板燒郎燒肉鐵板放題料理專門店 (已結業)

上網見到呢一間餐廳Book位可以免費送一個泰鍋燒！仲推行緊大閘蟹放題，就過嚟食吓啦先講下泰鍋燒，裏面有好多種海鮮仲有阿拉斯加帝王蟹食，再加上喇沙湯底，又可以一邊打邊爐一邊燒嘢食都幾過癮嘅，最緊要梗係免費嘅啦。其次嘅就係大閘蟹啦！大閘蟹嘅質素真係超級好，打開個蟹之後都忍唔住要嘩一聲！入面真係勁多蟹膏架，而且肉汁又鮮甜！真係勁正架！但係每一輪嘅大閘蟹都要等20到25分鐘左右囉！所以如果食得太快嘅時候就要叫下啲壽司同埋刺身食，因為大閘蟹都係即叫即蒸。價錢方面係368+1服務費，睇落去好似有啲貴但係食完個大閘蟹之後覺得真係物超所值！下次都會想再返嚟食過

聽朋友講呢間食大閘蟹真係可以任食，決定成班朋友想你挑戰下可以食到幾多隻！價錢係348加一，除咗大閘蟹之外，仲可以食埋刺身燒肉壽司，但係我哋冇忘記到今日重點嘅目的係大閘蟹！雖然話就係任食，但係每次限叫三隻，同埋等嘅時間都要四至五個字，不過好彩嘅係我哋選擇咗10點鐘之後！可以慢慢食到去兩點鐘添，唔驚冇時間食！其次嘅就係10點鐘之後大閘蟹嘅份量依然都有咁多，唔會話因為太遲入嚟食而斷供應大閘蟹！最緊要嘅梗係大閘蟹嘅質素，大大隻又飽滿，重要啲蟹膏塞滿晒！真係好滿足架！不過可惜嘅係我哋掛住淨係食大閘蟹冇食到原本有提供任食嘅食物，睇下張圖就知道我我哋幾個人究竟食咗幾多隻大閘蟹啦。除咗價錢略嫌貴左少少之外其他都幾好！

見到呢間餐廳有大閘蟹任食，咪過嚟試吓囉！估唔到三百幾蚊嘅質素都唔差！首先梗係要講下我哋重點進攻嘅目標大閘蟹！一開頭上枱嘅時候睇落去都細細隻大估唔到打開之後居然有驚喜喎，蟹膏充滿着成個蟹殼入面！好正，一開頭仲要為職員呃我嘅添，如果唔靚同埋冇蟹膏，可以同返職員講返聲句即刻同你換過。但係食大閘蟹就有少少限制，每一次人頭計三隻，同埋等嘅時間係20到25分鐘左右，不過計返食第一輪第二輪都差唔多來，可以多可以好快回本！唔會蝕底！除此之外仲有啲刺身壽司燒肉同埋炸物全部都任叫！而且味道都唔錯架，綜合來講就可以食到咁多野，三百幾蚊都叫值回票價！

六點幾walkin上到去 ，問職員話因為出面大廳無晒位，話要加20蚊坐"vip"房 ，其實喺門口望都見到仲有好多位，咁我估計可能比人訂晒先叫我哋坐"vip"房，咁ok啦都攰唔想再周圍揾野食，就決定加20蚊！ 原來佢哋所謂既“vip”房，其實係一間有廿幾個位既房，仲要成陣焗味，出面啲空氣仲好過佢，攞野食又遠左，真係唔明“vip”左去邊，又係要搭枱！ 直到離開我哋都唔見到個場唔係full到要叫人坐"vip",！ 食物方面，係普通既！ 要讚既係其實店員既服務態係ok的！算吧，都係無下次！

板燒郎呢間放題我起碼嚟過五次(因為佢個宵夜時段真係勁抵！159咋！)，每次黎都會覺得好新奇。之前嘅長腳蟹放題我覺得係我咁多課題入面最鍾意既，不過今次黎就係為左佢個大閘蟹。大閘蟹食落去味道就一般，但佢勝在你間食肆都幾落足本，可以比每個客人都食到飽為止，我覺得368呢個價錢嘅話都已經真係好抵。而我覺得你間鋪頭其實最好食係佢嘅刺身，佢啲刺身好新鮮，食落去都爽口嘅，非常推介！另外我覺得佢嘅泰式小菜（飛天炒通菜），係炒得非常好食。但係個泰式生蝦就麻麻地，有少少失望，因為幾次黎佢都好似未解晒凍，食落去好似仲係有啲雪味，仲係凍嘅，可能係因為佢出野要好快。另外，如果要改善嘅話，其實我最希望係佢泰式炸蝦餅，或者魚餅，隔離可以加過醬汁，如果唔係就會好似冇乜味。如果要推薦嘅話，我反而會推薦翻長腳蟹放題。不過整體上綜合返晒佢價錢、環境、食物質素、服務態度，板燒郎應該會係我最推薦嘅放題餐廳。

10月18號book25號任食大閘蟹放題 本身book佐10pm任食大閘蟹，9:20pm有打過黎 （人其實已經係佐敦）但我miss call，你唔夠貨都早d講 我唔洗苦等到9點幾 明明book佐去到話無貨 無得食大閘蟹任食 滿心歡喜但無得食 算啦 一場黎到喃住照食放題（10點鐘已經喃唔到仲有咩其他野食係佐敦 仲要係成班fd特登過黎為佐食蟹） 點知......野食少 上野慢 d野又黎唔齊 刺身唔新鮮 唯一可以讚既得壽司 場又亂 係房d人吵到出黎 好似想打教咁 唔會再黎

聽朋友介紹話呢一間放題餐廳居然有大閘蟹食，兩樣都有興趣就決定過嚟食。整體來講嘅食物質素都係唔差嘅，個大閘蟹放題嘅價錢就略嫌偏貴，＋1服務費之後嘅收費係＄400左右。不過食物質素方面就幾滿意啦，先講下重點介紹嘅大閘蟹先啦，蟹膏充足而且又大隻，職員中表明話如果大閘蟹唔靚嘅話仲包換添！不過可惜嘅每次就係只可以限叫三隻同埋要等20分鐘。唯有利用呢段時間去試吓其他嘢食啦，我哋選擇咗蒸氣火鍋去食海鮮同埋食咗啲壽司刺身，味道都唔錯，海鮮大大隻又新鮮，味道鮮甜，食完之後大閘蟹第二輪就到啦！食完大閘蟹之後係出面食返個甜品再加埋一杯薑茶暖下肚就走了，食咗成十幾隻大閘蟹，真係極速回本架。

第一次見放題有得食埋大閘蟹，一於過嚟試吓，估唔到都幾好食！價錢都尚算合理嘅，每人400左右啦入到去坐就有職員幫我地安排左第一輪嘅大閘蟹，等嘅時間係20分鐘左右，呢段時間就出咗去自助吧食啲泰式沙律，味道唔錯架！重點梗係大閘蟹啦！上枱之後即刻打開佢，發現入面勁多蟹膏，真係好正呀！質素都唔錯。另外亦都可以食埋放題啲嘢食我哋選擇咗鐵板燒中途仲轉咗做打邊爐添！食完第一轉大閘蟹之後第二輪就好快就喺枱面出現，完全唔會好耐先出俾你！認真幾好服務而且呢度仲可以食埋泰式料理架，推介嘅就梗係泰式生蝦整體來講都算唔錯，大閘蟹放題任食亦都符合，係等大閘蟹嘅時間比較長啫，食物質素補救到，下次亦都會再黎

10點後入座三個人食，坐到兩點，起扺食，有泰國野，有刺身，仲有燒烤，係邊度塭！！野食都好正，刺身勁新鮮，上菜速度又快，完全唔洗吹單！仲會行泥問你有無野未到，服務態度又好，好有禮貌啲刺身勁正，推薦甜蝦，真係超甜，幫襯過呢間好多次，無論朋友定屋企人都會叫我再同距地食多次係香港可以坐噤耐又噤多款式既放題邊度揾，野飲款式又多，連啤酒都係任飲，酒鬼就啱晒食泰鍋既話真係會食完想再食多次，有海鮮又可以係中間燒肉食，一次滿足兩個要求，仲要海鮮勁新鮮！！而家個個朋友見我上去噤多次都話要上去試下而家香港服務態度好，又快上菜，又唔吹你食完走真係好少有，最重要係每個員工都有十足既笑容，呢樣野真係唔係每間食肆都能夠做得到

見到呢一間餐廳宣傳片有泰式火鍋，一於上黎試下啦，只要一早訂定枱四個人以上就會免費送俾你架啦。二我哋亦都選擇入VIP房間食嘢，但係就要每位加＄20，不過好嘅地方就係有部電視同埋獨立空間俾大家傾計食嘢，條氣都順返少少。泰式火鍋嘅湯底濃郁，第一轉嘅時候海鮮吸晒全部喇沙湯底，真係幾正既！而佢中間亦都可以燒下啲肉嫁，但係發現原來鍋入面嘅海鮮係冇得再添加，唯有自己再叫啲海鮮，但係長腳蟹就一定要加138，升級88亦都有八款任食，大大隻赤蝦同元貝係升級嘅原因，因為加落去泰式火鍋入面真係好好食。刺身嘅質素亦都唔差但係落咗好多三文魚都係比好少。值得一提嘅就係羊架，大大件好好食。服務員亦都好態度，成日幫我地收碟換下鐵板。最重要嘅係驚我哋冇嘢食就會幫我地問需唔需要加野。

第一次來呢一間餐廳，感覺都唔錯下次會再來。本應以為放題餐廳通常都比好少份量，但估唔到呢一間餐廳真係按數量俾你，所以我都唔敢叫太多食物。比較鍾意嘅係佢哋嘅海鮮，海鮮睇落去太大隻，食落去亦都好新鮮，尤其是係青口同埋海中蝦，食完絕對會再叫。肉類唔係特別好食，所以試左小小姐，同埋肉嘅份量太大，燒嘢食嘅時候都要等耐左。最驚喜嘅係放題餐廳居然係會有泰式食品，有泰式生蝦同埋生菜肉碎包，再加上特製嘅泰式辣醬真係好惹味。美中不足嘅就係壽司，紫菜有少少淋唔脆😩，黑松露壽司味道唔太好食。

之前一直聽朋友介紹過呢一間餐廳，今日決定去試一試，都有少少驚喜。梗係講咗價錢先啦，平日每人229+1 都算合理嘅價錢，二我哋就選擇咗升級版+138可以任食長腳蟹生蠔鮑魚等等。好少放題餐廳都可以任食生蠔同超級大隻嘅赤蝦，不過生蠔就一定要燒，而且味道亦都一流，但係好可惜嘅就係等待美食嘅時間太長啦，唯有每次係等嘅過程食住其他嘢等先啦。佢哋本身嘅食物原來有好多，壽司同刺身同出面餐廳嘅質素差唔多啦，反而長腳蟹仲有鮑魚同埋和牛值得推介，升級版名副其實。另外要提一提嘅係服務員熱心嘅態度，收碟收得快，食物亦都會幫你跟齊，幾好嘅一次用膳經驗。

整體來講都係可以接受。食物款類都有幾多下，又有壽司刺身同埋熟食，可以選擇網燒丶鐵板燒仲有蒸氣火鍋，比其他餐廳嘅有多啲花款，抵讚 。食物質素喺放題餐廳之中都算中等以上，雖然未至於去到酒店咁高質素，但係都有幾款食物幾推介，羊架丶和味一口牛仲有泰式生蝦，呢幾樣食物係有一定嘅水準，絕對會翻叫。美中不足嘅就係肉類選擇唔係好多，比較單調乏味。其次嘅就係壽司同刺身，師父擺得整整齊齊又有心思，味道又新鮮到位，反而壽司嘅種類就有好多，唔係對壽司情有獨鍾嘅我都全部叫咗幾件嚟試吓，亦都係有驚喜嘅，和牛壽司好有牛味。價格都係非常平都係，只不過＄200唔使就食四個鐘。

入到去職員同我地介紹左食物同飲品仲有升級版，見到隔離枱啲蟹都大大隻，睇落去都幾好食，就決定食埋最高級嘅138。靚女仲送咗兩隻生蠔俾我哋食添😍😍😍雖然長腳蟹既肉唔係好肥美但係食落好鮮甜海鮮種類都幾多，有扇貝丶蛽丶青口之類夠新鮮，味道濃，但蛽有啲啲沙。刺身同壽司同出面餐廳差唔多，但係最鍾意嘅就係生蝦刺身同埋佢嘅汁。玉女方面最值得一試嘅就係升級版和牛同埋佢嘅羊架，羊架大大件好味而且又唔會有臊味，加埋七味粉就仲正，和牛係最值得推介，有牛味有口感整體來講都算唔錯，消夜時段都係＄159仲要食到收尾，食物質素唔會劣質，到消夜食物種類都好齊全，態度都友善，會幫手收空碟。下次有機會都會想翻返嚟食。

依家都漸漸轉做秋季，突然有少少想燒烤嘅衝動，但係又懶得去沙灘，於是上網搜尋到呢一間餐廳。價錢同普遍餐廳差唔多都係二百幾蚊，睇中呢間餐廳嘅地方就係款式種類比較多，而且都有唔少海鮮嘅選擇，決定過嚟試一試。但係因為冇訂枱去到太多人，所以唯有坐喺度等咗半個鐘，但係前台嘅職員會同你介紹定啲食物拎啲嘢飲俾你坐住等，一有位就叫職員帶我地入去架啦。由於係七點鐘食所以係最貴嘅，每位249+1，坐低就已經選擇左佢哋嘅升級版，而當中佢哋送咗我哋每人一隻燒生蠔，嘢食都幾快上到枱，最鍾意嘅就係佢哋嘅燒生蠔不過佢哋冇得重叫因為免費送，但係食落口感真係好正，蠔味好重加上有蒜蓉嘅配合，食完都會想返尋味刺身同壽司都幾好食，鮑魚同赤蝦都大大隻，＋88的而且確係幾好食不過就貴咗啲。最開心嘅係呢間餐廳居然係有得食生蠔，仲要大大隻，好好味，野食又到齊。抵食