百份百餐廳 (藍灣廣場) (已結業)

题外话/补充资料： 當日與一衆友人在藍灣打完波, 諗住去茶記食個 Tea, 隨意走入呢間 "百份百(惡頂)"餐廳, 展開了1小時10分鐘的奇幻經歷: ~ 事件一 我地一行五人大概下午 5:45 到餐廳, 一心想食個 Tea, 走入去座低, 見枱面無 Menu, 於是問 Waitress 攞, 點知... Waitress: 無 Menu 我地: 咁有無下午茶 Waitress: 無 我地: 唔緊要食晚飯都 OK, 咁唔該晚飯 Menu 呀 Waitress: 無喎, 廚房未準備好, 所以唔可以派 Menu... 我地: 咁我地要等到幾點? Waitress: 6點... ... 於是我地唔想周圍走, 所以默默地等到6點, Waitress 們慢慢地派 Menu, 而我地就落單叫嘢食 .... 我: 唔該咖哩牛脯 (因為係 Menu 上的推介) Waitress: 無喎 我: 咁另一個推介 "拿破倫海鮮炒飯" ... 過咗 25分鐘, 我嘅炒飯仍然未出現, 其他朋友都差不多食完 ... 我: 唔該我地仲有個 "拿破倫海鮮炒飯" 未到 Waitress: 無炒飯喎 (非常悔氣) 我: 點解唔早 d 講, 要 25 分鐘後我問你至講, 咁我可以叫乜, 叫2樣你都無 Waitress: 叫小菜呀, 呢2行小菜你可以叫, 我地識整 (非常惡, 指住個 Menu, 要我馬上決定..., 仲不断催促要馬上落單...) 我: 你走開, 我睇完一陣叫你 (真係火都嚟...) Waitress: 廚房唔識炒飯, 你叫炒飯, 我唔知會比 D 乜嘢你食嫁 (好大聲, 好無禮貌咁講, 仲不断重覆... 一路行開) ... 轉個頭, 另一個 過來 ... Waitress 2: 唔好意思, 我地無炒飯, 你叫第二樣... 我: 唔知叫乜, 叫乜你地都無... (已經一肚氣...) Waitress 2: 咁不如你叫咖哩... 我: 我一坐低就叫咖哩, 係你地話無, 你而家又叫我 order 咖哩??? (已經成肚氣.. 無氣閙...) 咁就咖哩喇... 事件二 當日有個斯文靚仔座响我地附近比我地還早到, 叫咗好多次抺枱都無人睬佢, 後尾 Waitress 派 menu (份 menu 係飛落佢枱面), 靚仔再叫 waitress 抺枱, waitress 只係問佢係咪2位依然唔抺, 靚仔堅持要佢先抺枱, 一路抺枱, waitress 一路念念有辭: 我點知你係咪啱啱食完嘢唧, 所以我咪唔抺囉..., 枱抺完了, 靚仔起身拂袖而去... 事件三 有個伯伯眼見 Waitress 咁大聲恐我話無炒飯, 又見自己叫嘅炒飯未到所以追單, 點知 waitress 話整緊, 碟飯到咗, 只見係一碟有個啡色汁淋在响上面嘅飯, 顯然無炒過... 伯伯食咗幾啖就走... 慘! 事件四 有個城巴車長到收銀埋單, 同收銀講 : 我個飯好耐都無嚟, 收銀居然惡過車長, 仲大聲話: 咁你有無追呀! 車長回應: 追咗好多次, 係你地無理過我 (氣沖沖走咗...) 事件五 門口有人攞飛等緊位, 但有人無攞飛就行入去, waitress 們還安排座位比佢, 令門口等位人仕極為不滿...

题外话/补充资料： 如果10分係滿分, 咁呢間餐廳既分數之低直情可以攞到諾貝爾數學獎, 以表彰其發現新負數值