天賜素齋

营业中

休息中

今日初十五，被安排食齋，午餐被安排到禾輋商場的天賜素齋食，這間店歷史悠久，近期好似搬過舖位，裝修新淨咗，堂食茶錢收每位$5，食齋我第一就諗起齋老味$30，味道正常。再嚟過羅漢齋炒麵$45，多料及抵食。最後叫了腰果炒雜錦$65，這道菜有點失色，腰果是淋的，不太好食。

位於禾輋的天賜素食，是區內較罕見的素食店，而且是傳統中式的素食店。餐廳內有住在附近的公公婆婆用餐，通常他們都是點一個小菜，一人一碗，餐廳的位置不算大，所以坐的位置有些擠逼，吃得有點不自在。點了一碟齋鹵味、西芹素牛肉炒腰果和一碗白飯，味道正常，素叉燒片口感不錯，略嫌小炒煮得較為油膩。結賬時約百多元，每人約六十元，價錢正常。曾經另一次點了一客外賣中份齋鹵味，入口有少許油的怪味，而且份量很少，很不抵食。

我又唔係唔鐘意呢喥嘅飯菜，因為呢喥D嘢又唔迷太tasty(美味可囗)，但我覺得遙柱蛋白炒飯同埋亁炒牛河最delicious，千萬不要叫濕炒牛河，因為太多膠囊味，好臭呢！ 整體來說還可以的嘛:-)

這天到禾軬購物, 女友介紹到這間她兒時常光顧的素食小店吃。晚飯時間人不少, 幸兩個人是比較易找到位子。兩口子吃不了很好, 就只叫了一客沙爹枝竹雜菜煲和一客素菠蘿海鮮炒飯。上菜速度很快, 但上來熱騰騰相當有鑊氣。雜菜煲內的青菜有菜芯、荳苗、西蘭花,  還有花菇、金菇、菠蘿和紅蘿蔔等, 枝竹夠冧吸滿湯汁,  湯汁的沙爹味不夠但清甜, 味道不錯。菠蘿海鮮炒飯就炒得乾身, 夠蛋味(純素食者可走蛋), 帶菠蘿的微酸, 很開胃。埋單一百二十多元, 小店不用加一, 也沒茶芥, 就照價單埋, 在現在的屋村商場來說不算貴的了。

今日經過禾輋商場的天賜素齋，看見舖櫃的玻璃架上有久遺了的芝麻卷，太好了！$6一件買了四件回家和家人分享，足足有4吋半咁長喎！味道不太甜夠爽口，但捲得差咗少少啦！

是日放假, 又係食素日子, 懶得煮的話, 當然又係嚟呢度開餐啦~  欖菜炒飯呢個之前已經試過, 炒得夠乾身之餘, 欖菜好香, 好好食~  栗子支竹炆排骨超多栗子同支竹, 排骨竟然係我上次話好好食, 好有質感果只肉, 原來呢款肉係代表排骨, 上次係唐醋骨, 今次係排骨, 好正, 成碟餸, 都係我鍾意食的材料, 而且個芡料唔太杰, 成碟餸又好夾, 正~  雲吞雞煲好大驚喜, 又係素食比真正肉食仲好食, 而且我都係第一次食用菜心做餡的雲吞, 仲有d沙葛、木耳等等的素菜包成, 雖然個雞煲冇半只雞, 只係將d"雞"切片炸香, 咁反而令d湯更加香, 再加埋d素翅、雲耳等等, 成煲嘢好豐富, 超多料, 超滿足~

大家都遲放工, 第日又唔駛返工, 唔想煮飯又唔食肉, 呢度係唯一選擇, 最好就係是晚唔係初一十五, 大把位任坐~是晚唔係太餓, 照舊叫2個餸+1個粥~  生菜粟米粥咪以為淨係得生菜同粟米兩款餸煮粥, 仲有d雞粒同肉粒架~ 不個今次d粥唔知係咪搞底, 好多一大舊的飯~  涼瓜牛柏葉好奇想知牛柏葉係點, 但其實個樣同口感都唔係太似, 但爽爽地都唔錯, 最鍾意佢煮到d涼瓜一d都唔苦, 而且今次個芡夠薄, 少少地吊下味~  五柳素仙班之前諗緊要仙班定黃花魚, 老公仲估黃花魚係炸芋頭果款, 所以叫仙班, 但點知仙班即係芋魚, 雖然佢唔鍾意食芋頭, 但佢炸得夠香, 所以點多d汁食, 就接受到, 但我反而覺得佢炸得太乾, 有d硬~

老公生日, 唔想大魚大肉, 走嚟食素, 由於時間尚早, 店內只有1枱客, 入去任坐, 連老細伙計都响度吹水, 今次落單仲係廚房大廚, 因為佢咁啱走咗出嚟吹水, 見我地想落單, 佢就收order後返入去煮~  豉汁陳皮豆腐呢個認真失敗, 雖然見到有豆豉, 但冇豉汁味, 見到有陳皮, 唔係咬到條陳皮, 都唔覺有陳皮味, 而且個芡超芡, 一舊舊粉粒, d芡可以夾得起的~  乾炒牛河牛肉超大塊, 而且都幾像真, 幾有"肉"的質感, 成碟個味, 無論聞或者食, 都以為係茶餐廳果d乾炒牛, 但可惜炒得偏油~  髮菜海味煲今次呢個髮菜海味煲同上次果個海味豆腐煲都係差不多, 除咗豆腐變咗做髮菜之外, 仲多咗d粟米芯, 唔知係咪隨意任佢執? 其餘d"海味"都係果d, 有海參、蝦、鮑魚、冬菇、菜、雪耳等等, 但今次個芡好杰, 又重手咗d~平時叫2個餸1個飯/麵/粥, 係食得哂有餘, 但今次實在太油太杰, 搞到食唔哂, 竟然每碟餸食淨一半, 留起打包第日放湯粉食~

估唔到平日晚, 未夠六點半都咁多人, 細枱全部比人坐哂, 唯有搭枱, 好彩搭正果張枱, 只係我倆同對面兩位女土, 所以都幾鬆動, 搭枱感覺良好~今次老公好好胃口, 平時都係2個餸+1個粥, 今次竟然唔叫粥, 叫個炒飯, 但又比我地KO哂, 好滿足~  海味豆腐煲原本我地冇叫煲, 但落單阿姐自己覆單話係"煲", 咁我地又以為一樣, 咪由佢"煲"囉~ 點知到比錢先知, 點解比我地睇的menu貴咗幾蚊? 原來就係呢個"煲", 不過算啦~ 有個煲, 應該係熱辣辣d, 唔會咁快凍~如果呢個係"真"海咪煲, 相信以呢個價錢係食唔到, 因為係超足料, 又有魷魚、魚柳、冬菇、海蔘、飽魚、螺片等等, 樣樣都似模似模, 你見到佢個樣, 佢好易估到佢係乜嘢, 即係表示佢好像真~ 仲有d菜墊底, 個芡又唔太杰, 真係好食過茶樓果d海味煲~  糖醋骨估唔到有半碟西蘭花, 雖然佢係素菜, 但感覺上唔會淨係得肉, 都有d菜中和下~佢個骨好有質感, 中間有d紅蘿蔔, 唔知係咪扮"骨"? 個汁味道又啱啱好, 甜甜酸酸, 好開胃~  金牌炒飯睇個名, 估佢係什錦炒飯, 乜都有, 到見"真人", 果然係乜都有

是日放假, 於是出嚟搵老公食晏, 佢鍾意食齋, 而且齋舖冇咁多人(唔係初一十五), 我仲一早嚟到, 霸返個"私家位", 因為我地都唔鍾意搭枱~果日都見到有兩枱伯伯都係早d嚟霸位, 呢度唔會吹你叫嘢, 任你白等, 我果日都等左差不多十五分鐘~平時嚟食晚飯, 所以叫小菜, 但今日食晏, 於是叫1個炒飯+1碗湯粉~  楊州炒飯都係有d蝦粒、肉粒、生菜絲, 粟米粒, 其實都係果d, 咪以為齋飯冇乜味, 都好夠味, 好似茶餐廳版架~  火鴨絲湯米其實我係叫湯河, 不過整錯咗就由佢, 唯有我食多d~ 開頭好奇火鴨絲用咩代? 其實係齋鴨, 再打個芡, 加d芽菜、木耳絲、紅蘿蔔絲咁lor~ 味道OK, 但唔係我想像中咁樣~由於快近新年, 見到佢好多糕整咗响度, 走時買咗1底細蘿蔔糕, 新年時煎嚟食, 但可能係齋關係, 冇乜料, 只有少少紅蘿蔔絲, 同一點點淺啡色, 我估係菇, 味道OK, 但粉比較多, 太黏, 唔夠蘿蔔~

真係好彩, 今日又要"私家"兩人枱, 由於第日要帶飯, 所以可以叫個炒飯, 留返D第日帶飯~  鹹魚雞粒炒飯好香鹹魚味, 食落當然冇真鹹魚咁鹹, 所以咬一大粒都唔怕, 而且個飯又炒得夠乾身, 仲幾大碟下, 所以留咗一半, 都仲有一半今晚食埋佢~  鮮淮山素肉大蝦仲以為有3樣餸, 就係鮮淮山、素肉、大蝦, 但原來素肉大蝦係一樣嘢, 所以有D失望~ 我仲以為鮮淮山好似煲湯果D咁林咁粉, 原來係好爽口的, 好似梨的質咁, 而大蝦都夠彈牙, 夾埋一齊個感覺好清爽~  法輪卷伴生菜其實次次去都聽到有人叫呢個餸, 但我地有其他嘢想試, 而且又聽聞好似係炸, 所以遲遲未試, 今次又聽到人地贊呢味餸, 所以問問阿姐, 呢個餸係乜東東? 原來係炸咗D腐皮, 再淋個芡上去, 仲有生菜墊底, 好似好好味咁, 雖然係炸, 但炸完淋返個芡, 感覺上冇咁熱氣, 而且又有生菜墊底, 於是叫嚟試, 原來真係好好食架, 個腐皮雖然林咗, 但都食到有D脆的感覺, 而且個芡唔係好誇張, 只係好輕微一個芡, 下次可以encore~

是日唔係太舒服, 唔想食咁油膩, 所以又嚟食素, 今次叫D唔係煎炸嘢, 感覺上清淡D, 但又唔駛食白粥咁dry~  茄子排骨煲佢menu上係唔知xx茄子排骨煲, 但原來係有少少辣, 所有改為淨茄子排骨煲, 但食落都有少少辣, 仲見到有d辣椒碎, 可能廚房唔記得走辣, 好彩只係dd辣, 食多幾啖粥沖返淡, 味道好看濃, 同大排檔d魚香茄子煲有得fight~ 佢個排骨都好有肉的纖維質感, 仲要冇骨, 正~  鮮淮山素肉大蝦開頭仲以為有3樣嘢, 鮮淮山、素肉、大蝦, 但原來素肉大蝦係一樣嘢, 到上枱先知, 不過冇緊要, 大蝦夠爽口, 淮山都一樣咁爽, 同煲湯的淮山完全兩個口感~  艇仔粥之前介紹過, 唔多講, 總之足料夠味~

今次七點幾先去到, 仲驚冇位, 點知仲有大把位, 連唯一一張2人枱都有, 當然唔駛諗就直接入去坐, 再慢慢諗食乜~ 由於午餐食得太飽, 唔想叫D好飽好濟的餸, 又冇理由叫1個餸咁少, 於是叫1味酸的, 1味炸嘢, 1個粥~  炸大腸唔係坐响齋舖, 真係估唔到佢係炸大腸, 個樣真唔在講, 連個質感都似到十足, 唯一係五香味重得濟, 如果減輕D五香味, 真係超正, 因為佢冇真大腸果D肥膏, 最抵死係"腸頭"都有, 記得一定要點埋個酸甜汁, 咁就真係似到十足~  咕嚕豆腐同炸大腸差不多, 都係酸酸地, 只係將個主角變成豆腐, 加多咗D菠蘿同青椒, 同埋將D汁兜勻~  艇仔粥乜料都有, 有生菜絲、火腿粒、雞粒、粟米、金菇、冬菇等等, 總之好足料, 不過就稀咗少少, 可能D生菜出水?基本上我地次次都叫唔同餸, 但佢實在太多選擇, 仲未試勻~

都知呢間嘢多人食, 而且多數都係8人枱, 預咗要搭枱, 今次六點半去到, 希望坐到門口或者最果的細枱, 但可惜都係滿坐, 要同人搭枱, 一場嚟到, 搭枱又未至於好似譚仔搭到咁密, 都可以接受, 於是坐低諗食乜~2個人都唔叫得多嘢, 都係叫2個餸1個粥, 點知呢晚咁早就乜粥都賣哂, 咁唯有叫白飯囉~  枝竹班腩煲我估計所有"魚"都係用果款, 即我地平時叫"鰻魚"果款齋, 佢個煲細細煲, 都叫做熱辣辣, 而且個芡唔會太杰, 除咗枝竹同班腩, 仲有菜心墊底, 咁咪唔會粘底~  酥炸生蠔 估唔到係咁好食, 仲好食過D真嘢, 一來個炸漿又夠熱又夠脆, 中間那隻"蠔"個質地好得意, 冇乜纖維, 又唔係爽口果種, 好難形容, 但好好食, 連同枱果個婆婆都問佢D女我地食緊乜, 睇落佢都好想食~呢度實在太多款式選擇, 仲有好多機會再嚟試~

有同事最近轉食齋，於是多了留意地區齋鋪。沙田的齋鋪很多都關門大吉，好不容易才找到禾輋這家。記得在讀書時間，這間齋鋪已經存在，但一直無試過，今日終於可以一試。內裹的擺好傳統，一入門就見到菩薩，還可以上注香。齋鋪不算太大，而我們又早入來，可以不用等就有位坐。我們點了齋鹵味，芋頭魚，羅漢豆腐羹，南瓜芋頭雞。齋鹵味，其實我不懂分辨那幾款是什麼，味道適中，不會太酸，又不會無味，每粒齋都好入味，酸齋，齋叉燒，齋鴨（我估）咬起來質感好實在。芋頭魚，芋頭泥磨得好爛，所以整條魚造型完整，芋泥壓得好細密，酥炸完都好完整，咬起來濃濃的芋香。 羅漢豆腐羹，好多料，有菇，有雪耳，豆腐好香豆味 南瓜芋頭雞，不過不失，南瓜可以厚切，太薄食不到味道，素雞咸了一點，真的有雞的質感