泰原味

营业中

休息中

第一次嚟呢個商場，搵野食下，見到有泰國嘢食好似唔錯，其實唔完全係泰國嘢，類似茶餐廳，有啲快餐飯食例如椒鹽豬扒飯。另外有炒粉麵飯有湯河。冬蔭豬頸肉炒河睇落就似冬蔭功，但睇落好濃味，都幾辣，又少酸，幾冬蔭功。河粉都炒得幾乾唔算太油。椒鹽豬扒飯有5-6舊冇乜汁好dry湯河份量好少，河粉得好少，丸都係得兩粒，舊豬扒就還好啦普通。加錢小食炸雞翼3隻炸得好香脆，點個醬幾好食。都幾多人食，滿晒座，普通食個快餐都ok

屋村商場港式泰國餐廳，吸引好多附近學生、工地工作者或家庭主婦。由中午12點已經開始排隊，點餐後亦要等15分鐘左右，忙過不停。今次係第二次食，質素及味道都唔算出色，但比上次進步多了。食物方面 - 海南雞濃湯米粉︰湯底帶點牛香，少許鮮甜唔咸，雖然有味精但可接受。米粉份量充足，爽口彈牙又掛湯，整體食落好舒服。凍身海南雞分開上，幸運地得到原件厚身雞脾，多肉無肥脂肪。中間骨位血色煮後仍然輕微紅色，應該係新鮮雞肉，蒸煮時間剛好所以肉質爽彈，有雞油香。另外要讚賞海南雞醬汁，酸酸甜甜偏辣，可以平衡雞油膩又開胃，套餐性價比較高。附加小食 - 串燒雞︰雞肉邊位烤得脆身有焦香味，肉身調味剛好又唔太咸。質地嫩滑，唔會燒過火以至變柴肉。菠蘿雞絲炒飯︰飯身粒粒分明，而且成碟都好上色。以為好濃味，原來，係完全無味！份量雖然夠多，但真係食到個口都寡晒，性格比極低。

連續講咗兩次，要豬髀飯，阿姐仲好冇耐性話聽到已經落咗單啦，但最後都係落錯單，俾咗海南雞飯我。跟住等咗一大輪，我碟豬髀飯終於到咗，跟住叫阿姐半分鐘收據，問咗幾次都冇人理我，之後第二個侍應話唔使換，因為價錢一樣，既然佢咁講我都以為一樣，直到坐我對面個男仔打開個餐牌，我先至見到原來兩個價錢係唔同，豬髀飯係平兩蚊（海南雞飯$54 ，豬髀飯$52）。到去到收銀嘅時候，都依然堅持係要收我貴啲嘅$54價錢。本來係好小事，但係個阿姐由頭到尾都勁冇耐性，唔好意思亦都冇一句，作為長期客仔嘅我好失望，以後唔會再嚟。

路經此地，寫下食評😆其實佢嘅野食大部分同普通茶餐廳差不多😬🔵 泰式炒金邊粉（$42）🍜 送熱飲（熱奶茶）👉 金邊粉炒得都算乾身👉 走左蝦🦐之後睇落好似好少餸咁😆👉 金邊粉既酸甜度可以濃啲會更加好🔵 粒粒西多士（$32）🍞 送熱飲（熱奶茶）👉 下午茶嘅份量黎講都大份抵食，都有五六件👉 炸得個邊係有少少脆嘅👉 牛油同啲奶比較少，如果比多啲會好味啲整體上菜速度快，份量同味道就不過不失嘅，不過就未必會再食啦…餐廳嘅入面冷氣幾大，野食好快凍左，所以黎到要即刻趁熱食😁

今晚經網上外賣平台外賣自取叫五個飯，其中有兩個小菜網上外賣平台嗰度講明有附送飯嘅，但係拎到返去嗰兩盒小菜都冇跟飯。之後打電話去希望補返呢兩個飯，(途中聽到聽電話嗰個同事同經理講「又係呢啲小菜無跟飯嘅情況」)，點知嗰位何經理黎聽電話話係網上外賣平台寫錯，叫過佢地改都未改到，竟然咁樣推卸責任俾網上外賣平台。何經理態度十分惡劣，唔單止唔肯補返嗰兩個飯，而且仲話歡迎我地投訴佢。好嬲，住附近都唔會再幫襯！

唔明普普通通一個餐 點解次次外賣都可以等成二十分鐘最少第一次同職員話催下我個餐 就同我話好快出來 第二次同佢話等咗成二十分鐘啦出得來未 先問我攞霖把叫同事去廚房 又等咗幾分鐘 一句說話都冇 最尾要同佢話退單 先至入廚房同啲同事講 之後出來又再叫我等 前前後後等咗差唔多半個鐘先攞到個餐究竟一個星洲炒米有啲咩需要做咁耐？我後面幾個霖把都係等咗十五分鐘左右 真係等到令人火滾

炭燒泰式豬頸肉 - $58燒完都仲係好Juicy豬頸肉唔會好韌或者鞋口而且個邊都燒得幾脆泰式鮮蝦金邊粉 - $68好夠份量個味都幾好酸酸甜甜咁而且濕度啱啱好蒜蓉炒通菜 - $68正常發揮不過略嫌少少油膩黑椒美國牛仔骨 - $68本來以為係得一個餸咁樣點知原來係跟埋個飯即刻好似好多嘢食咁牛仔骨整得都幾淋個汁都幾濃味係要用啲飯送會好啲椰汁珍多冰 - $9椰汁真係好邪惡但好香好好飲-凍鹹檸七 - $10朋友叫嘅大熱天時飲都幾消暑不過可能坐門口位都幾熱下而且周不時都有嘢飛飛吓有待改善

今日叫左外賣返嚟食，點知開左係蠔仔湯飯沒有湯，我叫咗四個餐，而四個餐袋哂一個袋，如果大家叫幾個餐外賣，而會叫蠔仔湯飯，一定要分開，因為員工包得唔好，大家外賣要小心，會中伏，已經第二次經驗，第一次算數，但第二次真係要提醒大家。

一連兩日都食左兩間唔同泰國餐廳既海南雞飯同豬頸肉。唔知係咪因為有比較先有傷害定呢間野真係伏呢～睇返之前既食評再加自己食後感～結論～～～～堅伏雞飯首先無得轉脾位，其實小事。但碟飯上枱有少少唔太靚仔，份量都還可以，飯比較乾身，雞就水平以下啦～～～豬頸肉就好似香口膠咁，鞋口到一個點。職員態度就一般啦～但我20:00去食就已經好似趕客咁～後生既職員就幾好～上野食會幫手整理下張枱。總括嚟講，下次真係不了不了～

門面以為係泰國菜，泰國餐廳。實質根本係三流茶餐廳。普普通通嗌咗個菠蘿炒飯，第一次食到濕炒飯，d飯係結一團，好似係屋企煲飯落多左水一樣，濕度入唔到口。成個飯都無無味道，所有海鮮剩係得魷魚同兩隻急凍蝦。不了。平價嘅泰國餐廳大有存在，但此間影響我嘅認知。經理仲要同我講今日師傅失手，還是一向水平如此？工作了一整天都只想食好一餐，要是無心經營，那為什麼還要堅持下去？荼毒大家嘅胃口，我可能其他菜式比較出眾但留侍其他人嘗試嘗試品評品評下

好耐冇嚟調景嶺「泰原味」食下午茶，今日與 honey 逛商場經過，見有位便一齊入嚟嘆下：👆🏻“泰式鹵水豬手飯”～鹵水汁煮得夠濃味，豬手肉質略有點鞋，但豬皮煙煙韌韌，感覺好似食咗膠原蛋白咁，配埋粒粒白飯及半隻蛋，夠晒份量飽飽！😚👆🏻“冬蔭海鮮蝦湯金邊粉”～冬蔭功湯底調味剛剛好，唔太酸太辣好醒胃，🦐有幾隻都算彈牙，配襯金邊粉一齊食，味道好夾！😃👆🏻餐飲“熱鴛鴦、奶茶”～茶味都頗香濃，口感唔錯！😘

諗住食個下午茶見到呢間鋪都夠大睇落正常就入去食下嗌左下午茶入面既泰式炒金邊粉等左10分鐘就出來一見到個樣真係打個突完全同我食過既賣相差好遠食落去完全無炒金邊粉既感覺😓😓😓完全唔係即炒，只係蒸熱番出比客咁大佬呀你唔識整咁樣賣比客真係無回頭諗住唔想食飯食個粉都可以咁敗筆呢間餐廳有個阿姐好似遊魂咁人地隔離枱嗌爭一個野食未到(講埋個野食名)跟著行開返黎問人地飲乜嫁？個客就話黎左飲緊都唔明佢問飲咩做乜然後出去賣單見到有微信支付寶貼貼我就問係咪有微信收銀個阿姐就話係咪比現金? 現金或者八達通?完全無視我講野我就話我見到你地有微信個貼貼以為有跟著先講話部機叉唔到電用唔到所以話現金定八達通呢間野真係無下次

又係調景嶺呢一個美食荒漠，見到有間泰國嘢，就入咗去試吓，點知非常之失望。美食荒漠果然唔係名不虛傳。安格斯牛肩湯河粉（轉金邊粉）$38其實就咁睇賣相都知道唔好食😅啲肥牛韌到好似橡筋咁，咬極都咬唔斷，真係勁難食。湯係冇味，仲要一嚟到碗麵已經脹晒，冇乜湯😅真係勁劣，唔明點解好地地一碗泰式湯河都可以煮到咁。啲金邊粉一pat pat，難食到喊。雖然價錢唔貴 $38 ，但啲質素係仲難食過街邊檔$20碗嗰啲河粉。簡直係可一不可再！食食吓仲要發現多咗粒通粉😅成件事真係勁奇怪…

調景嶺不嬲都冇乜嘢好食🥲所以求其叫咗個外賣自取. 我哋今日叫咗兩個下午茶餐，一個喺乾炒牛河，一個喺炒金邊粉，飲凍華田同凍奶茶. 等咗20分鐘左右就叫號，似喺即叫即整. 食物方面，乾炒牛河夠味，牛肉都軟身但冇乜肉味，最欣賞喺成碟河粉都係熱辣辣嘅. 另外係泰式金邊粉，炒得乾身，正正常常. 2杯嘢飲拎到返屋企都仲有冰，只喺淡味少少，叫咗少甜都覺得偏甜. 呢間泰國嘢下午茶都算OK，正正常常，外賣嘢食都做到熱辣辣，都欣賞.

平時好少嚟呢邊食野，就係咁就中咗伏了！諗住買個平平地既外賣冬陰功炒飯加紅豆冰返屋企食，等咗15分鐘外賣都覺得唔對路，其他外賣客都走晒剩返我未有，啲職員淨係話「我幫你跟跟」就走咗去，唔好意思都冇講聲，最後等咗超過半個鐘😾🔥!講返食物質素方面，個紅豆冰勁死甜味，一粒冰都冇，仲好意思加$6🙂個冬陰功炒飯只係普通炒飯，一啲冬陰功味都冇，啲雞榎歰歰🤮！總括而言，員工同埋食物質素都好垃圾！絕無下次！泰伏了！