影片
更多
2014-07-23
21139 浏览
舊年公司週年飯改咗新制，同事無需跟老細一齊，可自行出去食番餐，所以去咗灣仔嘅萬麗咖啡室（Cafe Renaissance），寫咗篇題為「老細出錢我哋出力．四傻喪食」嘅食評（http://www.openrice.com/restaurant/commentdetail.htm?commentid=2313751），今年再接再厲，週年飯再度出擊，繼續喪食 ，依次睇住老細俾嘅預算，揀咗尖沙咀嘅馬哥孛羅咖啡廳 （Cafe Marco），貪佢平日可以食到10:00pm ！其實餐廳唔細，據「開飯喇」嘅資料座位數目有成250，可能爭取多啲空間，連個蠔吧及壽司、魚生檔都擺埋晌門口度，而整個食物區，幾組食物枱，兩個開放式廚房，都集中晒晌近入門口嘅位置。以一間5星酒店而言，餐廳內嘅枱櫈排得有點密，裝修亦沒有多大特色。4人嘅餐枱，顯然仲有啲啲細，尤其食自助餐，擺多一、兩樣一齊分享嘅食物晌枱面，已經逼爆咁滯。 沙律．冷盤小食 沙律選擇唔喺好鼎盛，調製好嘅沙律只有4款，如法式吞拿魚沙律、希臘沙律……等等，再加7種沙律菜配8款左右配料、4款醬汁。不過，都夠砌一份豐富嘅沙律，況且，沙律菜夠新鮮，入口索索
其實餐廳唔細，據「開飯喇」嘅資料座位數目有成250，可能爭取多啲空間，連個蠔吧及壽司、魚生檔都擺埋晌門口度，而整個食物區，幾組食物枱，兩個開放式廚房，都集中晒晌近入門口嘅位置。
以一間5星酒店而言，餐廳內嘅枱櫈排得有點密，裝修亦沒有多大特色。4人嘅餐枱，顯然仲有啲啲細，尤其食自助餐，擺多一、兩樣一齊分享嘅食物晌枱面，已經逼爆咁滯。
沙律．冷盤小食 沙律選擇唔喺好鼎盛，調製好嘅沙律只有4款，如法式吞拿魚沙律、希臘沙律……等等，再加7種沙律菜配8款左右配料、4款醬汁。不過，都夠砌一份豐富嘅沙律，況且，沙律菜夠新鮮，入口索索聲，再加少少煙肉碎、巴馬臣芝士粉，撈啲意大利油醋，都可以清新味美。
沙律表演平穩，但啲冷盤小食則甚有驚喜，就晌沙律區側旁，除傳統嘅薄切凍腸、煙三文、煙鮫魚外，有外國人可能幾喜歡嘅五香牛肉、鹵水豆腐，但最吸引小弟喺幾樣富特色嘅小食：越南紙米卷、巴馬火腿露筍卷、牛油果黃梅杯、蝦沙律。幾款冷盤小食各具個性，而且，賣相的骰精緻，最心水喺牛油果黃梅杯，將牛油果粒、黃梅乾混入酸忌廉中，開胃有益又有咬口 。
餐湯．麵包籃．芝士 中湯代表喺猴頭菇蜜棗排骨湯，而西湯代表喺茴香薯蓉忌廉湯，今回見中湯都好家常，屋企都有煲過依類湯，所以，就主力試西湯。薯蓉食得多，薯蓉忌廉湯應該喺第一次試，估唔到個湯好重薯味，茴香味亦見突出，打得質感又幾幼滑，好味 ！
麵包籃款式以歐陸包為主，大大細細近10款，伴湯時先拎兩個細嘅食，質感韌淨，未必人人啱口味，但幾有麥味，所以，再拎多個大嘅跟同事一齊試。
麵包塗牛油又得（牛油有平價嘅花嘜，亦有貴價嘅總統），伴芝士都得。因為芝士質素唔欺場，4款芝士：荷蘭哥達芝士（Gouda）、瑞士愛蒙塔爾芝士（Emmentaler）、法國布利芝士（Brie）、英國車打芝士（Chedder），各有唔同特性，最好就款款切少少試晒佢，不妨以一塊高纖麥餅嚟伴芝士，芝士味更能彰顯 。
海鮮精選 海鮮凍盤始終喺一間賣自助餐餐廳嘅聚焦點，有啲人評價一餐自助餐正唔正，好多時都以海鮮嚟衡量，雖然多少較為片面，但始終都可睇成一個指標。依度海鮮包括：長蟹腳、翡翠螺、加菲蟹、甜蝦、蜆、青口、波士頓龍蝦，再加埋近門口嘅生蠔專櫃，相信咁嘅陣容，都唔會有太多挑剔。雖然，有唔少人排拎海鮮，但貨源供應足，都無咩缺貨，而生蠔新鮮即開，每次限攞兩隻，嚟嘅斯文人居多，所以，排隊井然有序。捧番碟海鮮精選拼盤埋位慢慢嘆，樣樣都好好食，尤其長蟹腳、甜蝦、龍蝦、生蠔，食完一口海水鮮味 。
即煮活美國波士頓龍蝦 波士頓龍蝦除有烚熟凍食嘅龍蝦凍盤外，仲晌開放式廚房增設「即煮活美國波士頓龍蝦」，亦喺全場最多人排嘅檔位，可算喺亮點之最。大型玻璃格內存放十數隻波士頓龍蝦，隻隻冰鎮住仲郁郁吓，即劏即煮，烹調需時，想食就要排吓隊 。每次限攞半隻，可拌蕃茄荷蘭汁、香辣茄汁或 荷蘭汁，實在芳香鮮甜，尤其蟹鉗位，大大啖鮮龍蝦肉，爽呀，所以，跟住一陣食熱盤時再追加半隻 。
熱盤．澳洲和牛 熱盤相對好多星級酒店嘅自助餐少，印象中大概十數款左右：咖喱、蒸魚、時菜、牛仔骨、牛肉卷、炒薯仔、焗帶子、炒飯、炒麵，因為影熱盤時，想逐樣影相存記錄而被疑似經理阻止，佢咁怕人知佢哋有咩熱盤，咁我都無謂晌度多講。一份綜合熱盤，樣樣執啲，但重點喺個即煎澳洲和牛（配菜有扒意大利青瓜、車厘茄、香草烤薯），以及翻兜嘅即煮波士頓龍蝦。啲和牛又喺即點即煎，外層焦脆，但內裡仍然粉嫩腍滑 ，就算唔喺試晒所有熱盤，單以眼前依份「主菜」，食得叫人超滿足啦 。
魚生．壽司吧一起手無打算食魚生、壽司，因為魚生一般都喺嗰兩、三款大路嘢，壽司更舊舊飯，太易飽肚。不過，同事話啲珍寶帶子刺身好掂，所以，最後我都無執輸要番一客，另加幾片吞拿魚。的而且確，啲珍寶帶子又大又厚肉，最緊要喺非常鮮甜，正 。順帶一提，和食仲有少少烏冬、冷麵、特色壽司卷。
燒臘．麵檔有啲人總要食碗粉麵飯先得安落，餐廳都有提供燒臘檔同粉麵檔，由於興趣不大，只喺影張相留記錄，有咩食就留番有興趣嘅人士自行走去睇睇。
甜品 殺咗咁多碟嘢，都接近尾聲，又喺甜品時間。咪以為啲甜品一張大圓形食物枱睇晒（亦有生果盤），入啲仲有一座Movenpick雪糕櫃，足有10款口味，而雪糕櫃前又放咗唔少五顏六色嘅馬卡龍。因為被人話過唔可以逐樣嘢影，所以，今次甜品嘅款式都唔可以描述得太詳細。
兜咗個圈，覺得啲甜品又唔算太吸引，最終揀咗7款：藍莓芝士餅、咖啡味馬卡龍、芒果蛋白瑞士卷、罌粟籽檸檬蛋糕、檸檬瑪玲撻、雜莓意式奶凍、檸檬啫喱，因為幾款都喺心水想試，感覺味道不俗，最欣賞個芒果蛋白瑞士卷及檸檬瑪玲撻，前者鬆甩軟回彈力十足，卷心件芒果又清甜；後者檸檬味清新，啲焗蛋白脆卜卜 。
Movenpick雪糕要青檸雪葩、熱情果芒果雪葩及楓葉糖漿味雪糕，灑少少杏仁片，又加啲啲芒果漿。雪葩冰爽清涼，尤其青檸，酸度強勁，而熱情果芒果亦唔錯，熱情果嘅酸味較芒果味突出，至於合桃楓葉糖漿味，口感細密，糖味濃郁得嚟清甜自然 。
依度唔興果汁汽水任飲，只包餐茶1杯。小弟要咗一杯鮮奶咖啡，齋睇表面嘅奶泡及嗰幾滴咖啡痕，就知只喺機沖嘅貨色，講唔上好，亦唔算差，咖啡個味道無咩太大問題，只可以話個質感唔夠豐厚，奶泡跟咖啡唔夠「勻巡」。
星期五晚嘅自助晚餐成人收$558，另加一，不過指定信用卡又有番85折，最後折實為$530一位，其實一啲都唔平。若硬要跟舊年嘅萬麗咖啡室比，我就鍾意萬麗多啲 。
张贴
