鳳城酒家 (已結業)

同朋友飲早茶揀左呢度。個酒樓要搭lift/行樓梯上，得一層而且面積都唔係太大。大概朝早10點9到，一入到去就見到勁多食客同等緊位既人。我地好似等左20分鐘左右就入得😳。鳳城點心果種懷舊既味道，食果陣有少少時光倒流既感覺😛 我估佢係即叫即蒸，所以入左紙都要等番一陣，第一次去好似都等左20分鐘，第二次去就快少少既。通常一上就係全部點心都差唔多時候上，熱騰騰好正😛💦佢既水準好平均，皮薄料足，味道豐富，香氣濃郁。傳統中式點心黎黎去去都係果幾樣，都唔想太chom氣逐件講感受，直接去相（雖然影得麻麻地）！兩個人埋單一人大概80-90$，悠悠閑閑食到飽飽地，當係brunch都差唔多係咁啦😂係舊式酒樓逐漸沒落既時代，要搵番相同既味道可能愈來愈難，所以食完真係好想記錄低呢刻幸福既感覺。

星期六來，好彩訂左位，見到好多人等位。坐低，從裝修同侍應你就會感受到舊酒樓嘅味道！menu都好舊式，仲有係手寫。 叫左個二人世界同幾個點心。雞茸魚肚羹好大碗，可以分成七小碗，想像到兩個人食完都飽哂！ 羹夠哂味，仲有不少嘅冬瓜蓉同啖啖魚肚。鍋貼大明虾幾好味，個吓幾爽，點少少醋，酸酸地，更好味！ 招牌乳豬拼生腸真係正！ 乳豬皮脆，只有薄薄一層肥膏，d肉好嫩，正！個生腸都好爽口，果然係每枱必點之選！西蘭花帶子一送上枱就知做得不錯，帶子好大粒，亦夠鮮味，西蘭花加左薑絲炒，火喉啱啱好！ 燒賣好大粒，但略嫌豬肉多吓肉少。馬拉糕熱辣辣香噴噴，好軟綿綿，而且唔會過甜，係我嘅至愛！ 豉汁蒸魚雲係令人驚喜嘅，無腥味，好多薑葱加埋個汁食無得彈，而且魚肉夠哂滑！ 四寶滑雞札有兩大件，豬皮索哂汁，雞件夠新鮮，芋頭好粉。最後即炸嘅上湯炸粉果，熱辣辣，浸一浸湯，立刻咬一啖，食到嘅係懷舊味道！定必係每次都叫嘅點心！最後嚟一碗糖水，個綠豆海帶糖水係二人餐包埋，估唔到我地四個人，就俾左四碗我地，真係太好啦！糖水煮到好綿，但仍可咬到粒粒綠豆，又唔會過甜，為今餐畫上完美句號呀！