潮隆泰

营业中

休息中

因為要上瑜伽堂，所以雖然到咗晚飯時間，但係唔可以食到好飽，於是就諗住食碗廣東麵，就入咗呢間舖頭。我哋兩個人一個就叫咗牛筋米粉，另一個就叫咗一碗雲吞粗麵，佢加$10就有油菜其實好抵，不過真係唔可以食到好飽，所以冇叫到。先講碗牛筋米，牛筋好腍好入味，佢啲牛筋都幾幼，牛筋嘅數量都多嘅。至於碗鮮蝦雲吞麵，雲吞都幾大粒，啲餡都幾新鮮，尤其是嗰隻蝦，味道唔錯，可惜碗麵有鹼水味，可能係師傅太心急出差，所以未chok乾淨。

牛雜幼麵（$35）凍檸檬茶（+$8）4片金錢肚（尚算厚身，有𡁻口）、1舊肺（還算彈牙）、2舊粉腸（沒有肥膏，但粉）、1舊竹腸（可惜沒有肥膏）、1片膀（唔太粉）；麵底有些少鹼水味，可接受；湯底望落比較深色，但味道唔太咸（之後沒有特別口渴）。整體可以，合格之作。

本來沒有寫食評的習慣，想不到第一個食評就是分享十分差的體驗。天氣太熱了，一枝公在荃灣做完嘢諗住是但搵間餐廳快快趣食就算，已經沒有什麼要求。經過佢門面就入左去～叫咗一碗坑腩雲吞米多蔥，碗米未到之前阿姐俾咗張單我。我睇左睇張單寫住$68,咁我就問阿姐：點解貴咁多？阿姐：係咁貴㗎，我地得崩沙，無坑腩賣。（極冇禮貌）我：咁同我轉返普通牛腩。碗嘢未到我都廢事同佢嘈，為免自動申請被加料。但我心諗你冇坑腩賣咁你好正常都會同個客講句，而唔係問都唔問落碗崩沙俾人。一來兩者部位唔同，九唔搭八。二來做生意唔老實，叫碗最貴既俾你想博你唔出聲。（因為我留意到其他人嘅單落完個阿姐會立即print張收據俾客，但我張收據就差不多等到碗嘢到先俾我。等到碗嘢到，我叫嘅米粉竟然嚟咗碗河粉，咁我就再叫個阿姐嚟問。態度依舊極差嘅阿姐：寫咗米粉㗎（張單明明寫錯係河粉）。呢個時候我已經冇咩耐性，只係同佢講唔使換啦照食，因為我肯定就算佢轉俾我都有極大機會加料😂而碗嘢味道就好難食，尤其啲牛腩，有幾舊明明好肥，但係食落口就非常韌，亦都冇正常粉麵舖嘅牛腩肉味。雲吞入邊嘅蝦肉食落係霉嘅，只有個湯底算係正常。結論：食物味道差，對待客嘅態度更差

去買餃子同牛丸，餃子唔知係邊到成盒攞出黎，急凍好硬唔知雪左幾耐，而唔係雪櫃到執出黎牛丸話買40蚊，又執成60蚊迫你買多D，我話唔要就黑面放埋一邊收完錢唔理你，邊袋嘢係自己都唔知大家係呢間買生料要小心餃子同牛丸個味道同隔離街果間*潮龍園*一樣2個呀姐態度都勁差2間都永不幫襯

原本對粉麵店無咩太大期望，見佢平平地又食得飽就入左去，點知一食真係喜出望外！ 叫左魚皮餃米粉$28， 加生菜$10, 係我食過暫時最好食的魚皮餃，大隻得黎又實淨，皮好彈牙，肉味道不錯！我鍾意佢個湯麵本身有蒜味，佢會俾一spoonful 的蔥蒜你，香好多但又唔會好味精。 菜都好大碟，唔要蠔油可走左佢。一定會番兜

一直好鐘意食粉麵類，今次經過荃灣，就比佢門面光鮮亮眼嘅招牌名同黃黃橙橙既顏色所吸引到。直覺佢應該幾正宗同味道幾好，不出所料，食完覺得佢真心唔錯，相比類似嘅較平價粉麵店當中作比較，佢算好食個類。柱侯牛腩河$32牛腩好入味 又夠腍身 肉既部位個半肥瘦 仲帶少少筋 格外美味。配埋個河粉 真係好滿足。爽滑牛丸河$32優質牛丸，彈牙得呢，牛味好重，調味恰到好處，真心好食。散叫打邊爐都正呀五香牛雜麵$32牛雜 係正常水準 煮得幾入味 又唔會話煮得太林 份量都算足 有好多舊 腐乳通菜$10菜翠綠，口感脆嫩，配上腐乳醬鹹香，幾好食但有d鹹。

下次可再食、價錢合理、環境衛生！嘗試食吓其它款式，想試雲吞、水餃等等。加$12蚊就有凍檸樂，算低食！好好味道！太多選擇！大家不防去試吓，價錢唔貴，叫另外，佢哋啲麵少許鹼水味，比起其它店舖算少！

做完運動經過呢間店，應該新開無耐，望落去幾乾淨企理加上門面幾光猛，就入去試。價格公道，崩沙牛腩雲吞扎肉味道都唔錯，麵底亦都彈牙，你張相朋友睇，話扎肉正宗潮州。可以再來

叫咗兩碗三併：牛什/水餃/肉丸米 + 墨丸/崩沙牛腩/雲吞麵再加咗個炸魚皮同埋通菜好味！各類食物都做得好👍🏻地方清潔、員工友善～好耐未食過新鮮脆炸魚皮啦😁😁