丼丼屋 (荷里活廣場)

营业中

休息中

平日怕熱氣唔係好敢食炸物，不過呢個炸豬排就真係好得，就算要飲多2杯涼茶都要嚟食。豬排炸得好鬆化，吉列外殼係冇油嘅感覺，豬排炸得啱啱好，一d都唔實，好冧好易食，加埋被滑蛋和汁一齊食，味道好好。而且仲有菜沙律和麵鼓湯，成了我豐富的晚餐。

丼丼屋~總有一間係左近！係囉，唔知點解我去開既地方都見到佢其實佢既食物都唔差，但個人認為定價又唔算平喎雖然我為食，但都會睇下價錢值唔值得既不過都會去食下，如果唔得，下次都免不過丼丼屋既吉列炸蠔定食我每次必點大約百幾蚊賣相又唔錯椰菜絲白飯任加（不過食得幾多丫）有個麵豉湯最正係個主菜，不過飲品要另外點先有睇到就會想食，正又正過，好食又好過平時既放題廣島蠔炸得好香脆，外脆內香又多汁味道恰當，唔會好鹹，好好食椰菜絲亦新鮮爽脆邊係我會返食的一款

丼丼屋其實都食過好多次，但我每次黎差唔多十次有九次都會食佢既十勝豚丼，細size 有4塊肉，大既有6塊，每次都會叫定食，比較抵（大 size $123)塊肉食落有啲似豬肉乾果種感覺，雖則每塊肉瘦的位置較多，但個邊位比較肥，咬落有啲肥油咇岀黎真係好香，食落又唔會漏，加埋個燒汁真係正到不得了，我仲要叫佢加多啲汁添xD跟餐沙律配醋汁好醒胃。今日跟餐加$28蚊有份魚生，魚生都好新鮮。另外叫左個滑蛋雞定食，$75其實都幾抵，滑蛋都唔錯，不過啲雞比較淡，無論如何，我既最愛都係豚肉飯

今天一個人食飯,又不想食快餐,決定挑選我自己喜歡的日式菜式。因為一個人的關係,所以也很容易找到位子,二話不說已經很快看完餐單。決定豪豪地...點了一個特上盛大蝦海鮮丼定食(約$140)因為是定食的關係,所以也配有前菜和湯。這個海鮮定食的海鮮份量想不到也幾多,二個大大隻的海蝦。仲有厚身的刺身,完全滿足到我味蕾。刺身也夠新鮮,食下去也夠鮮甜味美,加上也有帶子和吞拿魚,款式也很多,不會覺得沉悶。而飯也是用珍珠米,粒粒飽滿剔透,所以口感也很軟身芳香,雖然這餐飯並不算便宜,但是用料豐富,刺身也夠新鮮,也值回票價吧!

次次黎丼丼屋都係食魚生飯魚生都算新鮮肥美性價比高今次點左個每日限定既九兵衛三文魚魚子親子丼本身唔太餓怕食唔晒落order時希望可以少飯點知店員話唔得唔可以改餐入面任何既野即時O左咀未試過有餐廳reject我少飯呢間真係第一次上黎open rice睇返原來係「咪0徒野飯店」鼓勵人原頭減廢但係又唔實行。。。希望佢地檢討下發生左咩事餐送到上黎女仔食黎講算多飯但同時都好多魚生有兩片大根同麵鼓湯味道OK，魚生新鮮，自己加少少鼓油吊味，十分出色係飯多左D，不過我都照食晒佢

特上盛大蝦海鮮丼, 賣相很好!隻蝦蝦好大隻..心心眼!大蝦的中間部份已脫殼, 方便進食, 味道鮮甜~刺身整體新鮮, 帆立貝尚算厚切~正餐外, 仲有甜品供選~味道正常唔太特別~

係荷里活冇咩選擇，見倒有間日本野就去左試下。見好耐冇食刺身飯啦😋 依個特上盛大蝦海鮮丼賣相都幾吸了！好大隻甜蝦好鮮甜呀😍😍 三文魚同帶子都好新鮮，呑拿魚就薄左d啦.... 不過三文魚子冇腥味👍🏻👍🏻唔錯！下面d飯都幾好味！軟硬度適中！

今日dinner時間有人陪食飯，去左鑽石山荷里活廣場，因為有免費泊車！我地本來來食某間手打烏冬，但等位等太耐！咁就去第二間食，咁諗住邊行邊搵啦！咁就經過丼丼屋！見佢無咩人等位，咁就㩒左飛先！點知等兩張就到！超快！叫左兩個丼食！

唔記得幾耐之前就食過，覺得麻麻，之後一直都無再食。今日帶婆婆食飯，唔知食乜好，又無乜選擇，為有俾多次機會你。星期六日食晚飯都係要等位𠺢喇！等左約2-30分鐘，終於有位。好在呢度地方大，都坐得舒服的，限時90分鐘。一人叫左一個餐。我個係十勝豚丼，叫大size可以share啲肉俾佢地。以為名物會好正啦，點知期望過高，都係有啲鞋，丫婆食唔到，牙無乜力。好在有啲肥肉搭救，先不至於咁差。個飯（珍珠米）加埋啲燒汁，好配角比主角出色！另外叫左豚肉串咖哩飯。又伋個汁好果味，而且豚肉串啲豬肉好似仲好食過我嗰個不過佢唔係成條都係肉，肉與肉之間仲有啲大蔥。肉的份量少。丫婆個鹽燒燒鯖魚就有半條魚。食慣新鮮海魚的丫婆當然唔滿足啦話佢鞋。。。算喇，都係唔好再試喇，咁的價錢，應該有比佢仲好的

午市等左20分鐘先有位。鹽味炸雞扒溫泉蛋定食，丼面頭有溫泉蛋加少少蔥粒，味道一般冇特別。雞扒炸完唔算乾，但肉質已經keep唔到滑，食兩件覺得幾好食，再食已經覺得飽滯，成塊雞皮同肥膏，唔想再食落去。眼見小小的飯碗逼滿左雞扒令人好無耐。肉的成份太多，零蔬菜，成個Set只有前菜少量沙律。73蚊加埋一80蚊，一個字貴。丼丼屋只能做到標準的款式同味道，無驚喜。

點解嘅？明明叫咗海膽三文魚子飯，餐牌有圖為証，仲話每日只提供30份，咁珍貴，點解會俾我喺晚餐時間都點到嘅？點解這些機會會屬於我嘅？當個飯擺係眼前時，真相大白！我從來唔知道，原來海膽飯係可以咁難食，點解海膽會有豆腐干嘅質地和口感，而味道卻比豆腐干差很遠！一點海膽味都沒有！再者，碗飯超鹹，簡直係又濕又鹹，整體上令人百分失望！平日很喜歡食這裡的魚生飯，但是這個所謂嘅海膽飯，就一定一定一定......唔會再試！！！

鑽石山廣場可以揀既食店唔多，今次試哩間專門食飯既店。睇過餐牌，發現價錢唔平，就揀左算最抵同埋自己都中意食既滑蛋雞飯！朋友揀左泡菜牛肉飯！滑蛋飯好水汪汪，並唔係半熟蛋既質感，而且無味醂既香甜味，米飯俾d好稀既汁攪到濕立立，並無想像中咁好食😫最嬲係朋友個飯，等左45分鐘先黎到，牛肉韌到咬唔開，泡菜味無特別。以佢既價錢，加上服務員黑面既態度，應該唔會有下次😫

今期有款“期間限定”的海膽三文魚子丼”，真心期間限定黎左幾次都賣晒冇得食 :-( 皆因每日限量發售，一場黎到冇得食，再花團錦簇的店外宣傳牌同枱上大大張的推廣餐牌都Meaningless...今次專程下午5：45入座誓要食到，向店員查詢後，女店員黑面強調3次“要6點後才供應”，看來很重要。6點正才能下單… 入正題：這個飯$98 連黃蘿蔔和麵豉湯，前菜沒特別，最驚喜還是丼裡的海膽和三文魚子份量十足！海膽真正新鮮肉厚，無出水，值得一讚！飯和三文魚子經過調味，令整個丼都偏咸了。另外，可惜飯量太少了，連不算大食的友人都嫌太少太少。這個售價兼期間限定值得再試！不過荷里活店的服務一般，太陽西鈄又拉開簾，店員都圍著傾計，只有一名男店員主動服待，為我們點單加水。

同媽咪一齊都想食炸豬扒，所以就黎左丼丼屋。叫左咖喱豬扒定食同滑蛋豬扒定食，定食係跟麵豉湯，小食同沙律，比單點貴十幾蚊。麵豉湯味道一般，沙律跟醋汁，食落幾開胃。小食係凍八爪魚同酸瓜。滑蛋豬份量幾大，豬扒好厚切幾juicy，炸得脆皮亦唔厚，蛋汁亦好足👍豬扒肥瘦適中，容易咬開👍咖哩是唔辣既日式咖哩。雖然係公眾假期，但待應服務態度都好好，食物水準亦唔錯，份量夠飽，必會再黎！

今夜，與一位久別重逢的友人小聚。我們不約而同選擇了這間日本餐廳。我們點了番茄醬芝士焗肉丸，咖哩吉列豬扒烏冬，辛辣番茄牛肉鍋定食。先說肉丸，與subway所食的肉丸差不多，芝士好有un度，可以拉到好長，對於芝士迷來說，可以說是必食之選。至於烏冬，咖哩湯底好濃味，偏向咸，仲食得出有番茄味，烏冬好粗，落足料，豬扒同梅林既質素差不多☺😍。最後，個鍋真系好辣，我食到出唒汗！食得辣既人先好點！😵