屏山老地方

营业中

休息中

肉餅飯成日都食，但來來去去都係嗰幾款，唔係梅菜蒸肉餅，就係冬菇馬蹄肉餅，或者鹹魚蒸肉餅……變化唔多！ 但係喺屏山有間好出名嘅肉餅飯「屏山老地方」，肉餅款式多到數不勝數，菜式新潮，有好多你估唔到嘅配搭佢都有！例如芝士榴蓮煎肉餅飯、芒果煎肉餅飯、孜然羊肉煎肉餅飯、豆豉魚柳煎肉餅飯……等！ 話說呢間肉餅飯男朋友間唔中都會食，孜然羊肉煎肉餅飯同六重芝士煎肉餅飯佢都有試過，兩款都好好味！ 🧡蒙古辣孜然羊肉煎肉餅（$58）孜然羊肉煎肉餅超惹味！好有蒙古嘅風味！ 🧡六重芝士煎肉餅飯（$68）六重芝士肉餅超多芝士，超爆汁，食完真係「心臟病」病發！作為芝士控真係好想試，不過今日個心臟未做好準備，所以試住其他款先~ 🧡松露芝士牛肝菌煎肉餅飯（$62）呢款肉餅都好惹味！外皮煎得好香脆，肉餅中間啲芝士餡好流心！牛肝菌個味都好出，成個配搭好夾一啲都唔唐突，超正！ 🧡香蕉煎肉餅飯（$53）純屬好奇先嗌咗呢款，但估唔到香蕉同肉餅都真係夾得埋，香蕉同肉餅各自個味都出，香蕉好香甜，味道有啲似香蕉煎餅，都幾特別！

屏山老地方食肉餅真係街知巷聞，假日就算山旮旯都大排長龍就知好癲，所以今次食評都唔算咩食評，純粹為自己喺呢間舖留過腳毛做個紀錄。今次到訪點咗兩個飯，芝士榴槤煎肉餅飯及松露芝士牛肝菌煎肉餅飯，兩個肉餅做法完全不同。味道☑️☑️☑️☑️☑️論賣相，我點嘅芝士榴槤煎肉餅飯稍勝，一層厚厚金黃色嘅芝士蓋住雙層肉餅，淨係睇都患上急性三高。揭開兩層肉餅之間，吱出一層榴槤肉。老實講，唔食榴槤嘅人真係唔好叫呢味，當你切開肉餅，一支匙羹由芝士層、肉餅層、榴槤層插到落飯底，一啖食落去個味覺好複雜，淡淡嘅芝士味加彈牙肉餅好好食，但有個多事嘅榴槤做架倆走出嚟，甜甜香香又好夾，呢單野真係痴晒線！至於女朋友點嘅松露芝士牛肝菌煎肉餅飯，就係一個典型嘅彈牙肉餅之中，加入好香嘅牛肝菌，仲有少少嘅熱溶芝士喺入面，令味道更豐富。同場加映，跟餐叫咗個椰汁紅豆冰，由於少甜嘅關係，紅豆份量會比正常少，但如果唔鍾意飲甜野的話，呢個份量係幾好，椰汁味大過紅豆味，啱夏天飲。環境☑️☑️☑️呢啲舊店，環境當然唔係靚㗎喇，靚就唔係收你二百幾蚊啦。但⋯⋯坐得ok的。性價比☑️☑️☑️☑️☑️$60幾一個肉餅飯，食到咁多心機喺入面，落樓都係$157，好平啦！

坊間比較出名嘅新派肉餅飯有兩間，呢日有緣試到其中嘅呢一間。由於為食豬係芝士怪，諗都唔使諗要試六重芝士肉餅，另外叫多一個是日推介松露芝士牛肝菌肉餅。芒果沙冰($20): 天氣太熱，要整返杯透心涼嘅飲品。呢個芒果沙冰凍就夠凍啦，可惜冰粒非常大，芒果味仲唔多平均。松露芝士牛肝菌煎肉餅飯($58): 肉餅同飯嘅份量正常，菜都唔少。肉餅煎得好香，但說好的松露味欠奉，有點失望。肉餅中間夾咗少少牛肝菌同芝士。肉係半肥瘦，比較油膩，加上芝士令成個肉餅都好膩。六重芝士煎肉餅飯($60): 共有兩塊肉餅，似乎比較抵食。芝士係邊六重就唔太清楚，但份量唔少，而且目測用咗3款唔同嘅芝士，原來肉餅同芝士係幾夾嘅。同上面個松露肉餅比，為食豬比較鍾意呢一個。但同上面個肉餅一樣，肉餅係半肥瘦而且食到粒粒肥肉，加上六重芝士更顯油膩。

聽同事講屏山肉餅飯聽了幾次，今日終於有機會去試試，因為揸車去，泊位有點麻煩。可先打電話問問泊車的詳情。餐廳就在路邊，相片是走時拍的，門外已經有人在排隊。由於午餐時間尚早，店內未算多人。餐牌可在門外看到是日推介，當然除了這些還有其他的選擇啦。看完餐牌，最後決定要試試這個松露芝士牛肝菌煎肉餅飯。賣相並不算精緻，一碗的白飯配一塊肉餅及少許生菜。上枱時已聞到松露的香氣，而肉餅表面煎得金黃焦香，能看得出有菇菌及芝士的。肉餅的質感結實，雖然表面煎得焦香乾脆，但內裡並不乾身，而已肉質亦不會老。牛肝菌特有的香氣，並不算濃烈，但香氣仍然持續散發。咬一口，口腔內有松露，牛肝菌及芝士的香氣，焦脆的表皮加上香軟的肉質，味道跟口感方面都相當滿足。