一葉小廚 (已結業)

又到放飯時間啦！！！今日午餐食位於港灣豪庭商場既一葉小廚🍃中午12點零鐘都仲有位可入座睇吓餐牌先👀👀午餐多數都係一個餸跟一個飯，可選擇菜飯/肉燥飯，其實好岩同人share，一人叫一個餸就試到兩個餸啦！可惜我一人午餐🥣無人同我share🥲🥲🥲我order左鹽酥雞排跟菜飯，飲凍蜂蜜紅茶杯紅茶甜到呢⋯⋯唯有等佢慢慢溶化🫠🫠大約等11分鐘，所有食物都到齊啦！食雞排店員會提供調味粉，自己加落雞扒度👍🏻👍🏻👍🏻👍🏻👍🏻我三隻味（梅子粉、海苔粉、七味粉）都試晒啦⋯⋯最夾都係海苔同梅子粉雞扒真係好炸，好熱氣😂不過中間個塊有少少🤏生生地，整體都ok ge下次食其他先

特登黎依間連鎖台灣店食依度裝修簡樸因為位置唔近地鐵其實人唔多所以都坐得幾舒服同朋友傾計或者想找個寧靜既地方食飯都一流 晚餐叫左雲吞雞肉燥飯因為人唔多既關係 好快就送到肉燥飯無咩特別 但算多肉燥既 至於個雲吞雞真心幾好食個湯雖然係味精湯但幾好飲 送飯一流同埋成個雲吞雞好足料雲吞好大粒 入面個蝦都大隻雞就普通入面仲有其他配料例如菜同火腿等等食完真係好飽最後飲埋野飲非常滿足 其實以依間野既價錢黎講 性價比真係幾高有機會都會想再返黎食依個抵食之選

外賣叫咗個炒飯，點知食食下，油浸炒飯，即刻食唔落了…………之前食過其他嘢唔錯，服務都OK，所以今日見多人冇堂食，唯有叫外賣，都不求高質素，只求正常味道，點知…………炒飯出晒事

今日同男朋友去睇下有咩食，係出面望到個店面環境都幾好，就諗住試試。送野食過黎既店員好冇禮貌，放低得好大力，好似我地得罪佢咁。跟住再試下啲野食，咁我地叫左台式孖寶肉燥飯。野飲就叫左蜂蜜紅茶同檸檬茶。餸就簡左黑醋豬軟骨同台灣腸既。睇相張就好吸引，實際黎到就得兩舊糖漿杯大細既豬軟骨，一條台灣腸。咁都唔緊要啦，但啲肉燥仲少到兩啖冇曬，就真係有啲少。因為食包都慣左加啲煉奶，當我地問個店員可唔可以比啲煉奶既時候，佢好唔耐煩咁話呢到冇煉奶。我覺得有啲侮辱左我地既智慧，一間舖點會冇煉奶，朝早早餐餐包都要煉奶啦。真係食到一肚氣。啲野飲又好澀，要落糖加水咁飲。仲要衛生做得唔好，張枱有蟲係到爬黎爬去。總括而言，今餐食得好辛苦。

自從屋企附近一葉執左笠，我就對佢既焗豬念念不忘，啲分店又唔就腳。今日終於有機會去大角咀分店食，原來唔係間間有焗豬，好彩無去錯。雖然成個商場好似好up dup ，無阻我去搵間舖係好耐無見既焗豬，之前食開，佢啲飯係珍珠米好咬口，而且啲汁多，豬扒有香茅味好正。呢間食落其實少少失望，汁唔夠多，豬扒有一兩舊係好硬好乾，唔夠香茅另外再叫個炒新竹米粉，還好睇怕如果唔係咁啱經過 都唔專登過黎食了

2021 年4月18日，中午1:20分由於中午時間等候客人比較多，大家也在門外取票等候安排入座，但中途突然有2位客人沒取票，自行進入餐廳及入坐。於是我的同行朋友立即向餐廳侍應說明此事。但該侍應只是說: 下一張枱比你。那刻令人感到不受尊重及不公平對待，我已立即離開。如果人人都係咁做，大家都唔洗排隊，自出自入都得啦。一間餐廳的質數好與壞，食物的味道固然重要，但服務態度也很重要，如要吸引一些長期顧客，試問咁既服務如何挽留到客人的心？

上次黎探朋友食過呢間台灣野，竟然會對佢念念不忘，今日特登帶媽咪黎食順便行下商場入面的千色店，因為千色店做緊新春大優惠。一葉小廚的餐廳座位都有要客人隔枱座，感覺更安全，入座前要量體溫，一入座佢哋就會每人派一個紙袋，俾我哋放口罩用，乾淨衛生。我叫咗紅燒牛肉原味湯麵，飲凍珍珠奶茶。紅燒牛肉好林好入味，不過今次的湯麵有小小硬，煮耐小小會更好。珍珠奶茶的糖水係自己落的，甜度可以自己調教，都幾好。媽咪叫左一份高雄葱香玉排，配肉燥飯，飲熱柚子蜜。葱香玉排煎得好林，非常好味，我都偷食左兩塊。

屋企樓下有間幾好味的台灣菜，我哋成日都去幫襯的，就係一葉小廚，環境光猛舒服，座位都算多，仲有提供BB餐椅，好方便。我哋今日中午再去食，同行有四個人，分左兩張枱坐，店員好好，安排了最近的兩張枱俾我哋，咁就唔使相隔咁遠。我地分別叫了四個招牌套餐，一份秘製紅燒牛肉麵，一份鹽酥雞扒麻辣湯麵，一份台式孖寶肉操飯和一份特色滷水拼盤，四個餐都係飲凍珍珠奶茶。秘製紅燒牛肉麵，湯底濃郁，牛肉好林。鹽酥雞扒麻辣湯麵，雞扒好大塊，炸到好香口好脆，入面的肉汁依然保持到，好正。

平時都叫開佢地既三餸飯，真心算係唔錯，點知今日叫個小菜試下，嘩真係大開眼界，令人念念不忘。六十七蚊一個小炒，叫蝦雞加送魯肉飯仲有野飲，諗住今晚都叫做對得住自己啦。整體感覺同色香味俱全會唔會有關連呢？本身夜晚六點已經無堂食，做外賣可以做好少少，去留返班客，可能呢個係客仔心態，但做生意都係想長做。講返碟炒蝦雞先，大家望下幅圖，有兩隻蝦，我食完兩啖飯諗住食隻蝦，發覺成碟得兩隻，係兩隻蝦，真係令我感到超失望。

其實都成日黎既，因為係屋企附近～今次叫左個紅燒牛肉麵，牛肉好嫩，好食，個麵口感都好好，唔易斷，佢再加d青豆粒係上面，感覺健康d。最中意一葉唔加一同配凍峰蜜紅茶（仲有其他凍飲）都唔使加錢。屋企人叫左個特色魯肉飯，個人覺得d餸鹹左小小，個鴨肉又實左小小，但都ok既。份量適中唔會唔夠飽。不過員工服務就見仁見智，無咩笑容同埋好似唔太想出聲咁。例如我問佢個紅燒牛肉麵會推介配牛肉湯底定蕃茄湯底？佢靜係話蕃茄湯咪蕃茄味囉～ok 依樣我唔使問都知呀：0）

同個同事在尖沙咀做咗半個 job， 要放 lunch，但渣車在尖沙咀冇位，又插針都插唔入，結果去了大角咀。點知，大角咀都冇乜位，轉了幾條街，發現有個違泊既空間，望多望，都有幾間食店，結果就停埋一邊啦。同事對食有「要求」，除了味道，首要係「色」！其實都只係得兩條友，佢有佢堅持，唔通分開食咩！算啦，都係唔提政治，講返正題。係大角咀呢啲舊區，交通唔方便，除了區內人同你爭食，就係我地呢啲渣車既區外人，有車位，有得食，哈哈。冇車位，違泊碰運氣。好在呢間餐廳有兩面非常之開揚既落地玻璃牆，望住架違泊車食晏，係安心少少既。高雄蔥香肉排配香菇肉燥飯台灣菜，都係肉燥飯啦，呢到既肉燥飯唔係好多肥皂同豬皮果種，幾好。又唔想食酥炸雞，太熱氣，肉排啖啖肉，最啱我食肉獸既本色。加多杯熱蜂蜜紅茶，消下啲油膩。

台式風味， 裝修簡約特別， 清靜優雅， 大眾化嘅價錢， 又一個家聚好去處。晚餐精選連香菇肉燥飯及飲品花膠雲腿雞鍋 $70， 香葉三杯雞鍋 $60， 山楂鳳梨雞球 $55。價錢同口味都好適合香港人。 三杯雞是江西寧都的傳統名菜，它的來歷與民族英雄文天祥有關，是八大菜系之一贛菜的一道經典製作。此店三杯雞這道菜色澤醬紅、原汁原味，色香味俱全， 值得一試。我對店舖啲要求， 地方環境一定要整齊清潔。有時繁忙嘅工作後想找一個清淨少少， 舒適嘅地方， 同家人閑談， 輕輕鬆鬆吃一餐飯， 又唔需要洗好多錢， 此店正合朕意。

相約親友到台式料理聚餐，餐廳食物選擇不多，但勝在有台式基本特色料理。紅燒牛肉湯麵 $53: 食材包括牛𦟌數塊、滷水蛋、豆角、湯麵，整體只屬一般，欠缺鮮味。小食手搖脆雞翼 (跟餐+$21): 四隻雞翼其中有兩隻雞翼很難咀嚼，估計雞翼在烹炸時或在調校脆漿方面欠缺掌握，令脆漿變硬，油份重之餘，雞翼本身沒有調味亦是一大問題!凍蜂蜜紅茶 (跟餐): 紅茶味一般。高雄蔥香肉排飯 $49: 肉排過油，調味不足! 香菇肉燥飯包括肉燥、豆角、滷水蛋及白飯，飯的溫度不夠熱，肉燥味道一般。 熱蜂蜜紅茶(跟餐): 紅茶味一般，只因蜂蜜帶動甜味，令飲品有合格水平。花雕蜂蜜豬肉排飯 $57 : 有蜜桃、青椒、蕃茄、紫洋蔥等材料。豬肉稔身，只有蜂蜜味道，整體賣相不錯，是開胃菜餚。白飯的溫度不夠熱，飯的質感像是保溫了很長時間的模樣。熱柚子蜜(跟餐+$3): 水溫夠熱，有少許柚子皮，合格。花膠雲腿雞鍋飯 $70 (套餐包括香菇肉燥飯及凍蜂蜜紅茶): 雞肉份量多，肉質稔身; 湯的味道不錯，有雲腿香味，算是比較好的菜餚。總括而言，單就食物水準，仍有很大進步空間，台式風味的料理功架欠奉，性價比低於應有水平

係呢頭做完野有d肚餓就入咗去食，台式餐廳來講食物選擇都正常，而且套餐可以選擇配滷肉飯/菜飯/麵。所以我就揀咗嗰個鹽酥雞麵！鹽酥雞即叫即炸所以好香脆，但粉漿較厚，雖然有九層塔但係無咩香味，但都算大件抵食嘅～

星期六下晝遇啱落大雨，冇咩心機出去搵食，於是嚟咗屋企附近嘅一間台式餐廳食午餐。大角咀一向食肆多，要立足都唔係易事，一葉勝在價錢唔貴而且水準平穩。就算係星期六嘅下晝都唔使等太耐位，今次叫咗兩個餐，分別係煎蓮藕餅同埋高雄蔥香肉排，兩個餐都跟免費嘅蜂蜜紅茶。個人比較推薦肉排，煎得夠香亦夠熱，亦都夠鬆化，而蓮藕餅雖然香口，但係就比較油。午市套餐可以選擇肉燥飯或者菜飯，肉燥香口，送飯一流。另外侍應係百忙之中亦保持基本禮貌，係同價位嘅餐廳來講算係少有。