客人失望！大家請留意下圖，餐廳為依道菜專登訂造印有大廚Robuchon先生名字o既盒架，真係high！顏色搶眼o既碟同碟上o既匙羮仔都好別緻，特顯出魚子醬o既高貴氣質。盒內原來有四層：最底係鮮甜o既阿拉斯加蟹肉，中間夾住龍蝦啫喱 + Fennel Puree（茴香蓉），面層再舖上魚子醬。小弟食魚子醬機會唔多，喺自助餐食過o既魚子醬都係跟麵包食。今次師傅特製o既寶盒用不同層次去中和魚子醬o既咸味，亦同時帶出蟹肉o既鮮甜味，又產生不同o既口感，真係好出色，不得不拍手叫絕，不愧為Robuchon大師o既代表作啊！
LE BROCOLI（西蘭花）- Broccoli cream soup flavoured with nutmeg and bacon：唔係菜「粉絲」o既ＸＯ仔只係試左一口，OK啦。唯一感想係依招用煙肉黎幫西蘭花忌廉湯黎調味，就好似我地中國人用金華火腿煲湯咁。
LA LANGOUSTINE（小龍蝦）- Scampi raviolis with black truffle and foie gras sauce：又香又甜o既意大利餛飩好足料，皮夠薄，小龍蝦餡勁爽，最重要係唔會食到成口麵粉；黑松露拌鵝肝汁o既味道香濃得黎好夠lite，真係好精彩！
LES SPAGHETTI（意大利粉）- Spaghetti with a poached egg and sea urchins：人氣食品之一，所有材料更係「賣飛佛」，爸爸話好似為小弟度身訂造咁！如圖所示，海膽份量絕不吝嗇，味道十分鮮甜；半生熟o既流心溫泉蛋亦香滑非常。ＸＯ聽從建議全部搞勻黎食，真係唔會太creamy，成碟食完一Ｄ都唔覺滯，重可以連碟上剩餘o既汁液都撈埋，ummm...認真一流！
LE BLACK COD （銀雪魚）- Cod fish fillet marinated in sake and mirin with miso sauce：雖然魚油充足，肉質又夠甜嫩，不過比起其他菜式，依味喺日本餐廳經常食倒o既銀雪魚就好似平凡左少少；唔係話佢水準唔夠，只係覺得欠缺左一份「嘩！」囉。
LA CAILLE（鵪鶉）- Free-range quail and foie gras, served with mashed potato：師傅張鵝肝放入鵪鶉內，真係好有諗頭。鵪鶉外殼搽左層甜甜o既醬汁，同個帶咸o既鵝肝好合得黎，非常之野味之餘，鵪鶉肉亦唔會乾。碟角上o既「松露薯蓉」原來係Robuchon先生手本名菜之一，松露散發陣陣香味，薯蓉軟滑得黎溶喺口嗰種感覺真係非筆墨能夠形容，簡直可稱得上係ＸＯ食過最正o既薯蓉呀！
L’AGNEAU （羊）- Lamb cutlets with fresh thyme：平時好怕食羊o既ＸＯ可以證實，羊仔肉質嫩而軟，味道一Ｄ都唔蘇，真係食到嘴lam lam！伴碟o既芝士溶茄子煙煙韌韌，味道都好得意。有樣野，真係唔講唔知道，用黎煮依道菜o既羊仔原來係未戒奶架，所以羊仔o既骨重好幼小！婦女們聽左覺得好殘忍，不過小弟覺得其實食肉本身就係要殺生，只係食o既時候唔知道過程個心可能會好過Ｄ？！
甜品時間，姐姐仔帶左我去參觀個好有睇頭o既甜品車，雖然冇人點車上o既糕點，但係都影左幅相同大家分享。
LE MINTY - ‘’Caraibe’’ Chocolate Molten Gâteaux Accompanied with Mint Sorbet：此乃ＸＯ最喜愛的甜品哦！進化左o既心太軟，外皮香脆，內藏酒精，而且夠熱夠流心，配上薄荷sorbet令到整體冇咁溜，重意外地加添左一份清新感，涼透入心，不得不向大家推介！
Fruit Bowl（生果）：對非常注重健康o既主婦黎講，餐牌上o既甜品不甚吸引，所以經理好細心地為佢地安排咗Ｄ水果拼盤。每款生果都好夠涷，而且細細粒容易食，唔需要切，食得乾淨俐落。
Petit Fours（小甜點）：最怕浪費食物o既ＸＯ覺得Petit Fours份量同size剛剛好！雖然朱古力迷o既我對macaron底下o既金色朱古力豆情有獨鍾，但係都要讚下煙煙韌韌o既啫喱粒，半鬆脆o既macaron，同鬆軟o既madeleine，味道唔會太甜，好夠lite。
Expresso：食到咁飽，小弟就叫左杯特濃咖啡幫助消化，味道香濃得頗有驚喜！有機會可以品嚐名廚Robuchon 先生o既得奬名菜，以及親身體驗到色香味俱全o既高級西餐，心情極度興奮之餘，自己都覺得勁有口福呀！
後記：
1) 好多人都未必知道，原來餐廳係有提供代客泊車服務o既！大家只要停架車喺置地文華東方酒店（The Landmark Mandarin Oriental Hotel ）門口，同個哥哥仔講話係去Robuchon 餐廳食飯，佢就會比張飛各下，埋單時比餐廳蓋章確認，咁就得架啦。
2) 大家黎Robuchon任何一間餐廳食野時，記住係唔可以帶酒或蛋糕架！三間餐廳o既酒牌係一樣；牌上o既種類繁多，而且價錢亦相當合理，所以唔比客人自帶酒水絕對有道理！
Post
