兆禧餐廳小廚 (已結業)

經常光顧的一家茶餐廳，鄰近屯門碼頭居所，方便快捷，最愛他的早餐可以麵配搭腸粉，晚餐的小菜真心好吃。今天早上很想吃它家的腸粉，所以和老公，仔仔過來吃早餐。腸粉雖是蝦米腸，但加了混醬很出色，如果早上遲來一步，腸粉很快便賣光了。

一间普普通通的屋邨飯店，但卻有丰富的美食。星期日打完網球都喜欢到这里吃飯，因为他们的出品的確不错，沙薑雞脚也是必点的，雞脚煮的夠林，又入味，加上沙薑酱，送啤酒一流。香煎藕餅也是不少得的，蓮藕爽脆加上肉混和，煎得十分香口，小朋友都挺爱吃。菜脯涼瓜煎蛋也不錯，菜脯爽口，而涼瓜也不苦澀，送餸佳选。再者餸菜碟頭夠大又不貴。

街坊小炒，味道很好，份量大大份，唔想煮飯落街吃的不錯的選擇。 我哋一家試過早午晚三餐都喺呢間餐廳解決， 食物款式很多選擇， 早餐配搭比較多， 尤其有我最愛嘅煎腸粉同埋奶油脆豬；午餐份量很多； 晚餐一般要等好耐位， 每樣餸菜都好有鑊氣又有例湯送上。

食物份量少都算，坐又坐得迫，又唔係特別平。未食完d呀姐已經企係度眼啤啤等住你走。其實本身諗住食埋飲多枝啤酒坐多一陣就走，個呀姐夠膽死叫我地轉枱話隔離張枱廿幾人要我地張枱坐埋一齊，我地已經講明食埋就走架喇，係都要我地搬，我地都係客有幫襯你地架，駛唔駛有客等位就比面色同大聲比説話我地聽，我地頂多只係食左一個鐘多d咋，隔離中枱同我地一樣時間坐底，你又唔叫人走。我第一次食飯食到一肚氣，貼錢買難受，一句講晒唔會有下次。

見排晒隊，以為好好食，抱住期待嘅心一試，不過一試難忘，而且非常失望。金沙南味道，油浸咁，南瓜仲爽口嘅。咸豬手都勉強可以。西檸軟雞有牙都咬唔到，正確係西檸硬雞先啱。

今晚又出去搵食，平日經過屯門碼頭近海翠的兆禧餐廳，都沒有入去試過晚飯，今日就去試下。兩個人的晚餐，大家都唔算大食，點了兩碟小菜食。1. 椒鹽鮮魷：好快就來到，鮮魷好新鮮，肉質滑溜，而且又大大塊，份量好多。2. 西蘭花XO醬班塊：效率好快，點了一陣就來到，大大碟，不過西蘭花比較硬身，班塊有些腥味，不過用來送飯還可以。3. 例湯：兩個人食晚飯，餐廳都大大個例湯送給我們，老黃瓜豬滑湯，味道較鹹，我們飲湯都飲飽。

住係屯門碼頭的人一定會知道兆禧有間茶餐廳已經開左十幾廿年（我細細個亞媽都帶黎食）之前裝修當然比較簡單，係前幾年翻新左之後都係只食過早餐幾次，味道你吾可以講好好味（十幾年都係大約味道），但而家坐得舒服同乾淨，待應見果D人同細個一樣，有一點親切感。今日家庭聚會食飯，爸爸突然話想去（好過去海翠食連鎖餐廳酒家），所以一行4人8點去吃晚餐。但因為差不多滿座，只可以坐門口四人桌。餸都未叫已經有例湯送到，味精不叫很多，材料都有吾少（豬骨白菜湯），大約有6碗左右。之後我地4個人叫了3個餸，2杯凍飲（叫了小菜半價）加1個白飯。大約15分鐘已經上桌！西檸雞半隻＄78：半隻西檸雞？咁怪吾係件上咩？待應話半隻雞喎...點知上桌都係同出外一樣件上。粉多，雞肉少同少少硬，汁吾夠酸。芙蓉旦＄53：旦偏老，但材料菜類都多（唯一少左一點肉同得一隻蝦），味道夠吾咸。西蘭花班球＄66：3個餸最好味，材料多，西蘭花炒得吾錯，班球淋左少少。成餐飯都係大約＄215，吾好太高要求又有冷氣同坐得舒服，其實都抵。所以也是這餐廳十多年都係碼頭仲係度的原因。

今朝要返百厭仔間幼兒學校整嘢, 就同百厭仔返咗學校先, 跟住自己一支公食個早餐先至去學校. 見呢間兆禧餐廳都好耐無幫襯過, 而且一陣返去幼兒學校又近, 就入去囉.坐低咗一望個餐牌--早餐要$27.00. 個餐牌嘅選擇仲要同N年前一樣, 好似好多嘢揀, 但味道就千篇一律. 算啦! 心諗雖然貴啲, 可能會比以前好食呢! 蛋治--OK啦, 不過不失. 豬頸肉米線--唔得! 米線過"林, 豬頸肉又鞋又韌, 難食! 奶茶--還可以

誤打誤撞入左黎呢間野, 見無乜人,坐得都叫舒服. 叫左3個餸, 原來係惡夢開始 例湯 - 免費送既, 成個大煲上, 以為好扺, 點之飲落係溝左水O既湯一樣, 無味. 即刻叫佢羅走菜膽雞 - 唔係介菜膽, 都算, D 雞又老又鞋, 差薑蔥魚雲 - 算OK, 無乜特別海皇豆腐煲- 可以改名叫豆腐魷魚煲, 成煲野無黎鑊氣, 好似番叮咁, 淨係得一PAT 豆腐(大量汁)加大量魷魚, 2舊蝦球, 收我70元, 有無攪錯. 想搵老闆投訴, 又唔係度, 連經理都無個, 同阿姐講, 佢話唔關佢事, 我都明, 不過你可唔可以反映番比你老世聽呢? 最攪笑同個收銀講, 連佢自己都話:"呢度D豆腐係差的!". 奇怪呢間野仲可以生存到而家.埋單160元, 食左餐豬哨, 實無下次! 唔該呢間野快D汁!

一間在我心目中樣樣有的茶餐廳,今次見賭新裝修地方整潔,入內食晚飯兩口了叫了菜雞,西蘭花班球,東江三丸煲,一個白飯,一碗霸王花湯,房出品出色,有客家菜酒家功夫,比起一些連鎖酒樓出品還要好,重有鮮美,出去櫃面找數先係百三蚊,實無話可說

AUG 15, 2009 (SAT) DINNER成個星期心情已很低落的我，今天隻鸚鵡仲上咗天堂，真的好傷心！於是拿拿聲拎去安頓好，一家人去食個飯！馬拉炒通菜 $38有D特別，通菜帶甜，個碟仲有好多汁，幾大碟，都算OK！咸檸蒸烏頭 $48好多嘅黃油，唔係太重泥味！三色帶子 $48有紅蘿蔔片、西椒、西芹 & 帶子，蔬菜新鮮，西芹爽脆無渣，急凍帶子只屬一般！椒鹽肉排 $48香脆嘅肉排非常入味，個個爭住食！白灼金菇肥牛 $48清清淡淡，仲有好多銀芽浸在肉汁度幾好味！黃金蝦 $58鹹香嘅咸蛋黃炒起嚟特別野味，蝦身炒得夠乾，連殼食都OK！例湯 ~ 魚頭煲赤小豆，無味精，幾好味！4個白飯、2個米粉、2罐汽水今餐姐夫請 , 實際幾多錢真係唔係太清楚 ！ HEHE ！

AUG 3, 2009 (MON) LUNCH豉椒排骨飯 $28 配凍檸茶 +$6媽媽好想食豉椒排骨，去咗幾間都話無，終於醒起呢度應該有，就叫咗一個兩份食，因為真係好大碟，仲幾好味喎！D排骨都幾腍，獻汁剛好不會太杰，青椒仲幾爽脆添！可能天氣太焗熱，兩個人都食唔哂一碟，不過真係又大碟又好味！抵食到飛起！

呢度食早餐雖然唔算平，不過份量多，我覺得如果唔係太肚餓嘅話，真係一份兩個人食都夠，一個人食就好飽飽，夠哂滿足添！葡式餐肉粒螺絲粉 + 單拼三文治 + 餐飲 $23餐飲轉凍鮮奶只係 +$2『係枝裝維記金蓋鮮奶嚟呀！超抵！！！』火腿通粉 + 菠蘿油 + 凍檸茶（凍飲同樣 +$2） $25葡式餐肉粒螺絲粉 ~ 湯底係蕃茄湯，極濃蕃茄味，仲有好多大大粒嘅餐肉，不過食到底見到D未溶的橙色粉粒，唔知湯底係咪用滾水就咁開呢？不過都極好味！單拼三文治 ~ 我選了我最愛嘅蛋治，蛋夠滑方飽好軟！三文治唔係得半份係全份，所以超抵食，大大碗嘅螺絲粉 + 一份三文治，仲有一支鮮奶，係咪兩個人食都OK呢！不過我今日自己食一份，好滿足！嘻嘻！火腿通粉都係大大碗，不過就係普通茶餐廳咁，夠飽咁啦！但個菠蘿油就大大個，好香好軟，鮮油大大塊，好好味！檸茶一般般啦！所以我都係飲咗我最愛飲嘅鮮奶！D姐姐做嘢幾快手架，仲好好口添！抵食又OK！住得近大家都可以試吓！

偶然的機會到這裡吃晚飯，有一個菜真是驚為天人！脆皮豆腐是超超脆超超滑，是我吃過最好吃的脆皮豆腐！有時付出很多時間金錢為吃美食，原來最好的就在身邊！我覺得這個脆皮豆腐是值得專程來吃的！

20元太貴,睇真食物冇俾多你,只係配搭技巧,例如雪菜肉絲面+蛋冶+熱飲,要20元,其中蛋冶只等如係一蛋和2塊面包在市區賣雪菜肉絲面+油包+雙蛋+熱飲,都係16-18元.