輝記盆菜

营业中

休息中

上個星期日食過! 冇留下樓主講過咁差， 如果要食山珍海味， 呢間就唔啱你哋 我想食 懷舊嘅味道 而家真係好小食到， 佢嘅味道 南乳味好重但係又唔覺得好咸， 起碼唔會 食完係咁飲水， 最鍾意食佢嘅腩肉有啲肥肉好食啲， 豬肉汁都好香，冬菇都好大隻 門鱔乾都好食 但係好多骨 食要小心啲， 我哋叫咗一個大盆 十個人都食唔曬， 份量都好多 掛住食唔記得影相! 整體都唔差👍， 我個人喜好 唔係好鍾意食嗰啲 新式嘅盆菜😅 有龍蝦 帝王蟹嗰啲 嗰啲味精好重 食完係咁飲水🤣🤣🤣

未試過咁難食既盆菜，簡直不知所謂又貴又難食（屋企人訂的）咁既價錢大把選擇成煲野無鮑魚，無瑤柱，無花膠，無鵝掌，無海參，無蠔豉髮菜，豬手都無最貴材料得雞同蝦，12人份量賣$1400，咁既價錢大把選擇，而且至少都應該有鮑魚貴都算啦，最慘係連d雞都鞋，蝦又唔新鮮「梅」，d腩肉又炆到梅梅爛爛咁⋯低下一大堆白蘿蔔⋯好彩當日訂左兩個盆菜，另一個有齊鮑魚、花膠、海參、鵝掌、蠔豉、豬手、鹵水鵝，雞、蝦⋯8人份量都只係$1080⋯⋯最怕貨比貨

小編唔係第一次食盤菜，食過其他盆菜，味道都唔會咁差，當時我仲未成為食評家，今年年頭食過旺角某間餐廳盤菜！味道好好食！今次有人請我入元朗國，間有幾出名。以為有幾高質，真係比埋曬d咁既野比客人！最基本雞，我唔係話要咩走地雞、嘉美雞、最低限度起碼要放得落口咬得到！雞肉孩過擦子膠。咬唔到，真係俾啲咁嘅客人，唔好啦！啲腐竹又冇味，好似求其咁碌兩碌就上碟咁，真係令人唔想食！蘿蔔又苦！蝦又一啲都唔新鮮，我去宜家傢俬買d蝦好過佢！上次食嗰間盆菜新鮮過佢！人哋又乾瑤柱，又有西蘭花，咁大個盆菜，整到咁，執咗都唔可惜！唔明啲人成日話呢間有幾好食！完全唔見得！市區啲盆菜仲好食過佢！直頭可以比零分

好味指數😋😋回頭指數⭐️⭐️開心指數🤗🤗新年最啱大伙兒食嘅梗係盤菜啦... 今次試咗元朗國嘅輝記盤菜！大盤菜（12人 / $1,698)呢個盤菜有10種食物：1）貴妃雞（1隻）2）8頭鮑魚（12隻）3）豉油皇大蝦 4）家鄉炆扣肉 5）蠔炆豆卜 6）醬汁豬皮 7）蠔油支竹 8）美味魚旦 9）蠔油花菇 10）清甜蘿蔔盤菜打開時勁開心，真係好大盤，見到鮑魚、蝦、花菇都幾大隻，好足料！可惜有隻雞原來係勁中伏😖😋好味推界😋No.1: 家鄉炆扣肉，呢個真係超級好食，扣肉一層肥肉一層肉咁，好淋個汁好味又入味，全部人都大讚👍🏼No.2:醬汁豬皮，又係因為個汁，入味到爆燈，一咬落去豬皮少少爽又有汁飛出嚟，正呀😋🤢中伏之作🤢No.1: 貴妃雞真係超中伏，因為冇咩味之餘，隻雞係嚡到不能，接近咬唔開嘅程度，真係牙力大考驗，完全難食到不能接受嘅地步😖No.2: 清甜蘿蔔係一D都唔入味，又唔清甜，有D硬仲要有根，好失望！😞整體上只有尚可程度，性價比唔高，咁樣嘅價錢可以有更好選擇....其實佢嘅汁係幾好味，所有用汁整嘅都幾出色，不過佢唔會俾多D汁你（因為有D盤菜係跟多支汁），我哋問佢，佢係話唔使再俾，但其實去到中段都未

農曆新年時間，仍然住喺大埔圍頭啲長輩級屋企人就叫咗盆菜到會嚟食，雖然年年都會係咁樣做，但係都唔會覺悶，因為都總有意義嘅。之所以要食盆菜就係因為方便大家一班人圍住嚟食，家陣的盆菜乜嘢奇形怪狀嘅食物都有，用古靈精怪嚟形容就係最貼切不過但係我哋呢啲傳統嘅盆菜就係有傳統嘅食材，支竹、蘿蔔、豬皮、生菜、芋頭、冬菇、魚旦、發菜、蠔豉、腩肉、雞、蝦、呢啲食材都係缺一不可 ; 味道好唔好食係其次，最重要就係夠好意頭。盆菜好簡單，但係製作就複雜而且最緊要係用心去做，呢一間嘅盆菜就做得唔錯，因為啲腩肉同芋頭都好入味，豬皮又夠淋又入味。好食。

首先要教大家元朗站去唔好係H出口行去，正路經yoho mall2 鳳琴街一落就係。之後再提醒大家呢度無堂食，一定外賣自取架。我11月4日新居入伙班朋友嚟搵我，入元朗唔好問我有無養牛，但一定要問有咩盤菜ok。我住朗屏果邊，近近地有間萬字頭的盤菜，果間細盤菜都一樣760，眼睇好似大盤d，又有芋頭同好多肥腩肉,不過我都建議食呢間。無他贏咗係盤汁到，尤魚同魚蛋入味d。話就話細dd,但4男2女一齊食都食唔晒，多2個嚟就清得晒咁。

以下內容及相片全部出於我手機，唔好屈我抄襲:人地來我新屋參觀，有4男2女食一個盤菜係食唔晒盤細size，多兩個人應該清到，所以整體嚟講預100蚊1食一餐啦。話說回頭，元朗美食一定要講盤菜啦，由於我住朗屏，本身近近地有間萬里x。果間同樣價錢大盤d有芋頭多d肥腩肉,但呢間d汁就濃d，而且有尤魚魚蛋等。如果我再選我都會選輝記。提下大家間野沒有堂食，同埋唔好理呢度寫h 出口行去，最好yoho mall 2 去鳳琴街橋落，否則行多好多路。

每年都會食好多盆菜，但食咁多間呢間整得最好。雞好滑，豬肉，東菇，羅白炆得夠淋夠入味，猪皮好爽。啲汁用黎撈飯，一個字-正。雖然盆嘅菜式唔多，但咁先係正宗，極力推介。

臨急臨忙要食盤菜,經朋友介紹,第一次食輝記盤菜,果然無介紹錯~由打電話訂購,到取貨,最後食完,完全有讚無彈~十三人一致通過呢個盤菜非常好味,不會很鹹也不會很淡,味道合適,最重要:用料份量十足,好大堆頭,唔會碎濕濕,寒寒酸酸~相中盤菜有兩款鮑魚,其中一款較淡色,是自己加落去(因為有人萬歲)先細說盤菜內容:雞不是白切雞,是店家秘製過的鹹雞,鹹鹹香香,新年食咗幾日雞都唔覺悶.蝦提供是海蝦,肉質爽,不會綿綿爛爛炆豬腩肉,是真正五花腩,肥瘦很均勻,也不會很肥膩,很入味,入口即化,好軟嫩,每件都有如手掌心般大,也很厚肉(不計算手指位).白蘿蔔,豬皮,枝竹,花菇,都很有份量,全部都大大件,大大塊,不會碎濕濕,豬皮有半隻手掌心位大,整整齊齊,夠軟焾而不會綿綿爛爛,是一正塊,尤其是白蘿蔔,一件等同其它店嘅盤菜兩件,花菇厚身,大隻,又爽滑,枝竹條條都夠焾,沒有硬塊,這幾樣吸收晒腩肉汁,非常好味道,令人津津樂道.而當中最令大家驚喜除了豬腩肉,蘿蔔外,原來就是魚蛋,粒粒有如超大草菇一樣,非常爽口彈牙(新春關係,盤菜沒有魷魚,因為炒魷魚不吉利,所以用魚蛋取代,反而好有驚喜).

連續幾年初三都會買盆菜到奶奶家團拜，以往都是買別家的盆菜，因為奶奶聽說口碑不錯。試了幾年，今年決定轉一轉，試一個元朗人推介的盆菜。這間初三只做大盆菜，$1498有十隻鮑魚，要4時後才可以提取。相比起以前那家，提貨的時間比較晚，價錢略高，但這裡的盆菜有鮑魚，所以算起來應該差不多~ 4點多拿到盆菜後就開車往奶奶家，到達後6點多才吃，用爐翻熱前都還是暖的。一打開，嘩!!! 賣相比我早幾年買的那個要漂亮很多，非常足料!!! 香妃雞非常嫩滑，還有超級大隻的蝦!!! 非常喜歡他們會把蝦的腳和頭的觸鬚位置去掉，吃起來非常方便，真的很貼心!!!主角之一的鮑魚有十隻，炆得非常淋，所以一分鐘便被搶光了!!! 豬腩扣肉份量也很多，而且肥瘦分明，又鬆軟又淋!!!蘿蔔切得非常大件，也是非常的淋和入味!!!我最喜歡的還是支竹和魚蛋!!! 前者非常入味，後者彈牙可口!!! 還有一些墨魚丸，我記得餐單上沒有寫有墨魚丸，寫著有豆卜卻沒有，可能稍為調整了一點吧。各位長輩和賓客都大讚好食!!! 我亦認為這一家盆菜味道不會太濃，亦不油膩!!! 可是大家都覺得汁略為少了一點...所以很快便煲乾。試了這一家比往年的好，反應也不錯

由於今晚我們提早食團年飯，所以我們叫咗元朗嘅「輝記盆菜」外賣速遞返屋企食！我們叫咗個大盆菜嚟食，材料好豐富同份量十足！香妃鷄嘅肉質好嫩滑，鷄味亦好香濃！豉油皇大蝦都幾大隻，肉質相當爽甜彈牙！家鄉炆扣肉都炆得好入味，肉質都幾鬆軟！炆土魷魚炆得好腍好滑！醬汁豬皮同蠔油枝竹吸收晒醬汁嘅味道非常惹味！美味魚蛋相當爽口彈牙！蠔油花菇好嫩滑彈牙！清甜蘿蔔嘅味道好清甜同無根！醬汁嘅味道調教得恰到好處，唔會過鹹！