又到聖誕！早訂的鳥兒有buffet食！

聖誕buffet貴極都有人爭住book，遲訂的鳥兒隨時無大餐食！為咗令大家早訂早安心，小編搜集咗城中熱門自助餐，而且詳列埋回本必食菜式，想食得精明兼盡興，其實唔難。

用Le Creuset打邊邊 朗廷酒店－The Food Gallery

聖誕buffet離唔開烤火雞、香烤火腿、蜜餞水果蛋糕、栗子布甸等應節items，最吸晴必數兩位用嘅Mövenpick雪糕火鍋，用咗港女煲Le Creuset嘅玫瑰紅小圓鍋，自拍呃like是常識吧！火鍋備有多款唔同口味嘅雪糕，一律無限任食，配上朱古力、新鮮水果同棉花糖、果仁巧克力蛋糕方塊、迷你泡芙、朱古力忌廉泡芙等配料，女生們一定心心眼！

12月24日

6pm- 8:30pm成人 $888；小童 $598
9pm-12pm成人 $858；小童 $598

12月25日

6pm- 8:30pm成人 $898；小童 $598
9pm-12pm成人 $858；小童$598

長爆人氣王 唯港薈－The Market

堪稱全城最難book嘅自助餐，聖誕buffet自然搶手！晚市可以食到頂級油甘魚、深海牡丹蝦、北海道帶子刺身、即切蘇格蘭煙三文魚等靚料，肉類就出動明爐煎鵝肝、波士頓龍蝦、焗釀響螺、法國肝批、手切意大利火腿等，質素一樣無欺場。另外亦都新加咗唔少時令嘢，例如滋補五蛇羮、泰式明爐浸三色魚。最後千祈唔好錯過聖誕布甸等甜品！

12月24及25日

5:30pm- 8pm 成人 $948；小童 $678
8:30pm-11pm 成人 $948；小童 $678

Xmas我最甜 九龍酒店－倚窗閣

用「candy」做主題，無論前菜定主菜甜品，都加入咗糖果元素，又用栗子、蔓越莓炮製菜式。焦點必check西京式薑汁燒鮑魚、焦糖黑朱古力咖啡煎鴨肝、紫蘇番茄水牛芝士珍寶珠等，甜品如聖誕老人襪子蛋糕、棉花糖芒果意大利奶凍，賣相超fancy。喺24/25日惠顧自助晚餐，即送焗半邊波士頓龍蝦同加入黑松露嘅慢煮火雞卷。指定自助晚餐時段更增設「吃着糖果過聖誕」糖果站，小朋友仲有糖果收，夠晒時weet。

12月24日

5:30pm- 8pm 成人 $718；小童 $488
8:30pm-11pm成人 $788；小童 $498

12月25日

5:30pm- 8pm成人 $698；小童 $468
8:30pm-11pm 成人 $698；小童 $468

霸氣龍蝦山 帝苑酒店－雅苑座

索價過千但年年都爆場，今年buffet必食龍蝦山、日本毛蟹、法式香草蒜蓉牛油焗龍蝦、烤澳洲和牛烤、羊架配迷迭香汁及香煎鵝肝配藍莓汁，每位食客附送陳皮蒸大連鮑魚一客。另有西班牙風乾火腿伴香瓜、鮮帶子配芒果沙沙及魚子醬、同埋應節嘅蜜汁烤火腿、薑包慕思伴玉桂蘋果等。酒店喺24/25日會有樂隊同dancer現場表演，節日氣氛夠晒濃。

12月24及25日

5:30pm- 7:45pm 成人 $1,168；小童 $1,068
8:30pm-10:45pm成人 $1,268；小童 $1,168

回本生蠔 九龍香格里拉酒店－Café Kool

另一熱門buffet，場內備有六個開放式廚房，回本必食生蠔、長腳蟹、瀨尿蝦、鵝肝、serrano西班牙火腿等，熱食亦有唔少選擇，招牌菜例如龍蝦喇沙、自家醃製三文魚、冬蔭公、紅燒肉、有機沙律、印式香料羊腿、香烤有骨西冷都有水準，唔怕浪費quota。另外亦有即烤瑞士芝士、蜜餞火腿、應節火雞、意大利聖誕傳統糕點等。

12月24日

5:30pm-8pm成人$1,088；小童$888
8:30pm-11pm 成人$1,188；小童$988

12月25日

5:30pm-8pm成人$998；小童$868
8:30pm-11pm成人$998；小童$868

$700有找 太子酒店－add@Prince

尖咀馬哥孛羅酒店旗下，位置就腳。即開生蠔最受歡近，另有龍蝦、鱈場蟹腳、凍蝦、小龍蝦、藍青口、麵包蟹等。熱食有燒火雞、燒肉眼同泰國、印度廚師炮製嘅菜式。甜品離唔開樹頭蛋糕、意式咖啡酒芝士餅，即場焗製嘅雲呢拿窩夫一向多人排，加上一球Mövenpick 雪糕，無得輸。有生蠔食都係六百尾，連加一唔使七百，喺區內算相宜。

12月24-25日

6:00pm – 8:15pm成人 $628；小童 $398
8:45pm –11:00pm成人 $628；小童 $398

熱盤至強 尖沙咀凱悅酒店－咖啡廳

評價向來唔錯，聖誕繼續出動大量熱盤，老人家同小朋友都有得揀。燒物類幾吸引，西式有香蒜牛油烤龍蝦、燒蟹腳、燒西冷牛等；日式鐵板燒就有火焰牛柳粒、燒帶子等。另有白酒煮黑青口、西班牙海鮮飯、豉椒炒龍蝦等海鮮菜，加埋燒火雞、蜜糖燒火腿等，種類算豐富。甜品有十幾款包括香草拿破崙蛋糕、法式焦糖泡芙塔同聖誕布甸配拔蘭地汁等等。

12月24-25日

5:30pm- 8:30pm成人 $888；小童 $448
8:30pm-10:30pm成人 $888；小童 $448

性價比高 九龍東皇冠假日酒店－尚廚

價錢一向比旺區平一截，聖誕buffet用海鮮同朱古力做賣點，除咗龍蝦、藍青口等，24/25日晚市可以任食阿拉斯加蟹腳同法國麵包蟹，另每位送包羅萬有（鮑魚、海參、花膠、瑤柱、冬菇）一客。海鮮熱葷有百幾款，數帶子蟹肉配木瓜牛油果醬汁、紅酒香梨配法國鵝肝慕絲及黑松露果凍最吸引。朱古力甜點就有Opera32%焦糖白朱古力慕斯蛋糕等。喺12月6日前預訂同全數預付，仲有8折（加一除外），勁抵食！

12月24及25日

5:30pm-7:30pm成人$618；長者$538；小童$498
8:15pm-10:15pm成人$618；長者$538；小童$498

文：fi

隨時接收最新資訊
讚好OpenRice專頁！