明記海鮮酒家 (已結業)

上次來, 好像是十幾年前, 但實際歷史一定更久。十幾年前同十幾年後一樣都係咁多人, 裝修過幾次, 食物水準一樣和十幾年前不相伯仲, 以前老前半夜後才過來吃豉椒大蜆, 而家過來試晚飯, 好多人排隊外賣他們的雞。不想點菜, 隨便叫了A餐, 有豉油王煎中蝦和蒸頭腩, 加多個例湯西洋菜陳腎。頭腩夠新鮮, 中蝦比較細隻但都入味, 例湯好甜懷疑有味精, 但飲後全晚都不覺口渴喎!!!係到咁多年, 一直咁旺場, 但又冇人寫, 我想大家都唔想好店俾阿SO提名...

幾個朋友食晚飯，有人話明記抵食，立刻飛車落灣仔∼去到0岩0岩有最後一張吉檯，好彩！5個人，叫0左：金銀蛋莧菜﹣唔係唔好食，但都幾咸∼食完有Ｄ口渴。白切雞﹣正！皮同肉都曉彈架喎！炸大腸﹣可能唔係我心目中想食果隻，所以唔係咁欣賞。（我食過最正0既係0係廟術檔小販，可惜唔係日日開檔，開0左檔又唔知佢擺響邊∼）椒鹽炸豆腐﹣哈哈∼除0左個樣似用萬年油炸出0黎之外，真係無0野可以再彈！實在太好味∼蒜蓉蒸開邊蝦﹣蝦唔夠新鮮，Ｄ肉霉霉地...無蝦味...落蒜蓉其實都係詭計...個人一直認為海鮮清蒸已經最好食。一支啤酒，兩罐汽水，埋單$350幾，好似唔係好抵∼

搶灘蕉船wakeboard 潛水做齊之後，再來個晚飯，雖然之前每次上水都嗌住肚餓掃野食然後再落水。但無影響晚飯意欲，E然有雞有魚再掃多局。之後仲有力行書展，最重要的，係弟朝訓醒仲可以再開波。鐵人耐力賽咁。明記無野好，好在街坊，無硬sale開魚，豐儉由人。真係諗起焚化爐時代，食野邊識分好壞，求其有野就食，飽就得。估唔到而家偶然都仲可以咁。

星期五晚同食友雖然來了個食以外的活動，但結尾當然還是要找吃的。因為就在附近，不想多諗，就一行八人來了這裡。上次來不是我點菜，今之來看清楚菜單，原來以前的招牌菜如生根鯪魚角及風沙雞/鹽焗雞等已沒有了。結果要了兩煲例湯、生炒骨、臘味炒芥蘭、粉腸魚卜煲、煎蠔餅、鹹蛋蒸肉餅、油鹽雞腳同金銀蛋浸菠菜。菜色好像比上次來更細碟了，當然比起裝修前縮水更多。例湯是蘋果紅蘿蔔煲豬橫利，落單的阿叔話是不下味精的老火湯，渴落又真的不錯，甜美又足料，不過其實八個人叫一煲已足夠，叫兩煲可以一人飲多一至兩碗；生炒骨新鮮熱辣，酸甜度適中又炸得脆口，不過骨多肉少，影響食趣；臘味炒芥蘭材料沒問題，問題出在味道上，因為少了燒酒的味道；砵酒三杯雞是落單阿叔在沒有魚卜後推介的，仲話食過都讚好，但吃落只一般，雞件沒什特別，食友甚至伙記也以為是肉排，味道亦不見出色，建議不用叫；煎蠔餅賣相有睇頭，但面頭脆底下腍，蠔仔雖然幾大隻，但明顯是煎的那位功力不足；鹹蛋蒸肉餅反而穩紮穩打，幾受食友歡迎。不過肉餅做得太實，相信有點入廚經驗的也比這裡做得好吃；油鹽雞腳味道不足，是油鹽水的問題，亦是火候的問題；伙記服務不錯，但落單就好有問題；如煎蠔餅

在呢度裝修前幫襯左唔少次，覺得小菜不錯，價錢又唔貴，裝修後反而無來過。尋晚同波友在修頓打完波，幾條友四圍搵食，就來試試看裝修後水準能否維持。裝修過後，地方靚左又光猛左，連出面個魚缸都醒神左好多。已不像從前一般在牆上寫有菜色，係要自己睇紙。在座除了本人都是食得之人，五個人都叫左幾多菜，分別有燒鵝半隻、東山羊片、牛柳粒、清湯腩、咕嚕肉、味菜生根豬大腸、砵酒焗吊片、椒鹽九肚魚同肉碎菜甫蛋。燒鵝最先上，熱辣辣油水十足，幾時都話新鮮熱辣的燒鵝，幾難食都有個譜。半隻上，碟頭大但原來唔係咁㩒食，一人兩三舊就所剩無幾；東山羊片係老細推介，羊肉連皮，切成細塊，醮由蔥及紅椒造成的辣醬汁，看似好吃，但吃落沒什麼味道，有點失望；牛柳粒給鬆肉粉好好的招呼過，肉味全無，不吃也罷，反而伴碟的蕃茄給香草炒過，味道不錯，所以幾個波友在吃牛柳，我淨吃香草蕃茄；清湯腩大大煲，用上坑腩，半肥廋而又夠軟腍，還有不少是有咬口又厚厚的邊位，加上白蘿蔔及清湯，呢味食得過；以前的咕嚕肉是做得很好的，現在的是一片片而不是一舊舊，差不多全廋，仍脆身，甜酸味也恰可，不過我還是懷念那圓碌碌又半肥廋的咕嚕肉；味菜生根豬大腸，最好味的還是味菜，豬

好耐無幫襯，今晚又拉隊來食飯。近八點還未到一半滿，看來生意並不是十分之好。十個人坐低，叫了十個菜：西湖牛肉羹、一隻雞、咕嚕肉、砵酒焗生蠔、沙拉雞翼、豆豉鯪魚油麥菜、炆斑頭腩、蒸肉餅、金銀蛋浸豆苗。其中咕嚕肉仍然很有水準，茨汁不太厚又不失香脆口感，一致公認是必叫的菜；雞很嫩滑，又夠大隻，食到夠哂皮；砵酒焗生蠔以錫紙包生蠔上碟，有酒香，生蠔炸過亦治味；沙拉雞翼的雞翼先炸熟，再上沙拉汁，香口好吃，效果唔錯，不過碟頭不大，一人一隻實在唔夠喉；斑頭腩有酒香，能同時滿足喜歡啃骨或啖啖肉的食魚之人；飯後送紫米露作甜品，味道不太甜，不錯。可能我地耐唔時都來幫襯，伙記招呼好好，有傾有講仲有求必應。最後果窩紫米露剛好一人一碗，席上有人覺得好食，叫佢再添，阿叔立時奉來半窩，皆大歡喜。連啤酒八支汽水幾罐，埋單八百幾，幾抵食。近十點先見客人陸續蒲頭，走的時候已經有人在等位。雖然呢度只屬街坊小菜館，門面不及一眾新晉食肆，但食物有水準，始終都有一班奉場客的。

這裡的食物真的不錯, 價錢又便宜, 但待應的面口卻扣了一大分, 不禁要說句:"今時今日的服務態度係唔夠!"

果日同三個波友在修頓踢完波來到，叫左炸鯪魚角、菠蘿咕嚕肉、清湯腩、菜甫蛋及臘味炒芥蘭。炸鯪魚角係將鯪魚釀入麵筋再炸，加埋附送的蜆蚧一陣就清碟，值得大力推薦。咕嚕肉用半肥廋去骨炸過再煮，又好快無埋。其餘菜色俱有水準。小菜碟頭不小，五碟菜四個大漢完全夠食，飯後仲有糖水送ｔｉｍ！埋單近四百，幾經濟。要留意就係呢度舊式酒家格局，衛生環境一般，檯布不是太潔白，加上不設禁煙區，故四周煙霧彌漫。