明愛餐廳

营业中

休息中

今朝好早起左身，八時多已經去到中環，心血來潮行上堅道食早餐，一來有時間，二來行下當晨運都好。米睇呢度位置幾偏僻，都有唔少人來食早餐的，除了返明愛的學生外，亦有剛晨運完的退休人士。早餐分中式同西式，都只係十零蚊。要了火腿魚片麵加熱咖啡，麵是蛋麵，看過匿尼的食評，專登叫阿姐唔好淥麵淥得咁腍，再同叫佢加五香肉丁辣油，對的呢類幫襯少少又麻煩多多的客人，佢都笑笑口有求必應，服務態度好好。魚片是炸過才放上來，熱辣辣好香口，咖啡是一般快餐店貨色。加上窗外綠化的景致，實在是個不錯的早餐。埋單12蚊，價錢平亦幾好食，會再來吃。

成晚對住Project毫無頭緒兼o訓唔著，見係星期六朝早，把心一橫早o的出門口番工，一心碰彩數搵下哩度（估計一落車就係）食番個醒晨早餐。一落車，仲要行高少少，上左三樓但漆黑一片，巧遇其中一個待應話餐廳未開門（o下，都成八點幾未開門，明明見開七點喎！），細問之下，早餐要落二樓o既飯堂幫襯。雖然哩度（二樓）比較簡陃，早餐選擇唔多，咖啡奶茶又唔係好得，但不失都係一個好地方，我選擇近窗位置，對住一棵棵陳年大樹食住我碗「餐蛋麵」，另有一番風味o既！雖然麵身煮淋左（下次叫阿姊唔好煮得太淋先），但望住佢煮有o的阿媽feel，熱辣辣，簡簡單單一個早餐，夫復何求丫！食完行番落山（真係幾醒晨！），路經禮賓府，見差人叔叔貼緊指示牌，細問之下，原來一連兩日（朝十晚五）係「開放日」，大家不妨去踐番幾個腳印咯，順道試埋明愛個午餐，相信到時餐廳會開o架喇！

午餐幾好吃呀，不過款式不多啦，甜品都唔差，如果有的話，法式焦糖燉蛋係唔錯呀，不過芝士蛋糕就麻麻啦。

呢度o既早餐都幾掂o架, 又早開門(6點50分), 方便o的early birds.西式早餐(大約15-18蚊) 有煎雙蛋, 一大片火腿/兩條腸仔, 牛油方包再加一杯餐茶. 唔算好平, 但整得幾好食, 夠哂energy去應付新的一天.

在這裡食野有D似去左某中學的飯堂，因為都幾多學生幫襯。呢度由明愛的學生打理，服務幾好，有禮貌又週到，加上全部戴上口罩，感覺好衛生，值得一讚。叫了焗豬扒菜飯鴛鴦汁，夠份量，但汁幾多，要撥開先見到飯。味道都唔差，35蚊連一杯熱飲又有咁好招呼是不能苛求。都估呢度D咖啡同茶都唔多掂，所以索性叫杯熱檸茶好過。見佢有個特色甜品是蛋白焗椰皇，只賣10蚊，又叫來一試，真係成個椰皇上檯，味道都唔錯，抵食。不過由中環行上來有行山feel，秋涼天時就無所謂，天氣熱就唔好搞。