銀龍粉麵茶餐廳

营业中

休息中

叫兩杯凍檸茶少冰，黎到有杯d冰去到個底，飲筒都插唔入，另一杯無事，望其他枱杯野得幾粒冰，有禮貌同阿姐講，都未問佢可唔可以換過杯，阿姐望都無望過杯野話唔得，淨係可以不走d冰，我話d冰滿架播，同佢講多句反白眼走左去，態度奇差，問另一個阿叔又係望都唔望話淨係做到不走d冰，好呀睇你敢唔敢不走曬d冰睇下淨幾多，不完翻黎杯野無左半杯，但仲係有大半杯冰，有人唔敢不走全部冰，cls乜杯凍檸茶好貴咩？本身叫左少冰變多冰，仲要唔聽人講態度又差，唔知點解食個飯要受委屈，兩個侍應都好驚換過杯比你，換過杯好似驚換左條命比你咁，銀龍真係狗也不吃，一星都比多，好生意呀

平時去茶餐廳或者飯店食楊洲炒飯，用料都係比較少，蝦肉好細粒，叉燒粒，火腿粒或蛋嘅配料都好少，不過今次去銀龍茶餐廳見到有 大蝦楊洲炒飯，就試吓係咪真係有大蝦先。大蝦楊洲炒飯 $68 送可口可樂一罐上到枱果然真係有大蝦，最少有 4 隻，唔知下面仲有冇，起碼俾咗六十幾蚊都要真係有料先得㗎！銀龍果然冇令我失望，大大隻蝦仁，而且叉燒粒都好多，重要係炒得好乾身，不會油淋淋，食落香口美味，蝦肉夠爽，叉燒粒同蛋夠香，淡淡的咸味，好好食，真係不錯的選擇。

朋友介紹我去銀龍食午餐，推薦佐幾款招牌嘅，最後俾佢拉住入咗喇沙肥牛湯拉麵配鹵水拼盤嘅陷阱😆。首先嗌咗碗羅宋湯，湯底濃郁，料真係實在，啖啖蔬菜同牛肉，滋味百分百！之後主菜上枱，啲肥牛薄切嘅剛好，入口即溶，喇沙湯底嘅香濃同辣勁火辣辣地撲鼻而來，過癮得嚟唔會太攻鼻。啲鹵水拼盤仲要讚下，賣相掂晒，食落同樣唔係輸論，紅腸微微香口，豆腐同鹵水旦又腍又入味，加埋牛展同生菜一齊，呢個拼盤功夫凸顯。整體經驗抵讚👍，朋友你推介得好，下次仲要再嚟挑戰其他款式，銀龍，你好味！

週末早起，於是便到附近茶記銀龍歎番個早餐。A餐 $38 ~~火腿通粉炒雙蛋配牛角酥熱咖啡B餐 $48 ~~豬扒腸仔煎蛋(轉炒蛋)火腿通粉熱咖啡早餐不過不失，炒蛋算滑，價錢親民。

今日去呢間眾安街銀龍餐廳食嘢，叫咗一杯熱咖啡（由於上次我叫即磨咖啡嘅時候，餐廳店員叫我唔駛再叫即磨，淨係叫咖啡已經可以，因為而家只剩返即磨咖啡一隻，所以唔使再叫即磨），跟住黎既咖啡嘅味唔係即磨咖啡，我就問佢點解唔係即磨，佢今次又話如果要叫即磨就要講明，我就話你哋明明上次叫我唔使咁叫，跟住佢話依家要咁叫返，咁我問佢可唔可以幫我轉返，因為你地兩個店員叫客人點叫order都唔同，跟住有個白頭廚房佬出聲話落咗糖唔可以換比我！其實首先佢哋店員叫客人落order叫嘅名次次都唔同已經係佢哋唔啱，其次係一杯幾蚊嘅咖啡者，自己店員唔啱都唔肯換返比個客人，我以後唔嚟嘞！為咗一杯幾蚊嘅咖啡而損失一個客！

講開銀龍，應該唔少香港人都會食過，包括我，屋企附近總有一間，佢唔係特別有咩好出名好好食，只係有時你又諗唔到食咩你就會去食銀龍，我就係因為咁，屋企晏晝冇飯開，又想食茶餐廳，我第一件事會諗起銀龍，今日就去左屋企附近個間銀龍到食午餐，叫左個腸仔魚柳茄汁意粉，佢都真係好平，50蚊左右就有個午餐，食物質素就一般般咁啦，但係佢平，所以佢既質素係對得住佢個價錢，佢啲份量都好多，岩哂我呢啲大食既人去食，人生唔知食過幾多次銀龍了

銀龍粉麵茶餐廳 (荃灣眾安街)有一日係荃灣岀發旺角辦點事見有小小時間快快食都可以既心血來潮想食個蒸排骨(無錯，我就係mood 到想食果樣野就會去食既人😂)經過間茶記，有喎！就入去坐低試試Ps:呢篇文係個人感受多過食物感受如果純食家可以skip🔸榨菜豆卜蒸排骨飯-榨菜酸酸甜甜，送飯一流呢-豆卜吸哂d肉汁同豉油，應該會好好味呢🥰( 可惜我唔食 )-排骨都肥美嫩滑，配埋(贊)左油既豉油，又係送飯首選！好！茶餐廳正常都快嫁嗎但如果太耐既話我未必會揀佢呢每個人耐既準則都唔同既13:52落單的我一分鐘都唔使整左杯凍齋啡比我飲住先🥰嗯，都14:02，未有既？(同一時間對面坐左客人，落單🥰)嗯，都14:07，三個字啦喎，我叫返落單個叔叔問有未？會唔會漏左單哦？佢: 哦，蒸緊，差唔多得咁我一路望住水吧+岀菜位，期待住野食岀既一刻然後水吧哥仔同落單叔叔傾緊計，水吧哥仔就同落單叔叔講望住我，應該係問我係咪有咩需要但落單叔叔望一望我就另轉頭同水吧哥仔講左0.5秒野再由下而上揮一揮佢既手，當時既手勢係👈🏻希望佢唔係話我麻鬼煩啦🥰但我心情已好差冇乜mood 食了14:30，我個餐岀來了🤗對面的食客都食完起身走了結

噚日(10-4-2023 Mon)復活節假期最後一日,同老公亞姨去買餸前食晏,由於唔肚餓,所以決定三個人食兩個餐,老公話嚟呢間,我哋坐低睇完menu後,就要兩個都係$55.00嘅午市套餐1同5,同各加$3.00嘅凍檸水少甜同凍鴛鴦.1. 1號餐嘅元貝粒蒸肉餅(客飯)原來會有湯跟,呢個見到有連皮冬瓜,飲落,應該係冬瓜煲豬骨啩,佢味道溫和唔太鹹,ok 嘅.味道:3分                            元貝粒蒸肉餅雖然見到有豉油,但都唔算太鹹,口感鬆軟.白飯就正常冇問題.味道:4分2. 凍鴛鴦我貪心試一啖,冇咖啡味只有奶茶味嘅?睇睇張單,亞姐落咗凍奶茶,照飲啦,呢個茶味同甜度都適嘅.味道:3分3. 凍檸水少甜我冇飲到,唔知.4. 2號餐嘅潮式四寶河配指定油菜我哋要粗麵,而四寶有魚蛋,墨丸,魚皮餃同肉丸,油菜就係菜心.菜心,麵,同所有丸都正常冇問題,味道:3分抵食係2.5分上次食評係2022年10月14日刊登嘅呢篇:https://www.openrice.com/zh/hongkong/review/blue-%E5%81%87%E6%97%A5%E5%8A%A0%E5%

宵夜叫了叉燒滑蛋套餐，跟有湯有飯有奶茶。回家打開食，一盒叉燒炒滑蛋夠份量，但成份幾油和蛋炒到有啲老，中湯幾濃味夠火候，另一盒白飯滿滿夠大份，奶茶都幾濃吓。外賣九折後$72，唔算平。

8-10-2022 (Sat)朝,同老公去睇洗衣機前食早餐,諗唔到食邊間喇,老公又話銀龍,有河粉食,咁是但啦.我哋嚟到都full,不過啱啱門口卡位嘅大叔食完差唔多老人,所以有張卡位坐,而呢個位好彩喺冷氣機下面,夠涼快.睇完menu,老公原本想要$41.00嘅潮式四寶河,但見到有同價嘅潮州魚皮餃淮山麵,感覺健康啲,所以要呢個,飲熱奶茶.我要$42.00嘅全日早餐B1,飲熱檸水.兩杯嘢飲分別到嚟,我只輕輕咁篤啲檸檬,都已經澀,加糖都唔掂.熱奶茶我就冇試亦冇問.之後嘢食都到嚟,我嘅B1全日早餐有豬柳漢堡,煙肉,炒蛋同法國牛角包.其實都怕怕地豬柳漢堡喇,但又想食牛角包同唔想食吉列魚柳,所以揀呢個.但呢女嘅豬柳漢堡又唔係好油膩喎,出奇.炒蛋嫩滑,味道清淡;煙肉唔太鹹,亦唔係炸到超乾身嗰隻,我鍾意;法國牛角包就好細件,外脆內鬆軟,牛油香亦唔算好濃.老公嘅潮州魚皮餃淮山麵呢?麵身冇油較乾,正常吖;潮州魚皮餃亦屬正常貨色;啖湯就係潮式唔太濃嘅味道.味道係2.86分價錢:我睇睇張單,點解每個餐貴$2.00?唔通嘢飲要另加錢?睇吓menu,原來寫咗星期六,日同公眾假期加$2.00.真係有趣喎,原來呢啲日子

這晚真不知吃什麼好，在這幾條街繞了個圈，不挑了，就這裏吧。點了兩個套餐，先來兩碗“菜干湯”，湯渣份量足，有金銀菜 、豬骨、紅蘿蔔、蜜棗等，豬骨也不是下欄貨，沒味精，甜，這幾天天氣十分乾燥，有菜乾湯，真的照顧周到，有心思。剛進門路過鄰座時，那碟白切雞，有雞髀，皮看起很嫩滑，是餐牌上最貴的兩款之一“沙薑雞”，但一上菜，我黑臉了整整一分鐘，一眼數得出，四塊雞胸加一隻雞翼，柴，多骨，72塊，值得給個“哭”！“涼瓜叉燒炒蛋”，正常多了，味道、賣相都可以，只是涼瓜＋叉燒這個配搭，有“用賣剩蔗做套餐”的感覺！實在不夠蔬菜，多點了一個“椒絲腐乳炒通菜”，賣相不錯，菜還翠綠，但腐乳味不足，辣椒絲又多了點，合格而已。總體說，那沙薑雞太離譜，無法高抬貴手。

吃完早餐想再吃個菠蘿包，點了一客上來原來$13蚊一個菠蘿包，在其他銀龍茶餐廳都係6-8蚊，唔知道點解要$13？這個可能係全港最貴的菠蘿包，元朗有啲麵包店$3蚊都有交易！疫情下咩嘢都失控！所以下次唔會再入去啦。

喺荃灣嘅朋友，相信對銀龍茶餐廳一啲都唔會陌生。佢哋會有星期一到星期日唔同嘅menu, 今次我哋就叫咗茄燴汁吉列魚柳配法蘭克福腸，茄汁配魚柳簡直係絕配，加埋一條好長嘅法蘭克福腸，性價比好高。

連續四日復活節長假，人人出街買嘢用消費券，係公司做到冇停手😩😩，放左工雖然唔係好肚餓，但就係想買個宵夜嚟安慰下😅😅～～～XO醬金菇肥牛炒烏冬～～～烏冬炒得幾濕身有彈性，唔會水‘了了’🙂🙂，肥牛大約有4-5片，肥瘦大小適中😉😉餐牌上介紹佢有小辣但我一D都食唔到辣味，有少少失望😑😑XO醬就ok 中規中矩😀😀份量比起晚餐確係比較細份，但作為宵夜又好似好合理😜😜，都係一個滿意嘅宵夜😋😋P.S：佢宵夜唔知點解會減$5😚😚

今日落荃灣去歎左一個午餐, 叫咗個芥蘭肥牛客飯,芥蘭是一種清香脆甜，葉子和梗都能吃的蔬菜，搭配牛肉就是天生一對，牛肉又能有香滑，菜梗脆甜，菜葉青綠爽口,係入秋佳餚。