小方糖甜品 (廣華街)

营业中

休息中

飯後大約八點幾同朋友去咗食甜品🍨可能平日唔使等位，小方糖係一間港式甜品舖，價錢合理，叫咗一個芒果樂園同朱古力心太軟，賣單價錢💰100內，人均50左右，甜品份量唔算多，但性價比高，飯後甜品之選，甜品店店舖選擇都幾多，中式同埋西式嘅甜品都有，可以比大寄揀到一樣啱嘅，服務員態度幾好🙂‍↕️落單都好快手，心太軟本身需要啲時間，等咗10分鐘左右就已經有，衛生同環境都OK👌🏻📍小方糖：旺角廣華街3號

先唔好講食物，只係講由坐低到落單，就係一肚氣。中年四眼禿頭男士態度差到另人好想即刻走人，如果唔係已經落單，我真係想起身走人。甜品質素好一般，相比之前去過，而家質素真係大不如前。點了一個朱古力刨冰，小朋友想將凍底由朱古力轉去第二款味，toppings 保留朱古力原料。有甘難明？ 中年店員用一個極不滿+ "唔係呀" 既表情唔耐煩地講： 咩呀？ 跟住我地再重覆。身後另一店員大叫無果款味呀。 九龍城間小方糖就做到，你地呢間就唔得？ 唔得明白，唔該可唔可以比d 禮貌地回應。 小朋友係刨冰狂，可惜當日佢食到一半就唔想食，甘就明d 食物有幾唔ok.跟住再點了芒果拿破倫同心太軟。拿破倫餅底勁泣；心太軟個心係凍。算。。我都懶得再同佢地講，因為我發誓絕不再去旺角廣華街呢間小方糖。服務差，環境唔企理，食物質素差。

這甜品店應該被淘汰，爛膠小碗二吋姜水加幾粒蕃薯，紅荳豆腐花更慘不忍睹，那透明膠碗似深水埗街邊賣的三手爛碗，豆腐花不好要求有豆味了，那芒果糯米甜品5件，每件細如小方糖。但價錢都不平！做甜點的青年姐姐一面咬著雪條一面整甜品，還直接用手抹嘴，多專業！那收錢的大媽忙著拆郵包，多謝一聲都無。食完只有一種感覺：中伏。滿肚氣。

今日去咗小方糖試咗佢嘅芋圓涼粉，真係不得了！😋 芋圓口感Q彈，味道濃郁，入口即化，唔會太甜，正好平衡咗涼粉嘅清新感。涼粉滑溜溜，特別適合炎熱天氣享用，真係好解暑。份量適中，價錢合理，環境亦都唔錯。🤗 如果你鍾意食甜品，呢度真係唔可以錯過！下次一定會帶埋朋友一齊嚟試其他甜品！👍

態度勁差 唔知收咩payment就問收銀啦 點知個店員勁大聲+冇禮貌話：現金！之後啲野仲要唔好食 叫左個芒果綿綿冰都唔知咩黎 真係好難食 一定唔會再黎食！一pat野咁 唔知咩事 好嬲

同朋友食完飯去食碗糖水，入去環境普普通通。嗌左個士多啤梨沙冰同楊枝甘露，上到嚟食左幾啖見到有舊黑色野，一撩 有鬚嘅蟲😅😅 即刻同職員講 佢話換一碗俾我哋，即刻話唔使退錢呀唔該😓😓

今日同朋友行街，天氣咁熱，見到有糖水舖就入去坐低一入到去，睇完餐牌，個白髮女人店員淨係掛住傾偈，叫到第三次叫佢落單先有反應叫咗碗楊枝甘露，等咗一陣嚟到，第一啖食落去，啲柚子勁難食，嚡熠熠乾噌噌咁，不過叫咗都繼續食；食多兩啖，喺芒果上邊見到有黑色一條嘢，開頭都懷疑係咪蟲，所以用電話影低咗放大睇，真係蟲嚟；咁當然即刻同店員講，個白髮女人攞起碗嘢，好認真咁望，再用懷疑嘅眼神望住我；跟手佢收走咗碗嘢，倒咗佢，然後無啦啦嬲爆爆攞走枱面張單，整走咗碗嘢個價錢，好似得罪左佢咁；之後佢當乜事都冇發生過，自己同廚房人默默針，跟住自己坐低噤電話，嬲到人生第一次報食環

係旺角食埋晚餐然後直落食甜品～🥰🥰🥰好耐冇食小方糖啦水準都保持到😍🙏仲多左啲新糖水添😆星期五晚排隊係排左一陣，都算好快入到🍽️ $42 紫薯芋泥蛋白燉鮮奶💕蛋白燉鮮奶本身就係我至愛🤤又香又滑加上紫薯同芋泥，真係好足料仲勁飽肚😂口感一流，好多重層次呀！！！正❣️🍽️ $42 芒果樂園🥳有牛乳布甸、芒果雪糕、芒果汁水晶珠、椰果💯🤩好豐富～好夾，芒果味濃郁👍酸酸甜甜咁，好岩夏天食😈

首先小方糖其實我都食過其他分店都幾好食，今次我再食，好失望。首先入到去間店態度真係好差，當時比較早入到去食，要我哋迫埋同隔離一齊坐搭枱。我表示唔願意表示有人如果真係冇位坐，我先再調位😓之後亦都俾梳化位我坐😥環境衛生情況欠佳😕芒果椰子樂首先我食過其他分店唔係咁樣完全冇汁😓成個好乾，好失望😓芒果粒粒拿破崙成隻匙羹都放埋落去直接出俾你，真係有待商榷員工嘅態度😓亦都有可能係唔小心，但係唔應該係貪方便放上去俾你。但係味道其實真係唔差，係拿破崙略有少少硬鬆脆度未夠期間店員不停行前到門口，又行轉頭，又唔知做緊咩，不停來回行，不停撞到我朋友背脊😓朋友都表示坐得真係好辛苦。同朋友食住傾計咁樣，食到最後一啖一下就嚟收走直接叫你走，完全係趕客。真係食到一肚氣😓呢一間分店唔會再有下一次黎食。

兩位中年男女侍應態度差到爆，永久blacklist，啲糖水又難食，難怪越來越少人未食完已經執枱趕人走甘，食完飯諗住用糖水完結愉快既一天，點知比依間野既態度真係完結一天，比錢買難受

今日去旺角食完飯，突然間想食甜品，就諗到小方糖～～今次我就叫咗香芒小丸子個雪糕一上就溶晒啦sosad啲小丸子份量真係好少😅😅不過最難食係啲西米，超硬….我個friend就叫咗宇治金時佢話喺其他甜品舖食都會有煉奶好食啲呢度啲冰係真係冰，無味好難食唔明白點解平時咁多人排隊！n

今日同屋企人一齊去食甜品，原本係一件開心嘅事情，結果比一個態度好惡劣嘅女侍應生破壞咗心情，我哋一入到門口一男一女嘅侍應生坐喺最入面又唔出嚟招呼客人我以為自己搵位啦，點知我哋一坐低佢就起身趕我哋，話要坐另外一張枱先得，咁都算啦，後尾嗌嘢食嘅時候態度仲變本加厲極之惡劣，我仲以為去咗10年前嘅澳x牛x公司嗰種眼神同埋語氣而家諗起都心有餘悸！其實當時好想起身走人，但係又唔想掃其他人嘅興，於是食埋甜品就急急腳走人，估唔到今時今日都仲有咁樣嘅服務態度，真係令人失望！其實甜品食物認真麻麻哋，環境污糟再加上態度如此惡劣嘅侍應生我係絕對唔會再幫襯㗎喇，冇理由幫襯佢都仲要受氣啊

夜晚喺旺角想食糖水，間間都排哂隊好多人，唯獨依間唔洗點等位，加上Menu望落選擇都幾多，就決定試試佢🧐點知道會咁失望呢……鋪頭唔大坐落幾迫，而且衛生麻麻，特別係啲Menu殘殘舊舊，好唔想掂到🙉牆上貼嘅口罩告示仲封哂塵，少少發霉，整體感覺唔太好😓✴️士多啤梨乳酪雪糕芭菲✴️非常簡單嘅芭菲，由2球乳酪雪糕+1球士多啤梨蛋糕+2條餅乾+3粒士多啤梨啫喱同果醬組成😔首先雪糕係最普通個隻雪糕，完完全全係化學甜味👎🏻士多啤梨啫喱魚膠粉太重，好似食緊膠👎🏻本身雪糕都幾甜，仲要加好多甜到爆嘅色素果醬，搞到成個甜品都係單一的甜，令人失望！😔✴️紅豆椰汁涼粉✴️最大路嘅椰汁涼粉都唔掂，椰汁味道好單薄，質感都好稀👎🏻而且佢又係莫名奇妙地甜，如果你target 一碗無咩內涵or只想食甜嘢的話，可能啱你嘅…….

實在係太愛齒頰留香了🥹榴槤汁底超香超濃滑,加埋珍珠椰果口感好好,新鮮榴槤肉勁多,一啲都唔苦仲好甜,仲有個牛奶布甸好滑,成件事勁夾勁好食!大愛!龍珠改都好好食!椰汁沙冰底好香,食落有少少碎冰,龍眼肉好甜,夏天食超正❤️‍🔥

風花雪🍪🍦友人最愛的甜品，雪糕可自選口味，每次她都揀會曲奇味。正👍👍意式涼粉幼滑清甜，涼粉是幼條狀，好特別。另外加上綿密紅豆和豆味濃郁的豆腐花，整體超夾，好好味😋😋 絕對是夏季消暑必食的甜品之一。朱古力棉花冰🍫初嚐這間的棉花冰，棉花冰好幼滑，香蕉香甜新鮮，星星脆脆亦不錯，可惜主角棉花冰朱古力味偏淡，珍珠配搭這個甜品亦不夾，整體一般。#旺角美食#旺角#旺角糖水#糖水#foodie#hkfoodie#旺角必飲#甜品#旺角甜品#必食#香港必食#香港美食#香港网红打卡#香港美食探店#甜品推薦#小方糖甜品#美食推薦#銅鑼灣#moodzfoodie#moodzfoodz