侍應一般都已步入中年，但服務態度十分親切：記得那次分兩隊Team 去採訪，講好了是一份兩份採，點知我地遲到，份牛扒比頭Team 人食到得渣（唔係下嘩！）冇得採訪，惟有同老闆講；又點知只講一聲，侍應就即刻入廚房整番個牛柳出黎，連麭同羅宋湯，仲叫我地影完相順手食埋，真係感動到想喊；又再點知我地食時侍應發覺牛柳肉唔夠熟，就爽口地話：「D 牛扒得五成熟咋喎，我拎入去煮到七成比你地再食過！」簡直欲哭無，有點光明正大食霸王的感覺……\r\n講番轉頭，金鳳的鎮店招牌菜當然就係「蒜蓉黑叔牛柳」，老闆林叔可說是做牛扒的老專家，多年來食客對金鳳的牛扒都讚不絕口。晚上來到這裏只看見檯檯都叫牛扒，甚麼快西多根本冇人會食。

這兒的肉食全都由南美洲、阿根廷、巴西、烏拉圭等各地入口，保證貨源可靠。而且全部由林叔直接向當地進口，省卻了中間抽稅的支出，所以售價特平，每個一般都係五六十蚊就有交易！
呢個黑椒牛柳就名乎其實低食夾大件咯！只售$57，大件得來，唔韌；唔韌得來，肉厚；肉厚得來，多汁。上檯時蒜蓉已經放好在牛柳肉上，然後淋上黑椒汁「喳……」

黑椒與蒜蓉的香味隔住塊布都能射入您的鼻孔內。這時已經刻不容緩，立時提起刀叉切出一塊、一啖、又一塊……濃郁惹味的黑椒汁混配合蒜蓉香，七成熟的嫩腍牛柳滴著鮮味牛肉汁，咬著咬著便徐徐地從咽喉滾進胃裏……\r\n