影片
更多
2014-07-24
6657 浏览
依家喺「速食」嘅年代，乜都要快，平時返工睇免費報紙，都喺一樣，概略睇睇標題，有興趣嘅就睇多兩眼，不過，副刊中嘅旅遊及飲食就多數會花少少時間細閱，無他嘅，小弟為人貪玩成性，好食懶做。食海鮮，食到游水貨色已經好足夠，就如早前一班死佬揸車入到去屯門三聖村，飽餐一頓海鮮大餐。前排，晌副刊睇過一篇報導「淨化海鮮」，甚麼「還原真味」，文中仲提到海鮮淨化後都能達至刺身級級食，即喺乜都可以生食，實在令人好奇 。這晚，唔使再好奇，與朋友一同體驗依份「淨化」真味。賣「淨化海鮮」嘅餐廳叫Table，簡潔嘅一個名字，位處上環文咸東街柏廷坊。餐廳佔大廈全層，所以一出電梯就已喺餐廳入口。大大個啤酒桶上，豎立一個寫有「淨化海鮮」嘅牌仔，加埋少少貝殼裝飾，唔使擔心搵錯地方 。踏入Table，已感受一份優雅，入門後對正有個酒吧，而主大堂有多組4 / 6人餐枱，另一扇門後又有多組4 / 6人餐枱，簡單暗花樹枝紋，香檳白枱布，杏色絨面餐椅，配以恰到好處嘅射燈（尤其相機先食嘅年代），加上氣氛柔和，嚟晚飯嘅人亦喺斯文人居多，叫人自自動動輕聲細語，享受閒適用餐環境。嚟到Table，食海鮮喺必然目的，但翻看完餐牌後，原來海鮮以
賣「淨化海鮮」嘅餐廳叫Table，簡潔嘅一個名字，位處上環文咸東街柏廷坊。餐廳佔大廈全層，所以一出電梯就已喺餐廳入口。大大個啤酒桶上，豎立一個寫有「淨化海鮮」嘅牌仔，加埋少少貝殼裝飾，唔使擔心搵錯地方 。
踏入Table，已感受一份優雅，入門後對正有個酒吧，而主大堂有多組4 / 6人餐枱，另一扇門後又有多組4 / 6人餐枱，簡單暗花樹枝紋，香檳白枱布，杏色絨面餐椅，配以恰到好處嘅射燈（尤其相機先食嘅年代），加上氣氛柔和，嚟晚飯嘅人亦喺斯文人居多，叫人自自動動輕聲細語，享受閒適用餐環境。
嚟到Table，食海鮮喺必然目的，但翻看完餐牌後，原來海鮮以外，又有唔少其他選擇。廚師發辦（Omakase）由$980起 ，對我哋嚟講喺一個幾「高級」別嘅價錢；而另一個特色小碟試菜（Daily Small Dishes Tasting Menu），一共有13款菜式，每款定價$158，亦能以$580任揀4款品嚐 ，依個特色小碟較適合我哋「自主」嘅心態；當然，又想試一試報紙所介紹嘅招牌波士頓活龍蝦三食，又喺定價$580。
Norda Still Water $60嚟到一啲高級餐廳，清水自然無免費嘅，高檔次嘅礦泉水淨喺識Perrier、Evian，今次據介紹喺嚟自意大利嘅Norda（750ml），其實，對礦泉水無咩研究，亦唔會叻到飲得出太大分別，總之清純能幫助稍後品嚐各款菜式時清清味蕾，咁就已好足夠。
黑魚籽蛋沙律多士粒 喺等候上菜期間，先有免費嘅開胃小食，做得精巧嘅多士粒，猶如食法國菜時嘅開胃小品（Amuse Bouche），作用喺喚醒一下嘴巴。多士粒經過微烘，鬆軟外脆，滋味嘅蛋沙律，搭上矜貴鹹鮮嘅黑魚籽，一啖一件嘅份量，的的骰骰，已經喚醒起味蕾進入作戰狀態 。開胃小食已如此精彩，之後嘅菜式更期待。
麵包籃配蕃茄沙沙 晌等待主菜上場之時，麵包籃已徐徐送上，有小弟鍾意嘅意大利香草包，軟熟而帶點焦香，意式酥皮條酥香鬆脆，皆因用「飛佬皮」做，又點可以以脆得交關。麵包嘅伴汁喺蕃茄沙沙，新鮮製，蕃茄味鮮活 。由於個意式酥皮條以飛佬皮捲起嚟焗，牛油香味頗重，所以，更要沾多少少蕃茄沙沙嚟食。
跟住落嚟，就喺特色小碟嘅出場，晌13款選擇中，都幾心大心細，幾經店長對菜式嘅介紹，以及考慮我哋嘅喜好，最終揀咗醬油醃生蟹、煙海鰻、法式田螺及蟹餅4道菜式。Kanjang Gejang
由於餐牌中菜式無中文名字，都喺由店長對我哋概略描述，再取其意譯為中文，依道韓式醬油醃生蟹，真喺名副其實以生蟹入饌，簡單以韓式醬油醃製，蟹肉醃到好透，變成腍腍滑滑，而且，好多鮮橙色嘅蟹膏，入口豐腴，不過，有少少偏鹹偏辣 ，事後跟大廚交流時，原來依家個程度已經喺減鹹，佢話正宗嗰啲仲鹹多一級所以，未必人人可以接受到。此外，另一有趣地方喺墊底有啲醃蘋果及啤梨片，個樣好似法式甜品紅酒梨咁，不過就鹹鹹辣辣、帶點點爽脆。
Smoked Eel on Rock 這道煙海鰻喺被列為「客人至愛」，果然，亦小4份小碟中小弟至愛，首先賣相已相當有心思，尤其幾樖小椰菜配白芝士汁及黑魚籽，一白一綠賞心悅目，而且味道濃郁鹹鮮；另一樣配菜醋醃薯仔，薯仔連皮煮，拌油醋，質感挺實，酸香醒胃；至於主角煙海鰻，據介紹海鰻喺屬細條嘅BB鰻魚，外表亮麗光澤，一咬爽滑彈口，但又有啲咬勁，味道油潤而富煙燻香味，實在有驚喜 ！
Escargot 好有法國菜嘅味道，法式田螺以精緻嘅玫瑰花酥皮襯托，伴以沙律菜點綴，用上和風石砵盛載，感到有一份閒逸寧靜。田螺既腍且滑，入口又帶少少煙韌，掛滿香濃忌廉汁，確喺唔錯嘅小碟。
Handpicked Crab Cake 另一道「客人至愛」菜式，蟹餅外表平平無奇，但加入幾片青瓜卷及一小束香花菜，賣相再次展現出一份簡樸而優雅。蟹餅有半個成人手掌大，煎得金香，將蟹餅一切開，有啲「不得了」嘅感覺，不單只一絲絲蟹肉，更有一抽抽蟹膏，對喜歡食蟹而怕麻煩嘅人一個極好嘅選擇，況且，肉鮮膏香，回味無窮，值得推介 。
食過幾道特色小碟，都喺時候品嚐期待已久嘅招牌波士頓活龍蝦三食（$580），以3個唔同嘅食法，體驗龍蝦嘅真味。如果再想奢華啲，可選擇法國藍龍，但三食價要$880，而且，需4日前預訂，以保證提供最佳嘅質素俾食客。
第1食 - Lobster Sashimi 睇報紙有將佢譯為「龍蝦剌身配日式酸豉油泡沫汁」，將半隻龍蝦起肉做刺身，晶瑩剔透嘅龍蝦肉簡單配以少少酸豉油泡沫，蝦肉鮮爽嫩滑，加入柑橘嘅酸豉油無搶過蝦鮮味嘅同時，亦能有提鮮作用，有畫龍點精之效 。而碟邊放有一小撮廚師自家調製嘅麵豉鹽，蘸丁點，蝦味更突出。此外，小碗內綠色嘅原來喺龍蝦腦漿 ，大廚專燈出嚟介紹，出面餐廳唔會做，因為怕唔乾淨，唔乾淨就會腥，不過，經過淨化後絕對安全。小弟第一次食「蝦腦」，真喺要同佢講聲Hello，口感滑滑，幾甘飴，但又難講出味道喺點，有點點食海膽嘅感覺。
第2食 - Shiro Miso Glazed Lobster 另半邊龍蝦會以日式西京燒嚟處理，蝦肉燒得金黃，上枱時即帶嚟一點點香氣，蝦肉入口緊緻爽甜，面層搽咗少少白麵豉，添加一份惹味；同樣，蝦頭連膏帶腦，半溶半凝，幾特別嘅體驗。
第3食 - Claws served with Salad 剩抵嘅一對蝦鉗，可以揀配沙律或意粉，我哋揀選前者，沙律簡簡單單以芽菜苗、洋蔥、紅蘿蔔仔為組合，味道新鮮鮮甜；主角當然放番晌龍蝦蝦鉗身上，蝦鉗拆得乾淨俐落，加上唔使郁手就大大啖食到蟹鉗，喺件幾爽嘅事 ，再者，鮮甜嘅蝦肉，實在一流。
由於啲特色小碟及活龍蝦三食我哋都唔喺太知個份量會喺點，所以，食完依兩部份先再點其他嘢。因為今晚客人未算好多，所以，邊食邊再點菜都唔太耐。Grilled Presa Iberico $360（6oz）
為滿足部份人需要，餐廳除海鮮以外，都加入肉類菜式，當然，仍以優質肉類入饌。主打就喺西班牙嘅伊比利亞黑毛豬，有肉腸、風乾火腿、豬肩肉或豬腰脊肉嘅選擇。點咗燒伊比利亞黑毛豬肩肉，一客薄切只有5大片，淨重6安士，就盛惠$360大元，可謂矜貴不菲。店長介紹時，話豬肩肉先慢煮，後烤燒，故此，肉質細嫩軟腍，外皮有少少焦香，肉味濃郁，又無太多脂肪，伴上蒜油汁，令味道更富層次。不過，始終價錢唔便宜 ，好食還好食，都喺建議多點海鮮菜式，當然，閣下錢多無掟使就當別論啦，哈哈。
BB Abalone, Linguini Aglio E Oilio $198 都話晌度食海鮮划算，依道鮑魚仔扁意粉的確做得好食，雖話鮑魚仔，都唔會「奀黐黐」，由於喺鮮鮑關係，咁就咪期望好似割鮑鮑味咁濃，不過，入口煙韌彈牙，口感一流 ；蒜香扁意粉亦做得啱火候，食落有咬口，蒜香、辣勁兼備 。
雖從不自認為甜魔，但絕對喜歡甜點，所以，甜品時段又喺另一個開心時刻。French Dark Chocolate Tartlet $70
依個細細件嘅黑朱古力小餡餅，絕對啱晒我，黑朱古力味道異常濃香醇厚，甜而不膩，估計坐底黑朱古力用上70%；此外，朱古力餡估唔到挺幼滑 ；加埋薄薄嘅撻殼，實在喺一道稱心嘅甜品。伴碟仲有一小球紅莓雪葩，酸香清爽，有助清清味蕾。
Croissant Bread & Butter Pudding, Ice cream $70 麵包布甸食得多，自己都整過，但一向都只會以普通白麵包嚟做，今勻個麵包布甸真喺無得彈，以牛角包嚟做，富牛油香不在話下，比普通麵包更酥香，部份位置軟綿，部份位置鬆脆；而布甸上嘅雲呢嗱雪糕更加入果仁碎，真喺不得不推介 。
Churros, Warm Chocolate Sauce $50 對比起以上兩道甜品，雖然Churros依種西班牙炸油條有其特色，但始終有啲比下去嘅感覺。其實，「炸油條」本身都做得香脆，玉桂粉及沙糖都撈得均勻，沾上香濃柔滑嘅朱古力醬都同樣好食，只喺無份嘭一
聲嘅感覺啫。
從該篇報章內文得知，原來淨化海鮮都唔喺咩新嘢，晌歐洲一啲國家早己運用依個技術。而且，個淨化過程都幾唔簡單，要用海鹽調配唔同鹹淡度嘅淨化缸水，過濾器中嘅益生菌又會幫助分解海鮮嘅排泄物及有害微生物，更要因應唔同海鮮種類嚟淨化70多個小時 ，真喺一擔睇唔到嘅功夫同心機。加上菜式無焗限於一國，創意可無限發揮，而且以食材為本，做法偏向簡單，但卻從每道菜均可感受到大廚嘅心思表達，讓生猛跳動嘅海鮮，活現淨化嘅真味，確喺一次有趣味遊嘅體現 。
张贴
