正潮樓

营业中

休息中

疫情關係六點後又冇堂食， 經常要自製early dinner～臨近年尾梗係要食番餐好嘅迎接新嘅一年。行經灣仔諗住買年花， 發現這間新餐廳 ，  內籠光猛，裝修別緻帶點古色古香， 主打正宗潮州菜， 趁有堂食把握機會入內光顧～卡座和圓枱都好好坐。 圓枱坐椅好舒服， 圓枱也不會頂腳那種。新張期內， 好像不设茶介。 幾間貴賓房暫時都沒有最低消費～招牌菜膽火腿翅潮州菜裏較高級嘅菜式。 心機火喉燉翅， 菜膽嘅清甜， 令湯底味道更出色， 足有二両嘅魚翅， 分量十足， 燉盅keep 到溫度好夠熱，非常暖胃！筍乾炆鴨肉味道非常有特色， 做法講究，用了新鮮筍同筍乾同炆煮， 鴨肉濃香， 肉質軟腍亦能保持鴨件原狀， 竹筍切薄片，夠爽口， 以為炇鴨會好油膩但一啲都唔肥，仲散發出一股荀香！煎九肚魚烙蠔仔烙吃得多， 九肚魚則較少見。 特別考功夫，九肚魚肉質太嫩容易散， 大廚唔會落好厚嘅粉漿， 味道唔錯， 依然香口惹味， 啖啖都係九肚魚肉非常滋味！薯仔炆牛筋用煲仔熱住上～ 超級滾熱辣香噴噴！大大件嘅牛筋腩炆得好腍， 薯仔略炸過， 唔會炆到又腍又爛， 醬汁調教到啱啱好， 微微的辣又唔會太鹹， 配白飯真係超正～！服務唔錯

新開的潮州菜館以傳統潮菜作賣點，細心看看，餐牌上除了見慣的潮州菜式外，的確有些陌生名字，例如紅炆鳥耳鰻、玉枕白菜、 朥粕春菜煲、芝麻落湯錢等頗吸引。亦不乏矜貴菜式，三年以上老鵝頭承惠$1680，真是吃過方知有幾好。生醃系列亦比較少人做，生醃膏蟹賣相非常美味，三款之中只有魚露浸花甲無需預訂，今日可以吃到。最後決定今日食呢啲：招牌菜膽火腿翅 $268湯清味醇厚，翅足料，紹菜燉至極軟嫩，飽吸高湯，加些芫茜提味更香，整體滿意。魚露浸花甲 $188魚露與川椒混合的味道出奇的討好，魚露本身沒有過鹹，輕輕透出川椒香，喜歡這特別味道。筍乾炆鴨肉 $158炆至火喉十足，鴨肉鬆軟入味，鴨皮入口即化，非常滋味，筍乾原來亦幾好吃。薯仔炆牛筋 $168牛筋保持些嚼勁亦好，骨膠原豐富，薯仔已經半化，原來炆至此程度甚入味，調味出色。礦泉水白粥 $30平衡肉膩，配碗老火白粥合拍，胃納稱心滿意；想不到，這麼大碗，兩人分吃真夠飽。中式飯店傳統佈置，光猛清潔。有三間私人房，兩間細房門前有對聯，可以打通。據說老闆是潮州人，趕在過年前開了這間潮州飯店，座落名店聚集的灣仔，首次光顧，評價唔錯，平實中有點不一樣。