影片
以上资料只供参考，请与餐厅确认详情
相关文章
依家不多buffet有生蠔食，仲要價錢折左後都係$3xx! 啱哂我同屋企人，一行10人黎慶祝食飯！餐廳只做一round, 所以享餐時間可以好長！又唔洗迫自己係2小時內狂食~可慢慢同屋企人傾下計，出去攞下野食～雖然食物選擇不選多，但服務好，味道不錯！生蠔每次每人攞2隻，好公平，唔洗怕俾人攞哂！今次有一款美國，一款澳洲的，不錯！長腳蟹就每次一出，就好快俾人攞哂haha甜品都好多選擇，d甜品蛋糕仔又真係幾好味添！其中一位屋企人仲連食左4杯hagen daz haha!熟食既味道都不錯，如可多少少選擇就更好了！唯一唔好既我覺得應該有咖啡茶普通果汁可以俾人免費添飲，因包一杯餐茶好似唔係好夠。
继续阅读
舊時一向服務好好，生壕任囉，今日好失望，舊時即開任囉既生壕，今日每人只準囉二隻每一次。重要生壕有沙，已經無左即開。又無左黑毛豬。。無得任囉～服務員又小左，後來我座座下，發現原來做緊團購，但個團購同無團購價錢一樣。呢下先好野。
继续阅读
無意中上網見到呢間buffet有6折優惠，再上黎open rice度睇食評覺得可以一試所以早3日book左，好彩仲有位… 而聽電話嘅staff亦都好有禮貌夜晚buffet 6點至到10:30，比其他酒店buffet嘅時間長… 果日6點幾去到，都仲有好多吉位去到8點全場就full哂！食完之後總括黎講食物款式唔算多，不過想食嘅野都有齊哂個人認為長腳蟹不錯，但波士頓龍蝦就略遜一籌… 毫無龍蝦味，而生蠔質素參差…不過$360有得食波士頓龍蝦、長腳蟹、生蠔，法式寶雲酥燒羊架… 仲想點？另外睇到網友8月去果陣仲有加送一杯夏日特飲同埋佛跳牆或椰汁燉燕窩… 但我今次9月黎3樣都已經無供應了而甜品方面最吸引都係Häagen-Dazs杯裝雪糕… 其他甜品款式唔多… 9點果陣好多cake款已經無哂亦都無再refill...可能因為配合返PALETTE個名嘅關係，餐廳嘅燈都好cyber，係幾特別… 不過影相出黎就唔多靚個人黎講encore機會不大… 但都係果句，呢個價錢試到咁多野都算係抵，出面都無乜邊間酒店buffet做得到可以都可以一試。
继续阅读
六折嘅吸引力確喺幾大，雖然，知道都喺啲商業策略，但折咗計番實價，$350一個自助晚餐，仲要喺晌間4星酒店，依個時勢真喺唔多，唯一喺位置被人感覺吊腳，其實識行，港鐵紅磡站行過嚟都只喺10-15分鐘，遲啲有埋港鐵黃埔站、土瓜灣站仲方便。講咁耐，今晚就喺嚟到新開一年左右Hotel sav嘅Palette大嘆自助晚餐。店名Palette意思就喺調色板，所以，整間店嘅裝修都環繞番店名嘅主題，就好似餐廳中嘅店名，會不斷轉色；若再留意吓，周圍嘅燈光亦同樣會有所變化。唔知喺咪咁嘅緣故，座椅都用上透明膠椅，令整體有種通透感，只喺感覺無咁好坐。至於服務方面，整晚都幾好，上特色食物、收碟、食物補充都好到位，啲侍應都好有禮貌。擺放食物嘅區域，其實一出一樓嘅酒店前堂，已經見到。甜品類嘅食物就放晌餐廳門口嘅長枱，似喺有目的咁以甜品嚟吸引酒店客人。而入到餐廳內，左邊一字幾十呎長枱就有海鮮、沙律、冷盤、湯品、麵包、熱盤……等等大部份食物。此外，近門口右邊則有幾款私房特色菜、即煮意粉檔及香烤切肉。綜合而言，可能基於場地問題，食物嘅選擇唔算好多好多，但類別以言，可謂樣樣都有。故此，今晚都有啲信心可以試勻大部份食物。餐廳為想更提升自助餐嘅吸引度，所以，除每位客戶可以揀選一款高檔菜式外（佛跳牆或椰汁燉燕窩），更每位客人奉送一客海鮮爐端燒，並獲贈一杯夏日特飲。另外，餐廳亦推出「無張添加飲品」推廣（$40-$90），任飲汽水、果汁、啤酒及餐酒，不過，自助餐本身已另包一杯餐飲，再者，加送一杯夏日特飲，已經好夠。沙律、冷盤又喺小弟慣常食自助餐嘅攻略，就喺先嚟一大份沙律夾少少冷盤。先介紹吓有咩選擇先，沙律方面有4款沙律菜、6款配料、6款醬汁，足夠簡簡單單砌份靚靚仔仔嘅沙律，不過，醬汁嘅擺位真喺有啲問題，晌兩組食物箱嘅中間隙位，隊隻碟埋去時就好難「畢」啲汁，唔隊埋去呢，啲汁好易瀉去另外啲醬汁度，溝到雜晒就唔好啦。冷盤方面，有啲的骰嘅味付螺肉、玉子豆腐之類，此外，仲有煙三文、凍切肉腸。當然，小弟會加埋啲巴馬火腿落我碟雜綿沙律度啦！睇見我份沙律喺咪幾正呢，要齊4款沙律菜做底，淋上低脂意大利油醋及蜜糖芥末汁，再放上幾款配料及多種冷盤食材，咁食法食自助餐先過癮。沙律菜新鮮爽脆，但比較鍾意佢啲烤燈籠椒及雜菌；而巴馬火腿頗油潤，但嫌佢片得細塊及碎咗啲，反正自助餐都喺任人夾，片得靚仔啲會俾客人感覺好唔同。海鮮爐端燒食完我嘅「頭盤」，侍應啱啱好送上海鮮爐端燒，初時出去影相見有爐端燒，一隻大船模型擺放多種海鮮，非常吸引，已經喺今晚必食嘅菜式之一。燒海鮮包括有大虎蝦、新鮮帶子、鮮鮑魚，燒好後再伴上茄子及秋葵，成道主菜咁。虎蝦爽口彈牙，帶子鮮甜爽嫩，鮑魚煙韌咬口，食得出3款食材本身都有質素。佛跳牆食自助餐斷估都唔會一個人架，所以，一人點一款，就可以試勻佛跳牆及椰汁燉燕窩。先試試個佛跳牆，有個一套裝好似紫砂茶壺類嘅器皿，先倒點沙飲番啖，精華即喺精華，清潤無比；內裡嘅鮑魚仔、瑤柱粒、冬菇都好好食。椰汁燉燕窩睇樣就真喺平平無奇，就好似平常嘅椰汁西米露之類，就算呷一口個椰汁底，亦唔好有期望會有咩驚喜。不過，撈一羹燕窩真喺嚇親，啲燕窩多到呢……仲要唔喺碎燕喎，真喺好堅，咁多燕窩梗喺留番俾老婆食啦。凍海鮮海鮮陣容相對弱啲，感覺無咁有睇頭，但其實已經有波士頓龍蝦、日本松葉蟹腳、加拿大翡翠螺、紐西蘭藍青口4款，都算喺精選嘢。其實，有時食物唔一定要好多，最緊要具質素，俾十幾款海鮮你，你亦未必試得晒，但樣樣都普通貨色，就更加無意思。一碟過海鮮拼盤執齊4款，龍蝦蝦肉好爽甜，松葉蟹腳帶濃濃海水嘅鹹鮮，翡翠螺喺呎碼比較大嘅品種，而咬落爽口，藍青口質素都唔差，唔好好似食擦紙膠咁，亦帶少許鮮甜味。夏「逸」特色飲品喺時候清新吓喉頭再繼續，所以，此時先點指定嘅特飲。特飲共3款選擇：夏樹蒼翠、一縷陽光及緋紅夏日，都喺啲雞尾酒式嘅飲品，但為方便大眾，亦可以選擇無酒精版本，而我哋都唔好酒，所以同樣揀上非酒精版本。夏樹蒼翠，喺以荔枝及奇異果打成嘅半沙冰半果汁嘅飲品，入口非常爽甜，不過，老婆就話有少少偏甜；一縷陽光，喺芒果溝鮮奶嘅組合，啱晒我，因為溝入鮮奶，所以芒果味唔會濃得好誇，但陣陣芒果清香，又有種奶滑綿綿，唔錯。芝士、乾果依家好自助餐都有芝士供應，往往都有三幾款，依度就共有4款選擇，包括：巴馬臣（Parmesan）、瑞士葛瑞爾（Gruyere）、布里（Brie）、伊丹（Edam），仲伴有啲合桃、杏脯同鮮提子。我同老婆都喜歡食芝士，所以，由佢操刀，砌份芝士碟，配點克力架、乾果……等等。幾款芝士都各有唔同，小弟就較喜歡布里芝士，軟軟嘅口感，配麵包就最好。私房特色菜近門口位擺咗啲蝦乾粉絲煲、黑醋鎮江骨、桂花茶燻鴨及楊州清燉獅子頭，都喺啲唔同地方嘅特色菜，不過，用到「私房」一詞感覺就有啲被誇大少少。當中，興趣大啲喺個獅子頭，因為可以當燉湯飲，亦無預期中咁肥咁油，頗清甜，個獅子頭好鬆化。餐湯、麵包籃湯品中湯代表喺沙參玉竹煲豬骨，西湯就喺忌廉蘑菇湯；而麵包籃反而頗有睇頭，百吉包外，仲有啲麵包圈及德國Pretzel。因為睇啲忌廉蘑菇湯外觀幾對辦，所以，配兩小件百吉包試試，估唔到真喺幾得喎，質感厚身而滑溜，菌香十足。熱盤就放晌食物枱近尾部份，憑相片紀錄應該包括有清蒸海星斑、甫魚薑汁炒芥蘭、印度香辣燴雞、咖喱雜菜（配白飯及油酥餅）、蜜燒豬仔骨、燒菠蘿、燒青瓜、芝士焗海鮮、扒鴨胸配蘋果莎莎、煎魚柳配普羅斯旺菜、意式猶太燴牛肉、炒時蔬、燒薯仔，印象中好似無轉過款。因為選擇的確唔多，所以，就一碟過已經差唔多試得勻。樣樣少少，志在試吓味道，整體而言，熱盤做得唔錯，最鍾意喺扒鴨胸及燴牛肉，前者配上蘋果莎莎令鴨胸帶點甜酸，好平衡；後者則味道香濃，口感柔嫩。較做得麻麻喺啲香辣燴雞，咖喱香得未夠層次，雞肉稍稍嚡。即煮意粉、羊架上文都有講過有即煮意粉檔，行過時見即煮得香氣四溢，所以，都貪過癮點一碟試試。意粉有原味、香辣及香草味，醬汁可選蕃茄汁或忌廉汁，而配料共有10款，例如：火腿、煙肉、蘑菇、洋蔥、燈籠椒……等等，而即煮意粉檔隔離就喺燒羊架。老婆少肉多菜，所以，除咗火腿、煙肉，咩配料都要，意粉要香辣味，再配蕃茄汁，加多一支羊架，就做成小弟依一碟羊架蕃茄香辣意粉。意粉煮得好有咬口，食落真喺有啲辣辣哋，個蕃茄汁底亦好酸香。至於條羊架，入口好嫩，羊味唔算羶，搽上芥辣就更滋味。餐飲去到近尾聲，又喺甜品時間，所以，嗌杯熱咖啡襯一襯，老婆則要紅茶，幫幫手消吓滯，紅茶則以整壺咁上。甜品先一次過介紹吓有咩選擇，就喺綠茶味朱古力噴泉、葡撻、黑松露朱古力慕絲、檸檬蛋白撻、青檸啫喱、意大利芝士蛋糕、綠茶豆奶布甸、西瓜蛋糕、木糠布甸、朱古力香蕉蛋糕、芒果慕絲奶凍、法式藍莓布甸、窩夫、Haagen Dazs雪糕，陣容不俗。而甜品長枱下面仲有生果拼盤，分別喺西瓜、哈蜜瓜及鮮菠蘿。雖然樣樣都想試，但都明白量力而為嘅重要性，任食啫，唔使搏命嘅，故此揀咗當中最心水嘅8款作為我嘅甜品拼盤。試過之後，確喺有水準，黑松露朱古力慕絲最有驚喜，入口松露味真喺湧出嚟，慕絲好柔滑；其次，屬上佳之作仲有檸檬蛋白撻、青檸啫喱，因為前者味道輕盈，檸味清新，撻殼脆口，而後者青檸啫喱酸香醒神，最有心思喺啲分子珠珠，咬爆之後喺蜜糖漿嚟，平衡番青檸嘅酸度。此外，綠茶豆奶布甸、西瓜蛋糕、朱古力香蕉蛋糕幾款都喺出色嘅出品。Haagen Dazs雪糕作為最後衝刺，就以HD雪糕作結，雪糕共有4款口味：雲呢嗱、朱古力、士多啤梨及夏日雜莓，全部喺細杯裝。要咗其中3款口味，而HD雪糕唔使多介紹，總之最後嘆杯雪糕真喺好爽。如果你個預算好有限，唔理好醜，但求有大堆頭過百款嘢食，咁Palette唔喺你杯茶；相反，貴精不貴多，幾百蚊位同屋企人或朋友食餐自助晚餐高興吓，Palette值得考慮！
继续阅读
見到團購 buffet 黎試下~ 七點到場都幾 full~ 但食物款式都幾少~ 最吸引有龍蝦同 ham~ 同埋羊架同龍蝦湯都唔錯~ 其他熱盤就麻麻地~~ 甜品反而幾有驚喜~ 呢個西瓜蛋糕好得意~ 不過太甜~ 木槺布甸好好味~ 仲有綠茶噴泉添~ 每位送一份爐端燒~ 有大蝦帶子同鮑魚👍🏻 全部都幾新鮮😁另外每位可選擇佛跳牆 or 燉燕窩~ 都幾足料~ 每位除左餐茶外仲有杯特飲送🍸但味道麻麻~服務都幾好~ 員工有禮親切👍🏻但地點太唔就腳~ 試下都可以的~~
继续阅读