影片
以上资料只供参考，请与餐厅确认详情
食家推介
原先諗住食醉藥雞，點知客滿要排隊等。於是走咗入去隔離間大撈家。點咗兩個大套餐：海蔘花菇蒸肉餅 及 蘿蔔花菇鮑魚撈麵 再加一個小食 配炸牛腩。小食先上，滷過嘅牛腩非常入味，唔柴又唔會太肥，非常好食，配鮑魚汁就其實得啖笑，就當冇咁熱氣，如果食得辣配麻辣汁可能會更好，又或者店家研究吓配泰式酸辣醬都應該唔錯。之後就上套餐鮑魚撈麵，賣相OK。但三樣野唔係好夾，首先汁唔夠，做唔到撈麵效果，蘿蔔只係白烚，完全冇鮑汁味，而鮑魚有兩隻，雖然都幾大隻，但都係火喉未夠，唔入味。唯一取勝係平….之後到我自己點嘅肉餅，佢係即蒸，因為等咗好耐，賣相唔錯。但一睇就知出事，我初頭諗佢嘅海蔘應該釀入去肉餅度一齊蒸，結果只係擺面，於是一食落口，又係蔘肉分離，肉餅還肉餅，海蔘還海蔘。肉餅普通唔彈牙都算，最大鑊主角海蔘俾花菇同豉油搶哂味，除咗死咸，我係一啲都feel唔到海蔘嘅存在。簡單嚟講，我只係點咗個花菇肉餅飯….時人話香港經濟差，無可否認大環境真係好麻麻，但自身問題都好重要，由入座都俾錢離開，我同家人係包場，講緊係星期六晚深水埗7點，隔離醉藥雞同文記排哂長龍，就算你冇小紅書加持，都唔會晚市連一個客都冇呀？唯一解釋就係店員問題，店內一男一女職員。由入座到埋單都只係得個女職員做野，男果個成個古惑仔咁成碌木企喺門口，聲都唔出多句，就算有人喺門口裝裝吓都係頂多講句埋邊有位就算，唔係趕客就係錢多，請著呢啲伙記真係自求多福（希望佢係老闆啦）！唯一做野果個女店員，勁後生同靚女，似讀緊書嘅學生妹，講野怕怕醜醜細細聲。作為一個時常行深水埗嘅獨男，除咗高登班濃妝豔抹嘅筆電promoter ，呢個女店員絕對秒殺成條福榮街嘅食肆，絕對係深水埗之花，選港姐物姐實贏。我係老闆一定擺佢出門口，派吓傳單講兩句肯定引唔少毒撚入去食鮑魚…唔怕生壞命，最怕改壞名。撈家？美女？鮑魚？或者因為咁原因唔敢定唔俾走上前台吧！唔好心邪，我都係下次過隔離叫雞算。
继续阅读
第二次食呢間餐廳，兩次都係食佢嘅晚飯套餐。第一次食鮑汁蘿蔔牛腩飯。本來只係諗住填肚嘅心態，食落覺得超班喎！牛腩炆得好腍，蘿蔔亦好入味同埋鮑汁亦都好清甜！佢仲送咗碗人蔘湯，味道好特別。食過第一次之後就想再試吓佢其他菜式，佢話咕嚕肉係佢地嘅招牌，一試果然無失望！唔使冰鎮咕嚕肉嘅皮都好脆口，入邊嘅豬肉肥瘦啱啱好！一個正式晚餐嘅價錢都只係50零$60仲要係feel到有用心去製作，本身想私藏呢間餐廳，但覺得小店都係幫手宣傳吓啦！唔知係老細定係職員呢？成日企喺門口招攬客人入嚟食飯，但都好似冇乜客，希望佢地頂得住啦。
继续阅读
第一次來大撈家，一入店面裝修不錯，中午十二點多店內食客只有三枱，入座後見到桌上只有刀叉匙羹，沒有筷子，要筷子就要向侍應取。見到餐牌上嘅咕嚕肉飯非常吸引，我就點了這個跟人參湯另外加了一個鮑汁拼盤。等了幾分鐘人參湯到了，味道很淡而且冇人參味。然後到鮑汁拼盤上枱，蘿蔔冇味，鴨腳腳趾頭有兩隻黑咗色的🤢豬手好硬完全唔淋，食唔到😵💫，豬腸太淋了完全冇咬口，整個拼盤味道都好淡味。隔離枱男士見我食豬手，佢點了個豬手飯，偷偷望到佢，佢咬豬手都係好費勁，最後佢個飯只係食咗一半都冇就冇食了。隔了十分鐘，咕嚕肉飯終於上菜，沒有菠蘿只有一小塊青椒，黃椒，和紅椒，咕嚕肉外層非常脆，食第一舊以為裏面全部肥膏好淋，第二舊咬開一半，發覺裏面有肉但係都係非常之淋，冇肉嘅質感。埋單後去個洗手間，佢哋係男女共用一個廁所，入到廁所入面聞到好臭🤢，嗰種尿味好難聞🤮，應該要兩三個鐘要清潔一下洗手間，特別係男女共用嘅洗手間！留多一秒都會想嘔返個餐出嚟🤮！餐廳門面裝修幾靚都好，但廁所真係要勤力啲密啲搞搞衛生。隔離枱走了，店員用噴壺噴枱面然後抹枱，這樣噴其實會影響隔離枱的食客，食客食完或食緊都係會影響到！如果一定要用噴壺入面嘅東西抹枱，攞布抹枱時，噴落布再行過張枱抹唔係會更好咩！店員見到食客埋完單行緊出店，都唔會講多謝哂，拜拜，下次再光臨等等說話，應該是我要求太高。唔講食品質素，而家香港服務業員工都係咁差，咁冇禮貌，基本禮貌說話都唔講，笑容都冇，點樣令你餐廳有回頭客，莫講話令香港人在港消費。試過一次就算。
继续阅读
今日去深水埗辦年貨，本來諗住順便食車仔麵，但實在太多人。見到隔離開咗間小店，有花膠同佛跳牆，但價錢一啲都唔貴。二話不說就入去試吓。我哋兩個人叫咗兩個套餐，分別係海參蒸水蛋同海參冬菇蒸肉餅，仲配埋個人蔘湯。另外朋友追加$98有一個紅燒湯翅。食物應該係即叫即做，所以要等5至10分鐘，感覺店主對食材有要求。海參蒸水蛋亦唔少海參，蒸肉餅啲冬菇都好大粒，好味之餘，覺得店主對食物亦都有要求。追加嘅紅燒湯翅，有水準$98好抵°另外環境乾淨企理，店員亦有禮可親。依家呢啲傳統中華美食店，買少見少，肯定會多啲嚟幫襯。
继续阅读
📍 大撈家 (深水埗)深水埗福榮街101號地舖大撈家價格相對較經濟實惠，適合廣大消費者品嚐，同時滿足了人們對海味的渴望。如果你想品嚐豪華海鮮的口感，大撈家是一個不錯的選擇。👉 招牌咕嚕肉飯 跟 可樂💰$62😋😋😋😋.8/5招牌咕嚕肉飯絕對是一道令人垂涎三尺的美食。首先，咕嚕肉的肉質非常嫩滑，完全入口即化。肉片上的醬汁濃郁香濃，充滿了豐富的醬油和五香味道，令人回味無窮。米飯吸收了咕嚕肉醬汁的風味，使整道客飯更加美味。👉 花菇拼鮑魚飯 跟 可樂💰$62😋😋😋😋.7/5鮑魚的質量非常出色，口感鮮嫩，彈牙有嚼勁。它與花菇的搭配非常契合，花菇的香氣與鮑魚的鮮味相得益彰。米飯與鮑魚和花菇的搭配非常完美，米飯吸收了鮑魚和花菇的湯汁，增添了豐富的風味。👉 紅燒鮑翅💰$98😋😋😋😋.6/5紅燒鮑翅的烹飪技巧非常高超，讓鮑翅保持了彈牙的口感，而且充分吸收了紅燒醬汁的風味。質量非常出色，肉質鮮嫩，口感絲滑。紅燒醬汁濃郁香濃，帶有微妙的甜味和豐富的香料風味，完美地融合在鮑翅的肉質中。紅燒醬汁的滋味與鮑翅的口感形成了完美的平衡，令人回味無窮。回頭: Yes，三道食物各有特色，都是令人垂涎的美食。招牌咕嚕肉飯酸甜開胃，花菇拼鮑魚飯的組合完美，紅燒鮑翅則是一道奢華的佳餚。不管你選擇哪一款，都能帶給你美味的享受！
继续阅读