波記粉麵茶餐廳

营业中

休息中

波兒您真係彈得好起喎，又會咁好生意既，由您開業我就睇到您依家，終有爆場既一日喇，恭喜晒 ﹗波仔真係守得雲開見月明，真係比您做起左！近來黎新襯都滿客，粉麵又真係好味既，贏香港仔幾條街！服務及衛生都有改善空間，食物品質非常好味，衰在地方衛生欠佳，而且檯櫈筷子硬係黐淋淋，又無熱茶提供洗洗食具，好可怕。但係侍應們動作始終有點慢，慢條斯理，您急佢唔急。服務態度一般，感覺不太良好，欠主動及熱誠，可能太忙又可能對待遇唔多滿意啦！永不回應既侍應瀟灑叔都唔知您明定唔明、聽到定聽唔到，答句知道都好呀。今日 lucky 地有豉油出現喇，時有時無呢。豉油難得一見，上次見過一次，美國返黎放縱左兩星期狂飲狂食，睇黎要花點時間調節一下。炸醬牛丸粗麵走蔥，牛丸重口味，落味略咸，質地結實微爽似牛筋丸多過牛丸，肉汁微滲，愛咸的食客應該非常滿意。炸醬甜甜地又唔漏，厚薄適中，滿意。粗麵乾爽較彈牙，唔會腍劈劈或有黏黏感覺，撈上甜炸醬及肉絲入口，滋味無窮，而且麵底份量也不少，飽飽啊。黎個新奇配搭，甜炸醬混辣椒油先 ﹗波記堅持無豉油供應喎，為左慳錢？唯有淨食辣椒渣啦，中辣程度好鬼正，而且夠晒香口，大愛。半甜半辣奇味特別，不錯既發現

一間隱世小店，行過都完全唔覺眼嘅食肆。其實呢間嘢係朋友介紹，所以入去試試，就發現原來係好嘢。夜晚肚餓，就入去食碗麵，醫下肚。叫咗碗墨丸牛肚河。墨丸呢家嘢好難好食，因為大部分都好粉，冇味，難得波記墨丸彈牙，唔假，牛肚用金錢肚，又夠淋！價錢又平，值得一試！

波記係我寫嘅第一篇食評，咁好食嘅嘢應該俾更多人知先啱。要支持小店！我今次嗌咗個麻辣豬潤米線（少米線），—杯凍檸賓，一碟沙薑雞併牛肚，一碟菜。掛住食,無影相，價錢都過得去。辣油夠哂辣，估唔到麻辣係另一種感覺，好食過x仔多多聲。辣油好香，見隔離枱都筆咗一大羹，o的辣係慢慢攻上黎，辣得過癮，啲雞要老闆斬嘅先靚,今次啲雞賣相又好味道又夠，唔太咸又有沙薑味,牛肚夠爽口，無筋，加埋醋同辣油，吊起哂o的鹵水味，正。油菜（菜心）無咩特別，同其他茶餐廳食嘅－樣,都係睇個日啲菜靚唔靚。一句講哂，波記嘅辣係得嘅！食過就知咩係辣嘅巔峰，味蕾打開哂，辣得過癮！黎咗幾次都係一個人,下次都係約埋班friend黎呢間都唔錯！

今日唔係咁舒服，經過波記就順便食埋嘢先返屋企,叫咗碗淨墨丸,事頭竟然送多兩粒牛丸同牛肚俾我，食完嘢又覺得無咁攰,啱先啲嘢便就我食呀~叫咗沙薑雞河同油菜,雞有雞味，唔鞋，今餐大滿足。返歸。d牛肚爽口，最好食係墨丸,彈牙，食得出唔係淨用粉溝出黎，有粒粒墨魚肉係入面，好味。

本想去食味皇麻辣車仔麵加豉油雞髀，但要行好遠又趕時間，經過波記見有位就是鬼但啦 ﹗旺左好多，黎親都幾乎滿座，多左好多地盤佬同大陸人喎。每次黎幫襯都勁多大陸遊客，好受歡迎喎。侍應及師傅們唔同晒樣既？轉左手？不過環境一次比一次污糟，有點可怕！要改善改善啊 ﹗以後都係行多幾分鐘去波記食麵喇，香港仔魚蛋越來越難食，天與地既分別！淨牛腩走蔥，非常一般，不過不失啦，滷水炆得入味而濃，不過太瘦喇，有點乾鞋，肉汁欠棒，腍就夠晒腍，但不彈牙鬆化。墊底生菜依舊厚而粗糙，感覺唔到清甜爽嫩，麻麻地。豬潤牛腩伊麵走蔥，紅磡 $40 蚊碗雙併伊麵，都好合理。波記牛腩、沙薑雞、生菜雖然麻麻地，但發現其他出品都非常出色喎！繼魚蛋、牛雜、雲吞、冬菇後，豬潤都好正！夠晒爽嫩肥美又滑溜溜呢，不乾不鞋不過老，仲濕潤飈晒肉汁，高質！牛腩依舊瘦猛猛，滷水味道雖好但質地唔棉滑就好敝呀！伊麵剛剛好，完整夠爽滑，無過腍無散筲筲，合格。魚蛋冬菇麵走蔥，嗜辣像毒癮一樣！忍唔住又去飲辣椒油，尤其當您情緒低落時。冬菇？一向只係車仔麵檔出現，居然比我係波記遇到，即刻整返碗試試先得。湯底帶淡淡冬菇香味，幾得意喎，冬菇湯好飲。冬菇滑溜彈彈味濃，好好

淨雲吞走蔥，皮薄餡靚，白裡透紅，賣相誘人。蝦仁、豬肉各展所長，結實而鮮味，整體偏濃味，配上清湯炸蒜同吃，增添一點蒜香味，十分滿意。我叫左走蔥兩次，大陸阿姐侍應死都要落蔥架喎，搞到成碗湯都係蔥味，討厭 ﹗掉晒落枱您咪又要執手尾 ﹗沙薑雞半隻，重口味勁咸，醃左幾多日呀？肉質又鞋又油無雞味，試一次都兼多。差不多 $90 蚊真係唔值囉 ﹗我寧願用 50 蚊去買半隻白砌冰鮮雞一定好食百倍。紫菜四寶麵走蔥，碗麵想點呢？賣相好可怕喎，好似強姦完先比我咁，唔係倒瀉左再執返麻？蔥同紫菜打晒交，撈埋一齊，想揀鬼死我咩 ﹗我都話走蔥、走蔥、走蔥咯 ﹗我都忍唔住要直接問個大陸阿姐侍應，點解次次叫走蔥都唔走蔥架？佢扮聽唔到，唔答我囉 ﹗係咪唔明走蔥點解呀？貫徹始終永不走蔥！我對住大陸阿姐侍應最少講左三次，佢都一於好少理 ﹗睇黎就算講十次佢都係借左聾耳陳隻耳，我聽您唔到、我聽您唔到。又要我挑晒出黎掉係枱面 ﹗我本來想食炸醬麵架，又會咁巧合賣晒既。紫菜四寶麵走蔥， 試兩啖湯先，湯底明顯有少少鹼水味，麵底過冷河過得唔夠乾淨喇，麵質微爽，麵底份量十足，掛著大量甜美湯汁，不定啜入口，滿意。潮州白魚蛋正呀，勁彈又重魚味，豬

去完銀行已經 13:45 喇，剩返 15 分鐘食飯，剛好見到對面開左間新麵檔喎，波記，茶餐廳，去試試啦﹗附近好食既潮州粉麵都執晒笠，希望依間唔會今我失望啦 ﹗好采有位坐，環境免免強強合格。感覺上好混亂，由帶位、寫單、入單、傳菜到埋單都非常唔順暢，樓面阿姐同收銀都好生手呢。牛什麵走蔥，因時間關係唔可以諗太耐，求其快黎碗麵先。飲啖湯、食啖麵，好味喎 ﹗好過香港仔好好。唔洗再幫襯難食又貴又頸渴既香港仔魚蛋喇，但要行遠少少。牛什又腍又入味，牛膀夠棉又嚥韌、腸內嫩外彈、金錢肚爽爽爽。湯底香甜濃郁，麵質爽彈無得頂啦！無投訴。當然要試試自家辣椒油啦，無辣不歡既我辣椒油先係主菜。深啡色既辣椒油睇落平平無奇，但咁鬼辣既？激辣，辣到我額頭背脊都飈晒汗。我要每啖麵都有辣椒渣一齊送入口食架，咁先夠嘆麻！。蠔油唐生菜，菜葉唔夠嫩，有點韌同粗糙又唔夠鮮甜囉，一般。