寶琳冰室 (寶林市場)

营业中

休息中

第一次光顧買晚上外賣，一個脆皮豬手配天使麵，一個西冷牛扒配薯條，兩個羅宋湯，兩塊烘多士，兩杯熱飲，外賣仲有85折，好抵食，外賣包裝穩妥以為外賣會好細份，點知原來比想像中大份精美，多士好好味，薯條夠脆，肉質好，羅宋湯夠辣，奶茶夠滑。整體來說是一間有質素的冰室，眼前一亮。喜歡寶琳冰室餐牌多元化多類別，比其他附近茶餐廳優秀，份量價錢都合理，值得一試，打電話叫外賣時職員有耐性有禮貌，店內員工都主動和友善。

早幾日去寶琳街市買餸，見呢間寶琳冰室新開張，星期日朝早去試下，最初以為2人限聚下會無咩人，點知都坐滿晒。一打開餐牌，就比焗火腿芝士牛角包吸引，因為有d早餐唔係配牛角包，所以最後點左鮮茄牛尾湯餐肉粒通粉。個湯好足料，真係食到有牛尾肉，煲到好林好好味，個湯味道啱啱好。成個早餐最好味係個焗金腿芝士牛角包和滑蛋，個包好有驚喜，普通茶餐廳通常都係多士一塊，好d嘅咪比厚多士囉，寶琳冰室竟然用焗火腿芝士牛角包，真係無得頂，記得趁熱食，凍左無咁香口。個炒滑蛋比牛角包搶左鏡，其實都好正，份量都好足，細食的人兩個share一個餐都得。成個早餐唯一美中不足係杯咖啡，如果可以加錢升級即磨咖啡會加分唔少。而家茶餐廳叫過普通到不得了的早餐都成$30-$40幾蚊，寶琳冰室早餐價錢唔算平，但唔係貴，有咁嘅質素算唔錯！最後，佢地早餐時段到11:30，但唔好咁晏去，一陣坐滿就只可食午餐。

見呢間冰室喺街市裏面新開就試吓、某啲卡位都比較窄但全部野都新既！頭嗰幾日佢哋話會開到凌晨一點、但係轉頭就因為政府修例所以十點閂門。⬇️開張第二日夜晚試吓仲未算多人、有個炒粉麵餐全日都係$54包飲品。所以叫左豉椒排骨炒麵，另一個就叫左西冷牛扒餐、包埋多士同西湯及飲品。⬇️豉椒排骨麵上枱嗰一刻都唔錯、但係排骨好鹹應該係醃得太重手，而且排骨真係冇乜肉但係個面係脆卜卜、熱奶茶中規中矩。⬇️牛扒餐個多士同埋紅湯先上、羅宋湯有少少辣但係多士好好味而且好大件。西冷牛扒雖然冇問幾多成熟但係恰到好處肉質OK比排骨麵好食，但係杯凍檸茶就唔掂完全冇味、我估因為檸檬係來貨平嗰啲完全出唔到味！⬇️晚餐冇加一埋單$135、中規中矩都算合格。下面係外賣電話，下次可以Call定先去拎！⬇️過左兩日試埋早餐D、$34再加兩蚊轉英式吐司多士。⬇️通粉揀左沙嗲牛肉同雪菜肉絲、雞蛋可以揀炒蛋或者煎蛋 ⋯ 最後揀咗煎熟蛋飲熱奶茶多奶。⬇️好快上曬所有野。熱奶茶都OK、蛋得一隻而多士熱辣辣但有D乾！沙嗲牛肉同雪菜肉絲都有D辣但基本上都可以接受，見到比較多人叫早餐A。大家可以試吓 ⋯ 上面份早餐$36都有70分！

寶林街市裝修完乾淨咗好多，咁啱經過呢間新開嘅冰室就入咗去食個下午茶。-每張枱都有一樽檸檬水，屋邨茶記嚟講算係幾貼心。-通粉份量唔算好多，但好足料，我呢碟就有兩細舊牛尾，餐肉粒大量，湯都夠濃真係有牛尾味（如果有食過大X樂早餐個牛尾湯就知牛尾湯係可以冇牛尾味😂），比想像中好👍🏻👍🏻👍🏻-比起一般茶記嘅炒蛋多士，呢間冰室常餐跟呢個吐司批，好有誠意。因為通粉上枱先，我食完成個通粉先食個吐司批，食嗰陣有少少放涼咗，但個丹麥酥嘅邊都仲係夠酥脆。-另外要讚一讚把餐刀，我好驚啲餐廳嘅餐刀係切唔到佢哋serve嘅食物，原本都做咗心理準備如果把刀切唔到件吐司批/要來回切十下八下先切到，我就會用手拎住食，點知佢哋把餐刀輕鬆切到個批，嗰刻我有少少感動😂-我仲好八卦哋影咗佢哋啲餐具，因為好少見到茶記嘅餐具咁乾淨整齊，可能因為新開嘅關係，枝枝羹都反光✨-雖然冰室係喺街市入面，但入面所有嘢都好企理，食物質素對得住價錢有凸，有潛質做我新食堂😋