三寶勝上海美食

营业中

休息中

✔️鮮肉小籠包(五隻) $36客人可以在店內清楚望到老師傅做小籠包的過程而且是即叫即蒸，所以非常新鮮小籠包的皮不會過薄或過厚，咬下去鮮甜的肉汁爆發😍非常推薦💯.✔️時菜獅子頭 (連飲品+兩個白飯) $50這是午時的套餐，一碟餸足夠兩人分享這款有肉有菜的款很得我這些健康人士(自稱)的歡心😂獅子頭做的夠結實，不會在煮的時間散開配上的獨有醬汁富上海風味🤤.✔️豆沙鍋餅 $40誰人不愛做外脆內軟！同時又吃不到一滴油，可見廚師功駕真的很高夾層中的豆沙香而不甜膩，不過分量可以再多點😋吃完甜點便為這餐上海菜畫上完美句號🤗.📍三寶勝上海美食大埔大埔南盛街12號地下instagram : sharingms

平民上海菜之選南盛街呢一兩年多左好餐廳, 不過我個人都幾念舊, 都係鐘意d傳統野! 😛 呢間上海菜雖然無精緻嘅裝修, 連menu都係簡簡單單, 不過就多左幾分街坊小店嘅感覺!小籠包熱辣辣, 皮不算太薄, 不過勝在多汁, 味道也不錯! 麻婆豆腐夠香口, 味道濃濃的, 如果喜歡食辣嘅朋友可能會覺得唔夠辣! 不過送飯食又真係一流配搭!!回鍋肉味道都唔錯啊, 也是少少辣, 略嫌肉少咗啲啲!而家呢啲老店已經越來越少, 雖然唔係話十級好食, 不過仍然會繼續幫襯嘅, 支持小店!

本身搭枱，一入去坐低無幾耐就叫人轉枱。d野食黎到，都未聽清楚黎左d乜餸，就話客人做咩唔應！快子都未放低，就想收人野，話未得，仲叫人快d食埋佢！家陣本客人無俾錢食飯呀？食得慢都趕人走咁！總之唔係個別小二問題，係成間野服務都好差，俾錢入去受氣。以為服務差姐，排長龍可能因為好好食啦，點知d野普通都講唔上。小籠包皮厚汁少，肉又無味客飯菜心炒牛肉： 牛肉似豬肉醉雞例牌： 雪雞雪到肉都霉都算，又無杞子甜味鱔炒兩面黃正常，少鱔紅油抄手，d肉無味到唔知自己食左乜總之完全唔明點解會有人排隊幫襯啦，倒錢落海咁！以後都唔會食！

大埔一間非常唔起眼嘅上海食館餐館，店員告知，小店已開了有10年。但附近街坊，未必知道它的存在，原因是這小店沒有豪華裝修，門面亦十分不起眼。這次發現小店，是因為朋友介紹。「上海菜肉雲吞麵」上海雲吞大大隻，一共五隻。不過餡料比坊間一般餐廳少了一半。上海麵方面，正常。湯底啱我口味，唔會勁味精。價錢方便不是大埔區最便宜，不過份量就大大碗。我本來是堂食的，冇諗過等了25分鐘，我的麵還未上枱。由於趕時間關係，最後只好買走。看過其他食評，有好幾道菜評價都不俗，我會再來幫襯的，不過要找找不趕時間的日子。*餐廳沒有BB櫈提供。

此店在大埔區多年，服務一向可以接受，食物價錢大眾化，食物味道尚可。 本為地道食肆，沒有什麼服務可要求，但今天遇上一位態度甚差的服務員，這位亞姐非常不禮貌， 進入店鋪時她已吩咐要坐埋一邊， 明白他們位置不多 ，要做生意有這樣的要求也可以理解，但她的態度實在太差， 令人難以接受，店內的客人也 愕然。 最後，我們沒有吃東西便離開。她更大聲以難聽的說話送客。 這區沒有其他上海店鋪， 這次遭遇叫我們不會再惠顧這店鋪， 實有（雙輸）的感覺

出開大埔拎野,大埔多野食到我都唔知食乜好,咁岩行過大幫舊墟見到呢間無裝修既平民上海菜門口有位師傅包小籠包,入去望一望份菜單,價錢合理就坐低。叫左半隻雲吞雞,回鍋肉炒年糕,酸辣湯,小籠包。雲吞雞一百蚊唔洗,估唔到咁足料。半隻雞,大大粒雲吞約10粒,湯底稍稍偏咸,不錯回鍋肉炒年糕望落好油,回鍋肉好薄,但味道不俗酸辣湯好有驚喜,夠酸夠辣,唔似坊間一D酸辣湯咁唔上唔落,有豬肚絲,加分小籠包睇住師傅即包即蒸,有汁,皮唔算厚值得大讚係所有菜都熱辣辣咁上!非常難得

上海菜俾人嘅印象一向都係好甜又或者好酸，但今日試過呢間餐廳嘅上海菜反而令我好受落，帶咗兩個盒飯套餐，回鍋肉同獅子頭。佢個回鍋肉好有鑊氣，用嘅五花腩食落去肥而不膩，又唔鹹，送飯啱啱好。另外獅子頭亦都好軟熟，完全唔似其他上海舖咁硬身，同時間亦都用菜包圍住好靚。最重要一樣就係兩個客飯套餐包兩碗白飯，可以揀要湯或豆漿，兩個人埋單都係只係$111，除翻開每人都係五十幾，晚市都算係咁啦。

今日又到大埔做嘢喇，開工前梗係要食飽個肚啦，突然間想食上海菜，上開飯網一搵呢間三寶勝係附近，就黎試下啦。舖頭門面比較舊，有少許老牌上海餐館feel，可能因為午市剛剛過，餐廳只得幾個客人。午市客飯一律45蚊，包兩碗飯及例湯/豆漿，非常抵食。今日叫咗紅燒豆腐客飯，有別於一般餐廳食到嘅紅燒豆腐，呢度用嘅豆腐係白豆腐，唔係油豆腐，配料有雲耳，肉片及筍。紅燒豆腐味道夠濃，配飯食一流，白豆腐雖然無咁香口，但較健康及滑，而份量亦多，絕對足夠食晒兩碗飯，唔駛驚有飯無餸。凍豆漿豆味濃郁，亦唔會太甜，食飽後飲返杯份外醒神。

六月尾裝修完之後第一次黎。呢間可以話係我家的飯堂，媽咪唔想煮或者想出街食下飯多數都會黎呢間食。幾乎次次都係點小籠包、排骨菜飯同上海粗炒。小籠包次次都好有水準，皮薄餡靚，肉汁又夠多。排骨菜飯我地次次都係跟例湯，任飲唔嬲且冇味精，啱哂鍾意飲湯嘅人士。排骨菜飯真係必點，排骨酥香，菜飯又正，推介！上海粗炒就好大碟頭，好抵食！呢間可以話係大埔數一數二上海菜食店。

無飯家庭，三餐在外覓食是常識吧！呢晚顆同身邊隻肥野，行到去南盛街視察環境，最後決定今晚要黎返個上海風味晚餐。推門而入，餐廳係一貫傳統上海館風格，店子小小，但五臟俱全。點左兩個晚餐套餐，包一餸、2碗飯，湯或豆漿(細)。豆漿淡身，無咩豆味，也唔甜，整體係淡。「銀芽三絲」：有芽菜、火腿絲，雞絲。芽菜爽口，雞絲亦夠入味，整個餸幾夠鑊氣，味道不錯。「乾炒四季豆」：呢個餸少辣，屬甜身的四季豆配香辣肉茉(肉碎)好惹味，送飯一流。餸比較細碟，如果食量比較大就可能要再叫小食，服務就一般般, 但整體還是滿意。

是晚同屋企人走到大埔舊墟搵食, 揀咗呢間小店食上海菜因為係小店, 所以都企咗响間外等咗一陣先有位, 好彩夜晚唔算太熱, 係門外條路窄等位就麻煩啲啲4人叫咗唔係好多:小籠包每籠有5個, 皮好薄肉汁多, 見住師父包完即蒸, 好新鮮 只係$9x, 但雲吞有成10大粒, 雞有半隻, 都幾大隻而且肉好滑, 湯底略為咸咗啲啲, 但都好好味唔多食鱔的我, 都好buy呢個鱔糊, 用銀芽炒, 好香又好爽口, 同鱔糊超夾人人嚟都點回鍋肉, 我哋點咗回鍋肉炒年糕, 年糕煙靱, 回鍋肉好香, 微辣, 睇落好油但食落又唔覺喎, 果然係必點另外亦點了銀絲卷&鍋貼, 兩樣都係即叫即炸&煎, 熱辣辣~小店裝修欠奉, 座位唔多, 但人情味濃, 真係值得一試再試

平民上海店, 大埔墟 晚飯入黎緊係食回鍋肉飯, 肉唔痴牙已經羸哂, 40幾蚊又想食好野, 真係得番呢格。數落大埔墟有邊間食肉唔痴牙, 真係唸唔到有邊度剩。小店生意服務態度 有咩好討論, 食飽就好走啦, 你估5星級酒店咩,未玩啦。

服務態度其差，下午6點到，無客人還迫搭枱都算啦！落單寫錯價錢，客人問清楚啫，又唔道歉，仲話佢地睇得明就可以，唔係俾客人睇既。客人只想清清楚楚唔想埋單才有爭拗。他們還不認為是侍應有錯，仲話客人有問題。錯就要認啦！食物味道一般，無賣相可言，環境衛生一般。食物又唔好食，我點解來食野仲要受氣，這是街坊生意應有態度嗎！  今時今日既服務態度 差差差，你好彩，成個大埔得你呢間上海店。你大哂啦！

叫左籠小籠包，d皮又漿又厚服務態度又差，四個人食，叫左個豬扒菜飯，再叫兩碟餸送四個飯，但服務員好似唔想俾果四個飯你咁，係咁望住你食唔食得哂咁，碟頭細又油食物質素差，又加價，服務差，唔會再去食。

今晚向大埔都唔知食乜好，所以周圍行下揀下，見到有上海舖，我地都冇耐冇食過上海野，就入去試下。推門見到枱數量不多，是小店，有點家庭feel。有1位阿姐好熱情遞上餐牌和茶，叫我慢慢看揀下食乜。我揀左黃魚客飯、回鍋肉客飯和脆春卷，脆春卷係牆上寫住的推介小食之一，所以叫了1客。每個客飯係配2碗飯加1碗湯/1杯豆漿，我揀左湯因為今晚是冬瓜湯。冬瓜湯是連皮煲，有黃豆和豬排骨，因為我見到肉連住軟骨，味不太咸，湯好熱，應該冇味精，因為飯後唔覺口渴。正！脆春卷是即炸，好熱，辣到個咀了！不過好好食，皮脆，內有椰菜絲丶少少肉絲。黃魚煎得不夠脆，魚肉都新鮮，個汁係可以，但煎得唔脆真係有少少失望。回鍋肉帶少辣，肉片好薄所以有肥的部分變得爽了，有薄切豆腐乾片，椰菜丶西椒片，味道不會過咸係一流，送飯更加正！飯亦都要讚，雖然可能不夠飯香，但是夠熱。下次想試小籠飽和鍋貼，因為見到師傅親手挨饅頭，又見到煎緊鍋貼，好似好正。