仙葉

营业中

休息中

是日lunch來吃台灣野。我專登點了麻辣鴨血竹笙新竹米粉， 因為外面比較少吃得到，同事點了鹽酥雞扒飯，配台式奶茶。麻辣湯底比較清淡， 跟我想像中的台式麻辣有點距離，不過整體味道算不錯，有後勁，竹笙好鮮， 索滿汁食最正，喜歡新竹米粉幼身。因為沒有肉， 所以覺得久不久食都唔錯， 冇咁有負擔。同事請了我吃一件鹽酥雞扒， 好大一塊， 肉質軟嫩，味道唔會太咸， 男生吃一定夠飽。台式奶茶偏甜，不是我所好，只是想不到選什麼才點。

今日來科學園呢邊探朋友順便食飯，今日想食台式料理就嚟食呢間下午茶，40幾蚊個餐都幾抵食芝士海苔肉鬆蛋卷餅配迷你香菇肉燥米粉：蛋卷餅質感比較黏，好難切，味道唔錯不過如果可以將海苔同肉鬆夾喺裏面再加番啲醬汁會比較好，芝士太硬，冇拉絲效果；肉燥幾香，份量足夠，唔會太鹹，米粉軟硬適中巨人鹽酥雞扒配迷你田園沙律及炸地瓜條：雞扒炸到好香脆，好厚身好大塊，粉漿厚度適中，內裏肉質嫩滑；沙律新鮮，配咗胡麻醬好開胃；炸地瓜條香脆，如果配埋醬汁就更好

食豬軟骨飯多數都喺日式店食嘅，仲要係豬軟骨拉麵添，好少有飯嘅。今日唔知點解心血來潮嚟咗呢間台式餐廳仙葉，仲要唔係食台灣牛肉麵，而係點咗佢個豬軟骨肉操飯，係咪好奇怪呢。一開始我都覺得淨係想試吓佢好唔好味咁啦，點知食落去第一啖仲有好香濃嘅豬軟骨味，啲豬軟骨用滷水浸過好入味，同埋鐘數都夠，冇令到我對佢失望。另外試咗佢杯配餐嘅珍珠奶茶，茶味好香濃，珍珠又够煙韌，一杯配餐嘅珍珠奶茶都可以做到呢個水準，而且只不過係套餐價錢再加多$5嘅啫，真心有誠意，飲完唔使再去出邊歇腳亭買多杯珍珠奶茶喇！

🧀芝士奶提武夷大紅袍 $38 走甜走冰 (1/10)揀左茶入面最貴嘅武夷大紅袍，都抱有少少期望，點香濃法。一飲茶味勁淡，冇大紅袍嘅香同回甘，去便利店買一支仲濃味過呢杯野😂芝士好稠身，係好淡芝士味，同埋超級鹹，成杯嘢都勁伏勁難飲😵‍💫推薦指數: 0/10不可一不可再，向仙葉茶飲永久說不😂之前食過午餐都一樣好難食，珍珠奶茶勁甜，真心唔好中伏！

已光顧多次，唯獨夜晚未試過嚟幫襯，今日無啦啦心血來潮同老婆一齊嚟食佢夜晚小炒，點左個黄金酸菜魚，原本諗住過下口癮，因為老婆突然之間話想食酸辣嘢，所以就諗起呢個酸菜魚喇。點知呢，真係令我哋估佢唔到， $85個酸菜魚小菜，賣相已經有7分啦。先夾1塊俾我老婆食，佢竟然同我講話啲魚好滑好嫩，太美味。見佢咁樣咁描述，我都終於忍唔住夾起一塊嚟食，點知一擺落口呢，先唔好講塊魚有幾好食，就個味道已經太過獨特美味，係我鐘意嘅口味。真估唔到喺科學園呢個美食沙漠都可以俾我挖掘到咁好味嘅酸菜魚，太興奮之際即刻寫返個食評留返低個comment當打卡先啦！

之前聽店員講過話呢段時間會轉新餐牌，今日經過終於見到佢轉新餐牌啦，而且仲要有我最鍾意食嘅台灣麻辣鴨血。加台灣兩個字係有原因嘅，因為問店員佢哋嘅鴨血係台灣空運過嚟㗎，所以非常之地道正宗，配埋獨有嘅竹笙同新竹米粉，味道十分之夾，真係有去台灣食一碗麻辣鴨血嘅感覺。所以，我今日真係非常非常之感動。點解？因為疫情已經持續左兩年啦，四周圍都冇得去，我最鍾意食嘅日本餐同埋台灣菜一直都食唔到正宗㗎，而家可以唔使出國就可以喺香港呢個寸金尺土嘅地方品嚐到地道正宗嘅台灣料理。真係要極力推介呢個鴨血米粉，冬天食完又暖胃又飽肚，誠意之作！

已經係我第二次光顧呢間小店喇，今次嚟到嘢食依然沒有令我失望，仲要好高質。首先我點左一個雞扒麵，雞扒好大塊牛骨湯都好濃郁好入味，所以我唔單止麵都食晒，連湯都飲埋。然之後我再點多個小食嘅肉鬆蛋餅，入面好足料啊，有雞蛋芝士火腿仲有肉鬆tim, 食落去有好香嘅蛋味同埋餅味，所以忍唔住都係叫多一個外賣返去俾小朋友食。最後我同我老婆再點多一個糖水，因為喺電視上面見到佢哋嘅糖水係每日新鮮做嘅手工芋圓，所以就想試一試佢哋嘅手工芋圓同出面有咩唔同。真係唔試唔知，芋圓好煙人不單只仲要好香芋頭味，有三隻顏色分別係紫薯地瓜同埋芋頭味每一隻都好有特色。呢間餐廳如果有10分我一定會比10分，因為呢個價錢真係比到咁嘅質素我，我哋食得好滿意

不明黑色毛发在牛腩面里面，整块牛筋上面粘了好多黑色毛发，一开始以为是人的眉毛，跟柜台反映后，他们只是说会告诉厨房，但是一直没有给一个合理的说法或者补偿。强烈谴责。科学园本来可以选择的就不多，之前几次吃他们家的面还不错，虽然每次来大部分时间都需要排队才可以下单并有位置，所以今天选择了在自己生日当天来这里吃面，但是万万没有想到，吃的是毛发面整个人都感觉不好了！不知道发这个帖子能不能让多人看到，能不能得到合理的解释。

踩完單車過來食呢間叫做仙葉嘅餐廳，就咁睇個名以為淨係賣茶，原來呢間野嘅選擇係咁豐富嘅，真係有少少驚喜。呢間餐廳主打台灣牛肉麵，黑糖珍珠奶茶，仲有佢哋嘅多款特色芋圓糖水，同埋好強調無論係牛肉麵，黑糖，珍珠，芋圓，仙草，全部都係手工野。我諗既然係手工野，咁價錢就一定貴啦。但係埋去睇個餐牌先知價錢都算合理，一個套餐賣六十幾$70 ，喺科學園呢片區域都算係親民價。不過我同班friend今日嚟食，我淨係嗌咗咖喱牛腩飯，因為本身唔係好肚餓，諗住求其嗌一個平啲嘅餐試吓，估唔到又俾咗我另一個驚喜，因為佢哋嘅咖喱雖然唔係主打但係個味道真係我試過咁多咖喱之中非常之獨特嘅，好明顯同出邊係唔同，而且份量都好足，一開始我班friend笑我嚟到呢間餐廳點咖喱飯，但係試過之後完全冇後悔囉。

食麵最緊要夠熱、麵有咬口，都做到。豬頸肉同湯底普通。不過如果要張紙巾抺嘢要收五蚊，首先要解決餐具們滿滿嘅油漬，唔係點飲個湯好呢？（望實廿分鐘都唔乾推斷係油漬，嚟食麵或要自備飲管）

平時返科學園開會，久唔久嚟呢間餐廳食飯，味道過得去，今日同幾位同事中午嚟食飯，竟然有驚喜，叫咗個招牌鹽酥大雞扒湯麵，個湯俾之前好飲咗，雞扒俾之前更香脆，我諗應該換咗廚師，一位同事讚豬頸肉好食而另一位同事就叫咗Lunch套餐A餐蒜香骨份量剛好，味道唔錯！飲品味道跟從前冇乜改變，餐廳入面有位光頭叔叔唔知係老闆定係樓面夥計，好好禮貌，基本客人向佢需求，都有求必應，今時今日香港好少有啲咁嘅服務態度，所以真係抵讚

前幾個月同朋友嚟過一次，覺得都OK。所以今日去開科學園，帶屋企人試吓。結果食到一肚氣。😤點左餐之後，我哋就去搵位。我去攞餐具位置嗰度攞匙羹、叉、餐刀、碗仔。攞嗰一刻我有諗過，我係咪攞錯咗人哋用過嘅餐具？！直至有位先生響我隔離，同我一樣係咁揀，然後忍唔住講咗句，「有冇搞錯呀？！啲餐具咁污糟點用呀？！」我走去同個女侍應講：「唔好意思，啲碗好污糟喎！係好多飯漬，你可唔可以攞兩隻碗仔俾我？」佢叫我自己去餐枱下面有櫃桶，響櫃桶攞。我返埋位睇完我哋張餐枱，搵埋隔離張餐枱個櫃桶，都冇碗囉！所以我不恥下問咁樣再同嗰個女侍應講：「冇碗喎！你可唔可以攞兩隻碗仔俾我呀？」佢極其不耐煩咁話：「你等等啦！等等呀！」(等佢等到啲飯都凍）我見佢洗咗兩隻碗仔擺喺出餐處，我就自己行過去拎。一睇好扯火😡，佢洗完嗰兩隻碗仔仲係好多飯漬。我同出餐處嗰位男職員講：「個碗好污糟下喎！」佢好有禮貌咁講唔好意思，立即幫我洗乾淨。餐具方面，好難揀先揀到四隻匙羹，一隻叉，但都唔係好乾淨。餐刀就真係揀唔到，把把刀都有漬。唯有我自行用水同埋紙巾清潔。之後我見到個男職員響攞餐具位置嗰度，收返晒啲餐具入去再洗過。之後啲客人就用膠嘅餐具。終於可以

抵食夾大件嘅大雞扒飯，塊雞扒勁鬆化，外脆內嫩，勁juicy。同埋杯嘢飲簡直就係神作，我叫咗一杯符碌茶，但係咁岩遇到店員研發新產品問我有冇興趣試一杯，我梗係嘍飯應啦，原本企喺隔離見到佢哋做都已經好想飲（心諗竟然會問我試唔試，感覺好似自己中咗頭獎), 真係要俾個like店員！我哋四個人總共食咗三百幾蚊，人均差唔多$70 ，消費都唔算貴，但係質素都幾高，又食得飽，所以我哋幾個都覺得幾抵食。不過如果可以有多啲位置就好喇，店内人太多，所以我哋坐咗喺岀面食。

上次11.30黎。。。排隊，再上一次記得12.30黎。。。排隊，今次已經遲左1.30黎，都係排隊，有冇搞錯呀！！！不過好彩只係等左4個字左右，野食算高質。豬扒炸得好鬆化好香，肉燥溝左冬菇（都幾dum本wor），成個餐睇落去就知唔會求祈，食得好開胃，師傅都幾有誠意，不過分量太多，真係食唔曬，建議俾少D唔好浪費，可能係因為我細食掛。。。套餐飲品係用樽裝，仲要印埋Logo, 細節位都做得好到位，對比出面D膠裝飲品會環保好多，不過成本應該都唔低（唔關我事啦），65蚊配埋樽裝茶，有冇錢賺架，哈哈哈！！！奶茶味道濃郁，仲係要走冰，所以我幾次黎都係叫跟餐奶茶，雖然仲有其它飲品選擇，但係呢杯唔知點解好似上左癮。。。每次食完個餐都要打包杯黑糖珍珠奶茶走，不過提下大家，黑糖珍珠奶茶同跟餐係有分別的（發現左呢個秘密好耐）

雞扒唔熱，炸完唔知放幾耐 拎返出黎叮肉燥啲飯又乾又硬兩條菜心淥完攤係到 整啲色水杯茉莉春尖 澀到一個點仲衰過7仔樽裝茉莉茶另外試左杯珍珠奶茶 完全粉沖 無茶味如果想試下伏既建議一試