大統領

营业中

休息中

午餐時間黎到，叫左個生姜豚肉飯，附送面麵豉湯，前菜係中華沙律同埋有一片哈密瓜。豚肉份量幾多，最後都唔係好食得曬！不過飯就淋左d。個面豉湯有驚喜，入面仲有蜆，幾好飲。

聯和墟區內少有日本料理餐廳🇯🇵中午時份，出去聯和墟搵食，經過開見到e間日本餐廳裝修環境不錯，所以就入去試食入去見到餐牌，都比較附近其他餐廳貴少少。咁就叫左2個lunch set 定食再追加一個雞軟骨小食try try 😆定食來到賣相都相當吸引，壽司定食既壽司🍣同牛定食跟比既刺身都ok Good好食，個牛定食都整不錯小食雞軟骨都整得脆卜卜，水果都好新鮮不過如果男士去食，就可能未必夠飽，因為分量都有些偏小

我叫咗個lunch set， 價錢普遍是50至到100的之間。 最後選了鰻魚炒飯。 有跟麵豉湯， 入面仲有一隻蜆。 味道濃沃。 而鰻魚炒飯，鰻魚分量也不小， 性價比不錯。 最後78蚊就埋咗單了。

近日口淡淡冇咩胃口咁，一於寫啲日本野先。今次試下依間小店，入面得幾張枱唔算太多位，所以午餐時間多數都要併枱。唔想食生野所以叫左板燒大雞扒定食，原來都有兩小片帶子刺身，都幾香甜。前菜有中華沙津和西瓜，西瓜又大又甜!雞扒燒到個皮脆脆地食落好香口，加埋燒汁好惹味麻醬涼拌冷烏冬清涼消暑，食完涼透透!

我係呢度食好多次，水準依然無變。中午食飯最好book位，如果唔係可能要等一陣！中午時間好多人食，但上餐好快所以唔駛等好耐👍🏻Menu不時會有少少轉動，今次期間限定多咗一個火炙左口魚鰻魚丼❤️燒得好香好好味😋另外我哋仲叫咗個鰻魚飯，鰻魚燒得正，表面仲有啲脆，好香口😋另外我哋再叫咗一個大統領魚生丼，迷你五色丼加手卷😋啲魚生海膽都好新鮮。各位值得一試

上次對此店印象本來唔錯，但原來所有都係錯覺！昨日一早已打去訂晚上6:30(4人枱)，諗住帶朋友一起試日本菜，6:20分店員竟然打電話泥話叫我地一定要6:30前到，否則會取消訂枱服務！吓……唔係咁掛如果唔係响附近行緊街，基本都未必趕得切行過去拎位，ok當然我地即時趕去取位啦！去到店員安排我地坐低，我地亦好快地叫左4個餐仲有2份小食，講真份量都唔细，問題開始泥咧，最初我都無留意因為大家边食边傾，有個年纪較大嘅店員開始將我地枱上刚食完嘅空碟收起，當時係7:00佢仲問我朋友碗湯要唔要，唔要佢就拎走，我真係要發火，未試過晚反坐低半個鐘就想趕客走，你地要賺錢無所謂，米同客人講限時30分鐘囉！如果我地一早知道就一定唔會過泥食，無謂阻住你地賺錢，就算食物有幾好都係冇用，以後都唔會再泥！

粉嶺除咗d商場餐廳外，行去聯和墟果邊都有唔少好野食。今日lunch食咗咖哩吉列豬扒飯，配麵豉湯，前菜(中華沙律)，水果(蜜瓜)。幾鍾意呢度嘅咖哩，甜甜地，帶有少少辣味，倒滿半盤，撈飯超正。吉列豬扒好大塊，外面脆卜卜，內裏鬆軟，肉汁豐富。上面仲有蛋絲，紫菜絲同芝麻粒，每啖食入口都非常滋味。麵豉湯落咗蜆去煮，有股鮮甜嘅味道。中華沙律同蜜瓜為咖哩飯錦上添花。不過侍應大嬸做野麻麻地，招呼唔夠妥當，如果改善下，應該可以再吸引多d人去食。

很久沒來聯和墟，隨意找一間門面吸引的，這間外貌如日本小街一間拉麵店，即管嘗嘗。內在環境很多舊日本poster, 仿如舊式的日本小店，也蠻精緻。是次點了：黑蒜叉燒拉麵（豬骨湯底 ）咖哩吉列豬扒飯 芝士釀雞翼上菜快，大大碟，味道一流拉麵湯底香又足料； 豬扒多及脆，雞翼唔覺有芝士，但釀料足味道也不錯！實在是很不錯的小店推介

朋友介紹食物唔錯今日就試一試！粉嶺小鋪地方唔大只有10張枱，建議同朋友一齊最好致電訂枱！今日我地食午餐，雖然是星期日，因為已經2:00所以都有空枱可坐！午餐價錢都算合理，lunch set有湯，前菜+主菜，另外亦有拉麵同烏冬選擇，推介個小食炸蝦，雞泡魚乾唔錯！下次有時間會再食一次！

大統領位於唐樓地面店舖，店面本來比較小，星期日中午有時候仲要等位，昨天(星期日中午)不用等，但要坐在近門口的吧檯位置，其實吧檯只是一張比較高的長桌子， 兩邊放了共八張高的椅子，人多時長桌兩邊也多放一張椅子加位，所以十分擠迫，也不便拿相機出來拍照了😅之前已來過幾次，特別愛吃這裏的定食，價錢便宜，前菜甜品都齊，抵食👍 食咗幾次雞腿定食都好好味，但近來改為雞扒定食， 而且雞扒比較"鞋"和硬，所以今次吃了鰻魚三味定食，鰻魚惹味，泡飯的湯水也有風味。店的服務生態度也很好，即使人多繁忙時， 也是有禮，樂於幫助顧客。

上星期五晚諗住輕輕鬆鬆食個晚飯先去MCL睇戲。 朋友簡左呢間日本野, 我地一行三人, 分別逐個到達。 第一位晚上7時到達入座, 坐低唔夠10分鐘就wtsapp我地其他人, 話佢感覺到就快俾d職員趕走, 叫我地盡快到達。我以為係朋友誇張, 當我7點20分左右到達, 坐低左唔夠5分鐘, 有個年紀大d既女士問左我地3次要落單未。 5分鐘問3次, 係你驚我腦退化定你做開老人院?當其時餐廳入面仲有張high table 未滿, 門口亦都未見有人等位, 而呢間餐廳無提供訂座服務既。 我地費事大家難做, 叫左好幾樣菜式, 價錢除番開都二百蚊個頭, 並唔係一人叫一個低於100蚊既飯。但食既途中d侍應不停未食完就想收我地隻碟, 最後我地無叫埋單就自己俾張單我地, 但當其時餐廳係未滿同無人等位既。我想講你間餐廳做生意做到甘乞e, 甘樣迫d客有甘快食甘快就走, 加快你翻台率。 我建議你改做快餐店路線。 真係俾得起錢既食客唔會再回頭食你呢間趕客既舖頭!其實d壽司真心做得唔錯, 但係俾你呢個度宿既老闆趕客, 可惜左廚房既用心。

食物質素尚可，巳去了第三次，但服務一次比一次差。上一次未食完已經收我們的食物，今次又是這樣，11:55分左右入座，我們每人叫了一款主食，也叫了一些小食，食物12:05分左右到，朋友很快完成主食，侍應巳急不及待收大家的餐具，而我因為懷孕的關係，食得較慢，那時大約12:20，那裡的侍應已經不斷望住我，之後的10分鐘，不斷望住我食完未，而那些眼神俾我的感覺真的很差，好像歧視我食得慢，當我放下筷子，侍應立即收曬我的餐具，最後12:40走，每人$9x ，如果這裡是茶餐廳三、四十元一個人，也理解，但差不多$100一個人，衰過茶餐廳的服務，如果不想客人坐，那不如寫一張告示，標明限坐時間，去埋今次，永遠不會再去！

陪屋企人去了北區醫院探親戚，唉! 人老了就多病，都唔知仲可以見多幾多次面。之後到了聯和墟逛了一逛，想起陳奕迅、楊千嬅套電影 “每當變幻時”，就去見識一下聯和市場，真係好有特色，聽說這個舊墟市場會於今年改造成北區首個舊式文化工作坊，到時可以再來見識見識。到了和隆街食晚餐，揀咗間日式食店。餐廳布置真的好日式，周圍貼了很多日式海報，連餐牌都大大張地貼在牆上。當然，看餐檯上的餐牌來選食物會方便得多。屋企人選了【蒲燒鰻魚飯 $98】，我就因心情唔好影響胃口，只點了【日系手捲 $26】。【蒲燒鰻魚飯】鰻魚飯份量都都唔少，配有前菜昆布絲，西瓜一片和麵豉湯。屋企人說，鰻魚好厚身，好大件，燒得又香。大大啖地吃，是一種享受，非常美味。【日系手捲】這個手捲其實在餐牌上沒有的。我本來是不打算吃東西的，不過店長問我為什麼不吃，我答剛去探病，心情不大好，不想吃。他說，為我造一個簡單手捲給我吃。這個手捲跟平時吃的很不同，材料非常豐富，有2條蟹柳，3條雞蛋，還有很多蟹籽，紫菜又大塊又脆，真是很好味。是我在香港吃過最好味的手捲，因為這個手捲多了一份人情味。感謝店長!

是日母親想食日本菜，而聯和墟可選既日本菜實在太少。所以就同佢嚟咗大統領食午餐。大統領既裝潢其實幾貼近日式居酒屋，放咗唔同既酒樽酒杯做擺設。啲木枱都算細，放哂野食就冇咩多餘空間。我同媽咪就一人一個套餐，一份刺身一份魚生飯，再外加18蚊一個手卷。食物準備既時間不算快，15分鐘左右先上咗刺身套餐，再過5分鐘先上埋個魚生飯。而刺身套餐既擺盤好靚，包括有前菜，生果(即一塊西瓜), 味噌湯，同埋一份冰底刺身，通通放上一個木餐盤上。刺身份量合格，而且質素唔差，很肥同口感很滑。而味噌湯仲有隻細細既蜆。相反，我對魚生飯既期望幾高，但結果就頗令我失望。雖然魚生飯有海膽，三文魚，帶子等等，但比上刺身套餐既魚生就失色得多 - 薄切，較瘦。以128蚊一個午市魚生飯套餐嚟講，cp值就較低。食完主餐，我地追加咗一人一份手卷。較令我驚喜既係三文魚手卷竟同鰻魚手卷一樣價錢！在出面日式餐廳鰻魚食品一般都比三文魚叫價更高，我當然要試試佢。手卷上枱後亦沒有太令我失望，味道幾好，鰻魚有好好煎過，三文魚亦幾滑口。總結，聯和缺少日式餐廳既情況下，呢間大統領雖價錢頗貴，但亦解決咗唔少人忽然想食日本菜既需要。

留公司做野，中午去了聯和墟搵食，呢間日本菜嘅食評唔錯，去到唔使等位，地方唔大，日式木傢具，餐具都係木刻湯匙，幾有心思，我初時坐大枱高櫈，後來有客人到，店員轉了我坐在內圍嘅細方枱！餐牌好似舊式居酒屋毛筆字寫咁嘅模式，落單之後食物極速上晒刺身定食配烏冬（$88）前菜：中華沙律，海帶煙韌，芝麻爽脆，好味！西瓜🍉雖然爽，但近邊位好硬，好難咬！麵豉湯：夠熱，有一隻蜆，麵豉味清爽，唔太鹹！幾好刺身：擺盤幾靚，小瓷盤放冰冰鎮住！估不到午餐擺盤都咁靚！三文魚：厚切肥美鮮味！油脂夠！甜蝦：爽口又新鮮帆立貝：呢個真係驚喜，厚肉似牛扒咁厚，淋身鮮美白身魚：好厚鮮味刺身真係好新鮮，又厚切，不過烏冬比預期中少，食完唔夠飽，男仔應該唔夠食！胡麻醬烏冬：烏冬正常（唔粉又唔係彈牙）胡麻醬係現成嗰種！味道正常！店員有禮有笑容，請我轉位都有禮！問佢野好有禮回應！刺身真係好正！