潮味苑

营业中

休息中

呢排工作比較忙，夜咗放工所以就多咗買外賣返屋企做晚餐，今日就揀咗公司附近嘅潮味苑。其實我都幾鍾意食潮州打冷，呢度真係啱哂我。呢度仲有好多潮式調味醬料，自己煮潮州菜都冇難度。外賣大概等咗10分鐘就到手。今次呢個配搭營養夠均衡。打冷冇理由唔食蠔餅，呢度就有煎蠔餅同炸蠔餅選擇，我今次就揀咗招牌炸蠔餅。炸蠔餅就更加香脆，而且蠔仔大大隻，好有口感。我本身比較抗拒芥菜嘅澀味，但就好欣賞潮州菜入面嘅春菜，所以就揀咗呢個春菜腩肉。春菜煮熟後再加埋潮式調味，已經冇晒澀味，而佢嘅腩肉亦肥瘦適中又夠入味，整體味道唔錯。我係第一次食潮州炒麵線，原來入面有肉絲同蝦肉，雖然材料簡單，不過食起上嚟就甚有家鄉風味。其實仲有好多潮州菜式我都想試，下次會再嚟幫襯佢其他菜式。

早前曾經幫襯過，覺得啲嘢食超正，已經決定一定會再去食。今次分別叫咗炸蠔餅、芙蓉鴨、蠔仔粥、潮州炒麵線同滷水大鵝肝。先係炸蠔餅，同煎蠔餅完全唔同(煎蠔餅都好食，但炸嘅仲正)，咬落口勁鬆脆(仲脆過粟米片)，同埋超多蠔，再配埋魚露食超正。芙蓉鴨一上枱時已經聞到陣味，啲芋蓉超香，夾埋鴨肉食落口一軟一硬嘅感覺幾特別，不過最正係伴碟喺啲鴨下面嘅「炸菜」(唔知啲菜叫咩名)，啲菜又香又脆，完全覺得係呢碟芙蓉鴨嘅重點。蠔仔粥之前已經食過一次，值得推薦，每次去幫襯都係必食之選。潮州炒麵線勁大碟，感覺有啲似米粉，但俾米粉硬少少，有幾多餸，唔錯。至於滷水大鵝肝，一上枱時見到啲鵝肝大大塊，食落口同西式嘅唔同，有啲似玉子豆腐，不過啲味勁濃，而且唔酥，第一次咁樣食，好食。唯一嘅係同上次一樣想食韮菜鵝紅，但都係賣晒，唔知有無得預訂，好期待。