南京金陵湯包 (已結業)

好難食。客飯 蝦仁炒飯 （HKD 52)  +  排骨面 （HKD 55)，食過咁多間炒飯，呢間真係難食到冇得輸。飯一來硬到痴筋，二來就冇飯味，蝦仁又炒都冇炒過，純粹撈埋一齊。飯粒硬度似膠粒，點搞...落單唔夠五分鐘就上碟飯黎，除左炒定晒係到都冇嘜其他原因。個面仲衰格，比起出前一丁唔落調味粉仲離譜。大大碗熱滾水，淥個細面餅，嘜鬼野味都整走晒。落下雞粉都唔算係好貴啫。大佬，食客唔係病人，工廠飯堂都冇整得咁難食啦。客飯已經唔算平，爛鬼炒飯雖然夠大碟，蝦仁都足料，不過點都唔值呢個價錢，最衰係難食到無朋友。煮成咁，點對得住食客，好失望，點食...

今日去京瑞廣場食Lunch，個頭都開左好多餐廳，呢間餐廳冇咩人，不過可以用8達通比錢，於是就唯有食呢間。蝦仁炒飯就幾好味，乾身，冇三洋咁多油都咁濕，不過個碟好核突，睇落份量好似好少咁，要注意這是下午茶。五香牛展麵就清清地，味道還可以，不過上海粗炒就炒到好核突，而且等左成半個鐘，催左好多次，唔知咩原因，味道都係一般。白肉就冇譚仔咁好味，而且比較厚身，同埋冇辣油係差咁D味，最好味反而係個青瓜，意外驚喜，鍋貼同抄手都不過不失。唔記得左影個湯包，因為好遲先到，而且只係一個普通的小籠包，味道冇咩特別，比佢個店名騙左。呢間店響大陸各省都好多分店，今日食完唔覺有咩特色，同一般內地食肆冇咩分別，人流唔算特別多，環境就似係茶餐廳風格。作為下午茶價錢貴左少少，我覺得炒飯同埋麵食都可以試下。

難得到石門一趟 順便在這區吃個午餐吧 平時很少到這裡嘛 見這間餐廳都幾多人幫襯應該可以吧 午餐除了粉麵 仲有飯餐⋯⋯點了這個蔥爆牛肉飯 白飯好大碗🍚飯粒都幾有口感嘅 至於蔥爆牛肉 份量都可以 牛肉和蔥各有一半 不會過多也不會過少 但味道方面 就麻麻地 覺得好咸 真係得個咸字 肉質無咩肉味 不過煮得都淋 至於蔥 都整得好淋 但無咩味道如果無咁喊 應該會好點 餐飲點了凍檸茶🍋但要加$3 感覺有點貴吧 而味道方面都係普普通通啦 仲有少少偏甜 整體嚟講 真係一般

今日同同事去開沙田石門做野，放午飯時間就去搵食，石門呢個地方都幾荒蕪，石門站附近有個商場，但都有好多店鋪未開，我地今日揀左金陵湯包醫肚，佢都有客飯同麵餐選擇。我地揀左客飯套餐，醬爆茄子同京蔥爆牛肉，配白飯，仲有飲品贈送！食物都好快上枱，醬爆茄子先黎，賣相唔錯，見到走左油，食落口都唔油，味道岩岩好，配埋白飯，食到好開胃；京蔥爆牛肉都唔錯，夠火喉，唔太咸，食材都幾新鮮下次再黎可以試下佢既湯包同鍋貼，見到其他枱都有點應該都幾好食既，哈哈！