Video
Read full review
2014-06-26
796 views
一向都幾鍾意Subway嘅產品，因為價錢實惠之餘，份量十足，又可以自由選擇配料。以往多數幫襯半島中心分店，貪佢近尖東百週年紀念公園，尤其秋涼，買個潛水堡，邊享受陽光，邊享受美食，心情都寧捨開朗。不過，自半島中心分店結業後，如再要晌百週年紀念公園嘆潛水堡，就要光顧帝國中心分店嘞。依晚走到過嚟，估唔到咁多人排隊。大抵因為潛艇堡選擇款式多，用料豐富，由包款、配料、醬汁都可按個人喜好自由配搭，實在好適合香港人多心又成日想試新嘢嘅心態，當然，味道好先可以長遠留住客人嘅。記得以前Subway嘅潛水堡分4個級別：經典Classics、滋味Favorites、傳統Traditional及優質Premium，雖然依家取消咗名稱上嘅分級，但都照樣分開4個價錢：$25.8、$29.8、$35.8、$39.8（以6吋單價計），分別在於所用嘅主材料。加$13.8就可以轉為套餐，包括多杯16安士汽水或330亳升罐裝，以及兩塊美式曲奇或薯片一包，其實加十幾蚊多兩塊美式曲奇都抵啦。有食開Subway嘅人都知，佢哋一向都有5選1嘅抵食「$25Combos」組合，一款6吋潛水堡加一杯中汽水或330亳升罐裝，都只喺賣$25
依晚走到過嚟，估唔到咁多人排隊。大抵因為潛艇堡選擇款式多，用料豐富，由包款、配料、醬汁都可按個人喜好自由配搭，實在好適合香港人多心又成日想試新嘢嘅心態，當然，味道好先可以長遠留住客人嘅。
記得以前Subway嘅潛水堡分4個級別：經典Classics、滋味Favorites、傳統Traditional及優質Premium，雖然依家取消咗名稱上嘅分級，但都照樣分開4個價錢：$25.8、$29.8、$35.8、$39.8（以6吋單價計），分別在於所用嘅主材料。加$13.8就可以轉為套餐，包括多杯16安士汽水或330亳升罐裝，以及兩塊美式曲奇或薯片一包，其實加十幾蚊多兩塊美式曲奇都抵啦。
有食開Subway嘅人都知，佢哋一向都有5選1嘅抵食「$25Combos」組合，一款6吋潛水堡加一杯中汽水或330亳升罐裝，都只喺賣$25。貪小便宜嘅小弟就一定揀本身最貴嘅辣味經典，因為單價都要成$35.8，加埋杯中杯汽水$10，足足喺55折，抵過食麥記啦。
不過，今次嚟就唔喺食依個$25Combos喇，而喺另一個限定供應嘅組合：6吋公司潛艇堡 + GLACÉAU vitaminwater。以單價計，前者賣$39.8，後者每樽賣$18，依家合計賣$42，都平近3成；又或者咁諗，買個公司潛艇堡，加多兩蚊多啲就有成支「維他命水」，感覺就仲抵。反正有啲人唔飲得汽水，又唔鍾意食曲奇，套餐優惠都無佢份，而依個組合又可能幾啱佢哋。
公司潛艇堡4種麵包（蜜糖燕麥、全麥、意式香草芝士、白麵包），始終都喺蜜糖燕麥包喺小弟至愛，因為外型粗中有柔，軟熟而帶有點點甜香，又有種燕麥嘅粗糙口感。如果唔鍾意食包，客人亦可揀卷餅，即喺好似啲墨西哥卷咁，免費轉唔需要額外加錢，較為人性化嘅政策。
依款潛艇堡預設好嘅主材料包括火雞胸肉片、火腿薄片及燒牛肉，既然要食得「芝選」，梗要求加芝士啦，而配菜要咗青瓜、蕃茄、醃酸瓜、紫洋蔥、青椒、生菜絲和橄欖，加起嚟一啲都唔配角呀。
醬汁，又喺蜜糖，蜜糖芥辣醬吖，唔該！
一份滿滿嘅公司潛艇堡就即時呈現眼前，拿上手已知斤兩十足，非常墜手。實在太多材料喇，影相可能唔多好睇，不過味道就絕對唔失禮。啲薄肉片薄嫩好食，尤其燒牛肉，就算薄薄一片都食出味道，而紛陳嘅配菜，滿足晒味蕾嘅好奇，口感、味道晌口腔內都變化萬千，每一啖都有所不同，依個就喺Subway潛艇堡嘅精彩之處。
GLACÉAU vitaminwater檸檬味「維他命水」印象中都喺第一次飲，以低卡、縕含豐富維他命、無添加人工色素或香料為賣點，據知已經出咗近十款，不過，今日晌度所見，就只有4款：blueberry、orange、dragonfruit、lemonade。揀嚟檸檬味因為喜歡清爽嘅感覺，冰涼嘅檸檬味維他命水，入口微酸，檸檬味唔會太搶，雖則話喺無添加嘅營養素飲品，始終跟鮮榨果汁唔同，個人覺得較似飲「得力素」一類嘅營養飲品。
再睇番個宣傳板話件6吋公司潛艇堡只有6克脂肪，雖然唔知實際點樣量度，但食落的確滋味輕盈，尤其配以開胃醬汁。多謝公關嘅送贈，一份美味嘅潛艇堡，一樽滿載活動嘅營養飲品，叫人好好準備迎接依個炎炎盛夏。
Other Info. :
利益申報：雖然無剔到「試食活動」一欄，但文中已表明喺公關送贈，再者，小弟當日換領潛艇堡都喺整好之後，再遞上換領信，事前全無預訂，所以，認為無必要剔「試食活動」多此一舉啫。況且，人人口味不同，上述食文都喺隨心所發，個人食後感而已！
(The above review is the personal opinion of a user which does not represent OpenRice's point of view.)
Post
