批&撻專門店

营业中

休息中

今日去左德福行街，返屋企前當然要買番幾個雞批LA~ 自從大埔無左PIE AND TART，想食雞批最近都要去到九龍灣LU~買四個就會有盒裝，PIE AND TART咁多款TART中我覺得水準最好同好味道就係雞批了~搭車回到家已經半小時後，雞批仲暖暖哋，叮多20秒就好似新鮮出爐咁面層的餅皮依然是很鬆化的，內裡的白汁餡有雞肉、火腿、洋葱同少量磨菇，加起來就好豐富的了~吃一個已經好飽了，美味的雞批依然是食極都唔厭的P.S. 無買一排，又加了價，現在是 $11 一個了

「批&撻」，總令我想起一位舊同學。在每周一次的夜學中，她永遠帶著一股香氣踏入課室，放工後飢腸轆轆的我，雙眼不自覺地釘著她手中的紙袋，上面印著「批&撻」。看見她吃得津津有味的樣子，我就不其然地對這個牌子產生了莫名好感。今午經過小店，腦中突然泛起了這段回憶，心中的食魔「鼓勵」我步前買點東西。在玻璃櫥窗前，放滿各式各樣的批和撻，我就隨意挑件樣子討好的，最後揀了$10.5的駝鳥批。店員把食物遞上時，心裏頓然感到失望，首先它的溫度不夠燙熱，而且沒有誘人的香氣。回到家中忍不住把它翻熱，用叉切開一看，批的外皮不算太厚，餡料份量頗為澎湃。再試試味道，表皮缺乏濃香的牛油味，幸好尚是鬆化不油膩。醬汁是惹味的黑椒，配合薯仔和洋蔥味道不錯。倒是主角駝鳥極為不濟，它焗得過乾且嚡，相信胃部也難以消化哩！小小的一個批，卻意想不到的飽肚。有時印象和現實可以是兩回事，今次又是一個印證。

係地鐵站等朋友仔放工過黎會合既時候實在忍不住香噴噴既pie & part 味道帶點肚仔餓既時候，都係要買落黎醫醫口癮味道從不會甜得太漏牛奶香卻好重身淡淡的、嫩滑的蛋加埋香脆蛋撻皮實在令人陶醉而且仲要係熱辣辣既櫃拎出黎更為有味道喔

叉燒酥~好食~~唔洗諗~芝士鮮奶撻 / 鮮奶撻~主打~~宜家仲有朱古力味同7芝士，邊隻都好食~~海鮮撻~外邊睇就幾大! 其實並不多~~好食、多料~略貴~~蘋果批~呢個麻麻~可能自己不喜歡食蘋果~~南瓜批~呢個勁呀~~我最憎食南瓜都食~~正~~雞批~幾大幾多料~~係幾好食架~肉汁螺絲批~幾大幾胞肚~~OK~~咖哩牛肉批~~料多~~標準水平~總結 : 每樣野都熱辣辣，暫時唯一令我著迷的PIE TART 店。我覺得唯一可以挑剔的是......專做外賣，都唔比人坐>﹏<有時熱辣辣....返到屋企都.....唉.....

此店的批味道不俗，但分店不多，而港島區更沒有分店。剛巧今天因事來這區，當然要吃它的批囉。鴕鳥肉批($10.5)：外表焗得很靚。拿上手，不算十分熱，但也很香。批面很易用叉插入，但不會過於鬆散，也不油膩。批身尚算鬆脆，不過批邊的花邊較厚，所以略為硬。餡料有肉粒、洋葱和黑椒等，很飽滿，加上帶點鹹香和辣味的醬汁，很野味。大部份批是$10.5一件，價錢合理。每次吃這店的批，都覺得它的味道好，但就是不夠熱；如果能夠熱一點就更美味了。雞批和蘋果批好像也不錯，下次要試試。

臨出發前也要清清手上的緊餘的食評雖然只是小食, 但算盡點棉力吧小女子經常甜品, 零食當正餐自問非常喜歡Pie and Tart的食物; 無論咸甜也喜歡 但自從牛頭角地鐵站那間摺埋後 已很久沒有幫襯, 今日就下定決心跑到下一站官塘去 官塘地鐵站由早到晚永遠都咁旺場; 所以Pie and Tart 的生意也多到做唔切 蘑菇批 :咪以為蘑菇=蔬菜=健康, 因為她用上不小芝士蓋面增加口感, 再者那充令人又愛又恨的牛油餅底, 每一次也令人回味, 主角不僅有蘑菇, 更讚的還有口感豐富的雜菜粒, 批邊燶燶地, 每口也充滿著芝士, 牛油的邪惡感, 美食…就是如此令人欲拒還迎了 藍梅Muffin : 留了作第二天早餐 嚇人一驚, 成半個紙袋都係油 相對整個Muffin 也是乾爭爭唔通呢個就係吸油紙袋? 絕對唸多左…此Muffin有形無實, 啖而無味無論味道以及質感上也稱不上是Muffin Pie 同Tart類都係正，其他 ．．．算罷啦　

一個人係九龍灣補完習好肚餓 食咩好呢?就食批&撻啦hehe又方便又飽肚行到過去見到好多款 款款都好好味咁本來想食藍莓批 開銀包先知得番10蚊5亳子唔夠坐巴士所以都係食apple pie啦一拎上手覺得好暖笠笠呀雖然唔係冬天 不過落住雨好凍揸住個暖暖pie好warm面個皮好香好脆脆 唔會係擺左好耐個種feel蘋果唔係好甜 對比老麥既 佢算清清地個種不過個底好似薯蓉溝水咁稔 好難食呀媽媽整體ok ge個批底有待改善hehe

因為返工既緣故~所以每日都會經過呢間野~覺得而家樣樣野都物價上漲,好多大型麵包店賣個包而家差唔多成十蚊個,而且仲要食完好似食風落肚既情況下~呢間野無疑成為我買早餐既其中一個選擇,如果唔係怕肥~我諗我會經常幫襯食過佢以下幾款批:叉燒酥~幫襯呢間野最多就係呢樣~因為真係抵食夾大件,未試過食個包係D皮都食晒,但仲有好多餡係度~如果細食既女仔~呢個拎黎做LUNCH都得!芝士鮮奶撻 / 鮮奶撻~應該係呢間店既銷量榜NO.1,出名都係靠呢個撻~都係一貫既水準~而家好似有埋朱古力味,但本人都係鍾意食原味野~海鮮撻~感覺幾新奇,咁細件撻入面會有埋長通粉,味道雖然冇咩特別之處~不過要飽肚的話~呢個係首選蘋果批~呢個亦係幾常食,可能我幾LIKE肉桂味既野~~而佢蘋果餡唔算太甜,所以好岩怕甜既我,仲有蘋果肉既分量都好多!雞批~又係見好多人幫襯,不過自己唔係太好雞掛,所以就覺得一般般.....但個皮又係幾好食既~香葱雞角~雞批同呢個相比,反而鍾意食呢個,因為好似食緊葱油餅咁,但唔油~好有兒時情懷!可能由於每樣野都熱辣辣~所以會覺得特別好味

昨天經過呢度就諗住買個雞批當晚餐,雖然仲係曖曖地,個皮都好香仲好脆身的,但係好咸呀,唔知係個酥皮咸定係入面d料咸,總之好咸啦,價錢已越嚟越貴,依家要10蚊一個雞批,唔算好大個,入面d料有磨菇,雞肉及洋蔥的,都好多及豐富的,不過真的過份地咸了.

等的人遲了一陣,我們已經很肚餓了又擔心去到megabox要"趕戲",沒時間吃lunch於是買了Pie and Tart的螺絲粉肉汁批頂檔!摸摸紙袋,只是微暖,心知不妙上面的薯蓉,很硬,因為是凍冰冰的內裡的螺絲粉有部份已經是硬了,似是未煮過的真激氣呢,店員掛著談天,不理店子的食物質素希望老闆留意!

　　如果是新鮮出爐，通常兩三分鐘我也願意等，因為熱辣辣的鮮奶撻或芝士鮮奶撻實在教人難以抗拒。這甚至是我2009年最後食的一餐。如果要挑剔的話，食完會感到些少膩，但這樣鮮奶味才夠。

因為此店在港島區沒分店，因此難得來到九龍區，當然要光顧一下。本來想試木瓜鮮奶撻，但未出爐，於是試芝士鮮奶撻。芝士鮮奶撻($7)：芝士味不夠濃，但奶餡很滑，而外層的餅皮很香很脆。感覺上它與鮮奶撻差不多，分別只在於味道稍為濃一點及面層有少許焦啡色。如果芝士味能濃一點便更好了。

此店於港島區沒分店，因此難得來到九龍區，當然要吃它的出品。鴕鳥肉批($10)：很大個，焗得很靚。不算十分熱，但也很香。批身很鬆脆，也不油膩，不過批邊可能是花邊，所以較厚身和硬一點。餡料除了有肉粒，還有洋葱和黑椒等配料，加上帶點辣味的汁料，很野味；如果肉粒可以多些就更好了。除了食物好味，店員態度也很好。我看見第一件有點爆口，於是要求第二件，她不嫌麻煩地幫我夾了第二件，而且臉帶笑容地把紙袋遞給我。這麼好的店，如果能在港島區也有分店便好了。

八月十六日 (星期一)午餐吃過喇沙,到了放工時間有點肚餓我和老公仔去到九龍灣逛逛,我突然嗅到遠處傳來的芬香...是Pie and Tart我再也按奈不住,立刻帶同老公仔幫襯選了一個肉汁螺絲批share很香口,外面的薯蓉帶點凍,內裡的醬汁和螺絲粉則熱哄哄,形成強烈的對比的確很不錯Pie and Tart永遠是一個很好的中途加油站

昨日剛吃完午飯,弟弟回來並帶了一盒Pie & Tart,本來都吃飽了,他不繼叫我們試吓啦,還熱的.我問是不是翻叮那種,他說不是,是剛出爐的.他一共買了4件,媽媽只吃了幾啖海鮮批的酥皮,最後還是我同弟弟清理所有的撻 &批.海鮮批 ~~ 揭開面層酥皮,吃裡面的陷料,真是好熱,材料其實是栗米+長通粉+火腿絲+魷魚絲,我問弟弟這個是什麼批,他說好像是叫海鮮批,實際上魷魚絲得幾條,估計不超過6條,心想得幾條魷魚絲就叫海鮮批,改名方面是否可改一改,好讓買的人不會感到貨不對板.不過我同弟弟仍然覺唔錯,因為它的白汁調配得好,而且熱辣辣份外好味栗米薯蓉批 ~~ 這個就普通了些,而且又不夠熱,陷料只是栗米同火腿,味道好平淡鮮奶撻 ~~ 好滑,不太甜,好味藍莓撻 ~~ 平時不太喜歡吃藍莓的食品,但這個撻我又接受到,因為藍莓醬不太甜,個撻好鬆化而且又係好夠熱其實除了個栗米薯蓉批較遜色,其他的都好好,下次都會想試吓其他款的撻&批.