香港華商銀行公會

营业中

休息中

哈哈! 我生日大日子, 一家人同我去左馳名o既華商銀行公會食晚飯.佢地等埋我放工, 8:00先到達, 時間比較晏, 裡面只係得兩三檯. 知道都幾早收爐, 所以即刻點菜:1) 大千蝦球-- 為左佢先特登黎呢度食飯. 第一碟上, 同姐姐興高采烈一人夾左一隻最大o既, 咬左一啖, 兩個人不約而同被自己眼前半隻蝦上o既黑色小粒所吸引...有鬚嫁! 我地兩隻蝦每隻上面都有一隻小小蟑螂!!!唔係!蟑螂都算, 仲要打孖黎? 即刻叫侍應黎, 佢見到即刻幫我地換左佢, 媽媽想換第二樣, 但係我想食呢樣, 所以都係叫佢換同一款. 第二碟最後先上, 個汁辣辣地好冶味, 蝦好彈牙, 但係因為有蟑螂陰影, 打左折扣.2) 脆皮金莎雞-- 雞皮好脆, 雞肉滑, 好味.3) 金銀蛋莧菜-- 味道幾淡, 隨莧菜有好多雜草, 好明顯菜檔送菜黎後無揀菜, 求其d播(可能就快收工啦).4) 瑤柱什菌浸菜-- 味道清, 瑤柱份量較少.店家為左歉意, 送左碟小果盤, 蜜瓜同哈蜜瓜都好甜.總括而言, 小菜味道有水準, 但係廚房師傅懶左d, 而且生唔得. 埋單三百鬆d, 無加一價錢好相宜. 本身應該係好愉快o既生日晚宴, 因為小動

星期三是母親大人生日,她選擇了這裡食晚飯慶祝, 於是今次打算食豪d,我早一日打電話預訂了以下菜式: 1.海鮮焗響螺($38/隻) 幾特別的菜式..賣相很好,味道亦不錯2.香草牛油焗大蝦(時價,今次約$40/隻) 大大隻的大蝦,肉質很爽,香草汁很香,一點也 不"漏",再配伊麵底,非常好吃3.紅燒雞絲翅($85/盅) 料很足,好吃!! 再即場叫了: 4.生菜煲 配上蝦醬,很野味,但略為油了一點5.蛋"達"仔($29半打) 皮很鬆化,但蛋少了一些總體來說很不錯,平日普通晚飯水準也很好!!

上星期,老闆請食飯,我起初都提議去隔離0既寧波同響會,,,食過一次覺得好好食嘛..... 點知,另一個同事話不如食呢間,佢話呢間都幾好,咪試下囉,,, 我地一行四人黎左呢度食lunch,叫左一個商務套餐加多兩個送...幾好食,個set 有:1. 唔知咩咩雞,好似白切雞咁架,冇咩特別,不過不失.2.古lo蝦球,酸酸甜甜,好好食,D蝦又大又新鮮,正3.雜菜粉C煲,,,幾好食4.雞粒茄子煲,,,,,好食,但都好油!!!熱食都仲可以,凍左真係好油以上lunch set四位用...另外,我老細話唔夠食,叫多兩個送:1.蝦仁炒旦....嘩,好食喎..蝦炒得唔干,仲好水水..正,我最鐘意2.紅燒豆fu....唔錯,very good!~我地一行4人食左$456蚊,唔貴呀,6個送,4個飯,加多個甜品,每人都係百一蚊..咁多野食,中環喎,算係咁啦!~不過,呢度D services....真係,,,有待improve!~

叫左個12人套餐. 每度菜都好大碟, 我地13人都食唔晒. 條魚超級大條,但係蒸得剛剛好,好滑又多肉.隻雞睇落以為麻麻,但係原來都好滑,好入味.其他樣樣野都唔錯.最尾個迷你皮蛋酥我覺得幾有驚喜,好好味.

今日同幾個金融界的舊朋友來吃，講緊係一年前，呢度無咩生意，見佢好似就執咁。今日下午來到，人多到不得了，如果不是朋友的特別關照，似乎即日要拿檯是很有難度。可能市況好是其一，飲食雜誌的影響力也是其中一個因素。五個人，叫了五菜一湯。湯是西洋菜豬骨，夠火路，撈渣上碟亦足證真材實料，有一貫水準；不知是誰的鬼主意，來了個咕嚕肉併海哲，咕嚕肉其實不差，炸得幾脆又酸甜度適中，但味菜唔熱唔冷的，整體感覺不太好；炸子雞不錯，雖然雞肉味淡，但也算是皮脆肉厚，是炸子雞而非炸雞；油泡蝦球大大個，好夠件頭，非常的爽口彈牙，當然非新鮮蝦，但都算交到功課；鳳凰魚卷是友人的喜愛菜色，一來就叫，鯪魚肉包臘腸再炸，香口又好味道。食完餐飯，仲在等，問等什麼，原來朋友還叫了皮蛋酥作小吃，還說因為要等，所以應有特色云云。侍應最後端皮蛋酥來時真的叮囑要小心熱，令我也滿心盼望的，但吃落只是普通不過的皮蛋酥﹝如圖示﹞，不算熱，只屬微暖而已。朋友埋左張單，唔知幾錢，應該係五百幾。雖然食物沒有多大退步，但在這裡吃了多年，似乎又不是雜誌吹捧的高質數，當然見這裡多人也高興的，至少不會似舊年現在般，有執笠的危機。

今日與幾個要好的同事中午食團年飯，經過上次食完返尋味，大家決定再番炒，驚多人所以兩個禮拜前已訂了位。現場簡直虛，一坐低waiter已立即叫我o地點定野，話一陣多人實有排等。香芒子薑咕嚕肉、蝦醬生菜煲、蜜椒蝴蝶骨今次再叫仲要加大tim。咕嚕肉今次肥膏多過肉，而且炸粉又厚，汁又唔夠多，食唔到甜酸味，同一舊炸豬膏沒有分別，可能今次加大所以好多子薑，我同另一同事互相爭食tim。蜜椒蝴蝶骨唔多掂，肥膏多又冇味。加大左的蝦醬生菜煲好似個中盆菜咁大，質素仍然冇變，生菜吸晒d蝦醬味。其除的都係新試的，玉翠野菌爆蝦球(唔係好記得個名)、法式銀雪魚、松子魚米、風沙雞、花王雞腳湯，仲有叫了幾籠點心tim。呢度整d蝦幾有水準，上次食大千蝦球唔錯，今次食個爆蝦球仲好，蝦肉仲彈牙，仲有少少千島汁吊味，可以掩蓋蝦d雪味。法式銀雪魚個汁係芝士白汁，其實銀雪魚又肥又溜，加埋芝士白汁就溜上加溜，所以食淨好多。松子魚米類似炒雜錦，主角松子同魚粒唔多，我夾親都係西芹同馬蹄。風沙雞唔多得，雞肉雖唔鞋，但沒有雞味，買相又唔得，好似將d雞頭雞尾成埋一碟。整體冇上次咁好，唔知係咪人多關係，又趕住收爐，所以粗製濫造。

本人看見食評及近來某雜誌的吹捧! 於是乎在友人生日當天大膽選擇了這裡.為了營造驚喜, 我們特意預訂了(半打壽包$30 及被推介的紫薑皮蛋酥@$6.5半打). 入座後, 分別有兩位待應已急不及待立即與我們reconfirm多一次,多第二次! 卻把我們原定的驚喜提早來了(太早了)!一位年青男侍應首推- - 炸子雞(因為很快買曬!)，我們同意，之後亦分別叫了依處幾度招牌菜，包括"蝦醬生菜煲"$42,"香芒子薑咕嚕肉"$58,"粵式大千蝦球"$75,蜜椒肉排再加埋兩件葡汁焗響螺, Yummy.我們實在急不及待把美食送進口，就對男侍應說可以隨時上菜，由於我們還有一人未來，男待應把我們說的<隨時>，美化了! 於是乎，我們等了一句鐘都不見任何一款美食上桌，連一粒橋頭酸瓜也沒有。後來不斷追問，但其他人都幫不了忙啊! 那男侍人最後上前竟對我們說“妳們不應該是等埋朋友才上菜嗎”，那一刻真的有點火出現，難道侍應可以代人客決定麼。我們7:30準時入座，8:40分才上菜，真係變成餓鬼一樣?! D 食物，真係各款都有水準，好味道，不過咕嚕肉縑細左少少，生菜煲d菜真係好鬼新鮮, 索索聲wow

　昨晚小肥竟然早放工,諗緊公司附近有乜未試過,記起雜誌介紹呢度,話唔貴又好味,就即刻訂枱.　上到去,係無乜裝修不過算乾淨光猛,樓底矮矮又幾好feel,好似舊式酒樓,樓面一眼睇晒,喺入口處有貴賓房1(咁係咪有2,不過唔多覺!!)坐到最入貼住玻璃門無遮無掩,見牆上有一龍虎榜(都幾得意),列明上星期最受歡迎及今星期最新菜式,一心諗定要試試用長洲蝦膏整嗰款"啫 啫 蝦醬生菜煲"$42,"香芒子薑咕嚕肉"$58,"粵式大千蝦球"$75,再加個"竹筒糯米飯"位上$28同埋"金華火腿翅裙燉螺頭"位上$33.講真咁多樣嘢,最最最好味就係個生菜煲,唔講得笑,真係越簡單越見真章,蝦膏爆蝦米再加生菜胆,味道一D都唔鹹,好香好惹味,簡直送到幾碗飯,生菜嗦嗦聲,夠晒滋味,唔怪得係龍虎榜第二位.次選係大千蝦球,其實本來唔想叫呢個,覺得好"行",但食落又幾有Heart,個汁原來用辣椒油爆蒜頭芹菜(有中西芹)再加花奶煮,滑得嚟又香又帶微辣(不算油膩,如果唔係feel到辣辣地都唔特別覺有紅油),越食越想食,蝦球大隻兼爽口,一個字"掂".個咕嚕肉汁唔錯,酸甜有致,肉有肉味,炸粉不太厚仍脆身,子薑略嫌切厚身咗,不過又的確好

N年前公司係度搞過幾次食飯，一直都冇o黎過。今次同事睇到雜誌又介紹，再重臨舊地。地方裝修過，冇咁聯宜會feel。呢度一來地方唔大，二來lunch time好多人，坐得都幾迫下。牆上貼住每週招牌龍虎榜，既然咁受歡迎，當中我o地都叫了幾樣。第一係香芒子薑咕嚕肉，當然唔少得一定要點啦!同裕記一樣都係“咕嚕肉片”，不過勝在炸得香脆，甜酸汁味道尚算適中，而主角之一的子薑就只得三四片。第二係蝦醬生菜煲，除了蝦醬外仲有蝦米tim，好濃好香好野味，送飯一流，而配角的生菜都好鮮。第三樣係大千蝦球，有d似黃金蝦，不過冇黃金蝦咁熱氣，而且個醬汁仲有少少辣來調味，不過蝦肉就麻麻地，不太爽。蜜椒蝴蝶骨係大大件的金沙骨，燒得比較黑，肥膏較多，論味道較前幾碟略遜。酥皮蛋撻仔因為新鮮熱辣出爐，所以覺得好食，不過酥皮唔算鬆化。皮旦酸薑-比起車品品D皮旦唔算好糖心，不過D同事已夠得好靚，而子薑話係自家浸制夠入味，但係薑D色水唔靚，瘀瘀黑黑的。除了以上外，我o地還叫了四籠點心，6個人都係食了$412，真係超抵。

多謝,多謝!明天拭目以待!

呢度都做午市，不過聽講人就多D。如果叫「精選套餐的話」菜色相若，不過果味鳳凰魚卷拼蒜香豬扒就會變左點心拼盤，價錢仍維持88蚊一位連加一茶芥，最少四位起。會所菜陸續有來，聽日就要招呼兩個日本仔去蘇浙同鄉會，果度的上海菜在中環區數一數二，一味紅燒元蹄一味年糕炒蟹，真係諗起都流口水！

之前都聽你介紹過嶺南舊生會會所,不過唔知這裡做不做午市呢?

尋晚同朋友飯局，因其中有銀行界的同業，佢話呢度水準唔錯，價錢又夠經濟，所以就來試試。呢度以前行會員制，只係華商銀行公會之會員才可訂位，不過據知因為生意難做，而家唔係會員訂位都可以。裝修係中式酒樓格局，地方幾大，佔南華大廈5樓全層，不過尋晚就只得三檯客，所以只間了一部份作樓面。一行四人叫了精選套餐，有一個湯及四個菜、一碟炒烏冬及甜品、果盤等，睇落都幾豐富。湯是蟹肉雪蛤冬茸羹，一人一碗，有舊舊蟹肉，但就唔係好覺食到雪蛤，幾鮮味，味道唔錯。四個菜是鳳凰魚卷併蒜香豬扒、芙蓉海鮮烙、七彩炒雙蚌同瑤柱海參絲扒時蔬。鳳凰卷是鯪魚肉包臘腸再炸，香口又有特色，可惜一人得一舊唔太夠喉。蒜香豬扒只是普通蒜粒炸豬扒，略油左少少；芙蓉海鮮烙係一大塊煎蛋白，內藏帶子粒、蝦等，味道清清地，蛋白同海鮮味道配搭得宜，幾有水準的一味菜；七彩炒雙蚌是青、紅、黃椒同腰果炒兩種不太知名的貝類，雙蚌得個爽口，吃不出什麼味道，反而配菜卻更好吃；瑤柱海參扒時蔬茨汁好勁，完全蓋著成碟菜，睇見就怕所以少吃為妙。甜品有椰汁紅豆糕同芋頭西米露，前者椰汁味香濃又滑溜，好味道，後者就普通左少少，不過好處就係唔係太甜。食埋西瓜、木瓜同蜜瓜的果盤大