金記冰室 (已結業)

又同朋友到金記食晚飯，每次去到都要等一陣，因為都幾多人，上星期食咗黑松露臘味炒飯，今次試下火噴噴鴛鴦雙鷄煲($88)，跟湯及熱飲，再加一客咖哩牛脷撈公仔麵($38)，跟熱飲。咖哩牛脷撈公仔麵先到，金記咖喱不嬲夠香濃，不會太辣，撈麵/飯食一流，牛脷算腍但又好咬口，不過今次啲麵淋咗少少。我要了中湯，南瓜肉排湯，南瓜味濃，湯頭夠甜。火噴噴鴛鴦雙鷄煲上枱，侍應叫小心個煲好熱，真的堅熱，問侍應甚麼是雙鷄？是田鷄及冰鮮鷄，田鷄剛熟肉質夠彈牙、鷄件雖是冰鮮鷄，不過都夠嫩滑，還有煙韌的豬潤、香噴噴洋蔥等，配上白飯，好食。飲品當然繼續點較早前從網上得知「甜飲全球每年殺18萬人，凍檸茶是兇手之一」成日害人不淺嘅兇手凍「檸茶」，我當然唔怕死，呢杯飲料夠凍夠茶味，合格。

今日又到了灣仔附近交收，之後會行去銅鑼灣，途經天樂里，又去金記醫肚，見到有廚師冬季精選，有臘味精選套餐，凍凍地，叫了一碟油香臘味飯，$55，送羅宋湯/中湯及熱飲，凍飲加$3。叫了羅宋湯，好重番茄味，又夠多雜菜，不錯。油香臘味飯，臘肉夠肥美，臘腸夠香口，更不可忽視是豉油汁，配白飯一流。凍檸茶，茶味算濃又夠凍。

識我嘅都知我不愛好管閒事，只會針對事，不會針對人，而且本身已經好忙，主打吃喝玩樂但又要工作，基本上沒有時間去理會一些無聊濕碎事，早前被一些患有妄想被迫害症的動物作出指控，而被捲入它們之鬥爭中，不過如果是一隻有腦的小狗狗..........是不會作出幻想而亂吠的，點解乜都關我事？回正題，之前中秋月更做了臨時月餅送貨員，主要幫經我向金記訂月餅之朋友送貨，所以那兩星期更忙，送到八月十四日迎月天，我都忘記了那天，到金記取完月餅，約人取月餅又未夠鐘，都幾肚餓，順便食埋晚飯，見到小菜有XO醬茄子牛仔骨($78)，XO醬、茄子及牛仔骨三樣都是我喜歡食的，加$3點凍檸茶。其實碟XO醬茄子牛仔骨話貴唔貴，話平又唔算平，而且又唔算大碟，但見三樣都是我喜歡的，所以點此牛仔骨，茄子好難整得難食，除非煮得過腍，金記冰室就不會煮得過腍，仍少少硬身，幾好咬口，XO醬之味道入哂茄子度，茄子加埋韭王同汁一齊食，送白飯一流，牛仔骨沒有雪味又醃得夠味，不過食到骨位時食得少少論盡，骨同肉黐得太實，用刀切開就好啲。飲品當然繼續點較早前從網上得知「甜飲全球每年殺18萬人，凍檸茶是兇手之一」成日害人不淺嘅兇手凍「檸茶」($18)，

之前響西營盤金記買過金腿伍仁月餅幾好食，又其實成日都經過灣仔天樂里，但又沒有留意金記冰室，今次朋友約了我去下午茶，咁就決定去金記。我見到有新鮮牛肉餐，$41，本身是通粉，我要求轉福字麵，加$5，要雙太陽蛋，牛油方包要烘底，加$2，要凍檸茶，加$3。新鮮牛肉麵？原來是沒有將牛肉醃過，新鮮的將牛肉淥熟，所以差不多是原味牛肉，幾好咬口，另一重點是福字麵的味湯粉，我未落之前飲了一啖啖而無味的湯，當加味湯粉之後，味道就不同了，其實不懂形容此味道，但食過福字麵的人就會知道，福字麵少少彈牙，如果硬身些更好。雙太陽蛋加牛油方包烘底，我不喜歡弄穿蛋黃，喜歡先用义分開蛋白，食完蛋白後再一口食了蛋黃，蛋煎得不錯，沒有太熟，牛油方包烘底，即牛油多士，多士夠鬆化，如果牛油多一點更好。凍檸茶，茶底不錯，夠茶味，都算夠凍。