Youniqueed (Closed)

今日下午時間去到位於尖沙咀嘅youniqueed飲杯咖啡，食下野。以黑白做主色調望落型格，位置唔多，都係高身枱，仲可以望到咖啡師沖咖啡。背景有播下音樂，成個環境都好舒服。鋪面細細，但食物種類都幾多，有意粉，risotto,bagel，沙律同幾款小食。飲品嘅選擇都好多，無論係一般種類嘅咖啡，定係有特色嘅latte或者飲品都唔少。一定有一款啱你~我就叫左一杯ice mocha同Taco。杯同杯墊都好靚同黑白格調一樣走型格嘅路線。Mocha飲落第一啖好有朱古力香味，唔會太重甜味，跟住開始感受到咖啡嘅香味慢慢滲出黎，唔會比朱古力味蓋過哂，飲落幾有層次，同埋冰塊係比較大粒，冇咁容易溶令咖啡變淡。Taco雖然喺menu寫small portion. 但係相信唔大食的話其實都有飽足感。材料有洋蔥炒牛肉鋪面，有蕃茄粒，下面係同牛油果粒，酸忌廉同一塊生菜。taco夠薄而且好脆，所有材料加埋好balance, 洋蔥炒牛肉嘅油同清新嘅酸忌廉加蕃茄粒食落啱啱好。材料簡單，但食落好有驚喜。店員有比餐具，不過似乎用手食仲別有一番滋味。到最後嘅半杯咖啡，越到底就越重朱古力味，沉左底嘅朱古力令mocha再多左一個層次