District 8 (藍塘傲) (已結業)

人生中真係好少去將軍澳, 今日去到發現原來呢度有好多好靚嘅餐廳, 而今日食嘅🔸District Eight🔸就喺海邊。餐廳有分戶外位同室內位, 因為陽光太猛烈, 所以我地自自然然咁揀咗室內坐。枱與枱之間有好舒適嘅距離, 亦都因為可以望到少少海景, 所以令人好Chill 好有渡假嘅感覺。🍽 Mushroom Tagliatelle闊條麵嘅面層舖滿一片片嘅黑松露片, 未食已經聞到濃濃嘅黑松露味。磨菇炒得好香, 闊條麵軟硬適中, 而個醬汁係用黑松露同磨菇嚟整, 配合埋羊奶芝士一齊食, 香濃幼滑, 好好食。🍽 Smashed Avocado水煮蛋一切開就有濃濃嘅蛋漿流出嚟, 配合埋牛油果蓉, 味道好夾, 好清新, 羊奶芝士反而係用嚟做少少襯托, 味道唔會太突出。🍽 Ox Cheek Pappardelle賣相同肉醬闊條麵好似, 不過細心食落去就知道個分別, 平時肉醬會夾雜脂肪, 呢個牛面頰就有濃濃牛肉味, 醬汁濃稠適中, 可以掛汁上闊條麵度。整體環境, 食物, 服務都好好, 如果想望吓海景, 放假去Chill 吓, 值得考慮呢間餐廳。

而家將軍澳海旁開咗好多新餐廳，所以搵日放假就去試下。睇咗幾間都係西餐，唔係 pizza pasta 就係牛扒。見到呢間個裝修幾似法國小 bistro 嘅感覺，選擇亦都好似多啲，就揀呢間試下。老婆話想食生蠔同埋牛骨髓，所以叫咗兩樣做前菜。生蠔夠 creamy，平時食都係落兩滴檸檬汁，今次手痕試咗幾滴 mignonette sauce。出乎意料地咁夾。鴨肉不嬲都係我嘅至愛，但係坊間好少餐廳做得好食。呢度嘅 duck breast 非常有驚喜，皮脆肉嫩，佢嘅煮法比一般嘅生，所以如果怕生嘅就未必啱食。呢間一定係會經常幫襯嘅餐廳之一