九重町日本料理 (Closed)

今日入去屯門藍地探朋友，夜晚想食日本野朋友建議食呢間九重町。門口掛左好多紅燈籠同有個大大個嘅招牌，好易認。我地6點幾去到人流唔算多，餐廳入面空間都幾大，位置亦都好多，環境好舒服。蟹子沙律軍艦壽司面頭鋪滿蟹子，加埋青瓜絲同蟹柳絲，口感鮮甜又清新。軟殼蟹手卷即叫即整，所以就算入面有沙律醬都啲紫菜依然乾身唔會淋。軟殼蟹炸到金黃香脆，咬落啖啖蟹肉。海鮮鍋有好多新鮮料！有青口、蝦、蠔、魚肉、豆腐、昆布、冬菇、娃娃菜等等，令到湯底好鮮甜！鰻魚炒飯係用壽司米炒，每粒飯都好飽滿同沾滿鰻魚汁，炒飯入面亦有好多肥美嘅鰻魚粒，配埋紅蘿蔔粒、蛋花、蔥花，色香味具全！