雞，全部都係雞~ 喂！有聲嘅？唔止有聲，仲有味呀！我指味道個味呀。雞嚟講真係可以有好多種唔同嘅烹調方法：炸、蒸、燉、焗……仲可以配唔同嘅醬料，例如阿媽成日整嘅豉油雞呀醉雞呀鹽焗雞呀之類，而出街食亦都可以食到好多款雞！而家就同大家介紹下其中8款比較特別啲嘅。

雞翼三重奏  Little Vegas

圖：BoBo__Chow926

先講雞翼。叫得雞翼三重奏，當然就係有三款味啦，分別係水牛城、檸檬同玫瑰味，3款都炸到脆卜卜好鬼香口。水牛城雞翼係一貫嘅香辣味，而檸檬當然就相對酸啲啦，但係清新嘅、開胃嘅，要特別講下玫瑰味，真係唔多地方食到。花香味重，食落有啲甜，女生應該幾冧。

雛雞   火山燒

圖：derekyummy、VCY

呢間係食串燒嘅，係可以自己燒畀自己食嘅串燒。同一般串燒舖最唔同嘅係呢度用火山石做燃料，冇咁大煙。不過要介紹嘅「雛雞」就唔係自己燒嘅，而係廚房燒好出嚟，外脆內軟，肉質好嫩好滑，食得出用咗唔少香草去醃製。

泰式香茅爆炸雞   泰燒遙

圖：whm1204

炸雞笨唔係韓國嘅專利，泰國都有。呢間泰菜嘅爆炸雞，一嚟炸到脆卜卜，二嚟有好多辣椒、香茅、乾蒜一齊炸，鹹中帶辣，係幾種層次嗰隻辣，個名真係冇改錯。新年想有多啲新刺激不妨去試下。

蜜糖咖喱烤雞  Goobne Chicken

圖：Candy choi1026、山區麵包王

餐牌上有好多款雞，原味、香酥、照燒、甜辣等等，但首推一定係咖哩蜜糖烤雞。雖然炸到金黃色好鬼脆口，但食落炸粉又唔係好厚，有蜜糖嘅甜同時又有咖喱嘅香，冇話邊個搶咗邊個嘅味。反而係一碟有雞搥有雞翼等唔同部位，應該係你哋幾個朋友互搶咋。

豆乳雞    程班長台灣美食

圖：hiuytsang8

輪到台灣嘅代表，唔係普通嘅鹽酥雞，而係豆乳雞。炸完出嚟雞肉依然好滑，而且可以食得出淡淡嘅豆香味，甜甜地，加埋雞本身嘅肉汁，味道唔錯。

卡邦尼炸雞   The Joomak

圖：Satoshi、JamTea

都係韓式炸雞餐廳，但揭開menu發現有綠茶蜜糖炸雞同卡邦尼炸雞！前者係喺炸雞上面撒咗綠茶粉，甜甜地；而後者就係後加卡邦尼醬，幾creamy嘅，芝士味都幾出，但就可能會令到隻炸雞冇咁脆喇……

涼拌川味手撕雞   素食一家

圖：sugar_tang、tht_dawn

介紹咗咁多肉食，當然都會講下素食啦。呢間素食餐廳食川味菜嘅，係幾特別下。呢碟涼拌川味手撕雞係前菜冷盤嚟，微辣，係幾開胃。至於啲雞絲就係用蒟蒻做嘅，又幾爽口喎。

千層珍珠雞   吉吉點

圖：babyzbb、<IVY>

嗯，珍珠雞都係雞？不要分哪麼細啦，呢間餐廳嘅千層珍珠雞同平時食開嘅唔同㗎。平時多數都係糯米包住啲餡，而呢度，叫得千層，雖然冇真係一千層，但就堅係一層糯米一層餡，都幾足料呀，有蝦米、冬菇等等，而且啲濕軟嘅糯米仲滲出荷葉嘅香氣，唔錯。