日旺果汁小食 (已結業)

放工後朋友相約去了號稱香港秋葉原的鴨寮街睇電子產品，逛了一陣來到小食檔日旺小食，即時牙癢癢想食嘢，為食肥仔立即慷慨地拿出廿蚊要了兩碗鹵水牛什，沒有指定要那些部位，就讓檔主隨意剪一碗，碗內有羔的肥牛腸、牛膀、牛肚及牛肺各數件，一碗一共有十多件牛什，我要求淋上辣汁，但店家只有鹵水，惟有加些黃芥辣醬，立即走埋路道即時消滅，鹵水汁的味幾清，唔會奪了牛什的原味，加些少芥辣更加惹味。現在的牛什平均都要賣七蚊一串，一串只有四五件，日旺十蚊便有十多件，實在幾抵食，如果可以加幾張枱，可以坐低幔幔食，可以食多幾朱再飲枝果汁潤下喉。

阿爸同阿媽去開深水埗，又點會唔買野食番黎俾我呢個為食王食呀。今次買咗炸大腸3串、一碗牛什同一串生腸。生腸好粗大。爽身脆口，但唔入味。同肥姐的生腸有距離。大腸3串阿爸原本諗住一人一串。不過我食咗一粒就頂唔順。我一向都不太好街邊的炸大腸，覺得佢又好肥又有陣味。今次呢d都係，可能因為隔咗一陣先食，個皮變得有d韌，唔夠脆。同埋真係好大陣豬味。可能係我唔識欣賞，因為阿爸話好食，仲KO埋我嗰串。牛什就反而幾好味，又平喎！份量幾多。有四、五舊牛肺、四舊牛膀、五、六舊牛肚，仲有兩條腸。全部都幾入味。亦無異味。牛膀好淋，好黏口，好味。