Rakuraku 樂拉麵 (MegaBox)

营业中

休息中

又來MegaBox做嘢，同事叫一定試吓這間拉麵，特別推薦 -櫻花蝦龍蝦湯叉燒拉麵🍜。隔遠已經見到好大隻黑貓，好可愛。打開Menu是「白貓」「黑貓」「赤貓」。「白貓」、「黑貓」「赤貓」原來是代表不同湯底的拉麵。還可以追加不同的小食。原來除咗拉麵，還有飯的選擇。掃code落單，簡單方便。同事特別推介「櫻花貓」 - 櫻花蝦龍蝦湯叉燒拉麵 $98麵條亦可以選擇軟硬度，櫻花蝦鋪滿拉麵，選擇了多蔥花，拉麵湯底蝦味濃郁，雖然份量不算太大，但湯底味道的確香濃，充滿了蝦味，的確不錯。而且拉麵上的糖心蛋非常吸引，蛋黃濃稠，值得一讚。「日式煎餃子」，餃子入邊肉汁豐富，餃子也煎得非常香脆。「日式海鮮煎餅」 鋪滿沙律醬和紫菜絲，有一些似章魚小丸子的味道。整體來說，拉麵味道的確不錯，價錢屬於中等，平均100多元，份量不算太大份，但以味道來說，的確值得這個價錢。

依間野成日經過都冇機會食今次入去試試佢本來上次黎仲見到有個新出既火鍋咁既餐但果日就已經冇左咁就食番佢本身啲野拉麵就食左佢個櫻花貓龍蝦湯拉麵味道不過不失 唔特別好食但都比個漢堡扒好食依啲日式漢堡扒真係唔係好掂冇乜肉味既雖則係日本食到既都係咁上下不過額外點果啲小食有啲驚喜個蓮藕乾幾好食 雖然都係啲零食舖買到既野個雞皮餃子個皮炸得幾好 有酥脆口感 好食過樓下果間個海鮮燒餅又整得唔錯 唔太膩唔太濕 食落有顆粒感 好食過道頓崛不過我覺得就價錢少少偏貴

第二次到訪喺MegaBox樂拉麵🌸拉麵湯底依舊好濃好吸引 本人好鍾意揀個硬身嘅面底！沒有令人失望 本人叫咗櫻花龍蝦湯！湯底好濃好出色另外同行嘅朋友叫咗黑貓 其實即係黑蒜油拉麵。呢個就不過不失。對比之下都係櫻花龍蝦湯較吸引

個沾麪同湯底非常難食食得好唔開心 沾麵的湯底實在太難吃咁既野食唔應該出現係菜單上面 希望唔好再煮啲咁難食既沾麪實在食唔留 最後食左一半都無就放棄 要特登開個account寫返個review 真係好想比負分如果你對食物質素有少少要求既人 我強烈建議唔好幫襯 

1.牡蠣白湯沾麵 $108 ❤這道沾麵的湯底以牡蠣白湯為主，因上桌時不夠熱，導致牡蠣呈現腥味。整體口感和風味大打折扣。2.鐵板一口豆腐 $42❤❤鐵板豆腐雖然外觀誘人，但味道平平，沒有特別突出的地方。❤愈多愈推薦(最多5❤)龍豬情侶評價：龍豬情侶認為不屬正宗的日式拉麵，食物亦不夠熱，以致食物的味道受影響。推薦指數：5/10好味指數：5/10環境指數：6/10服務指數：6/10餐廳︰Rakuraku 樂拉麵地址︰九龍灣宏照道38號企業廣場5期MegaBox 10樓9-10號舖

都好多人幫襯，環境坐落都算舒適當日叫左（1）豚骨叉燒拉麵（白貓）-$88拉麵上枱時已經唔熱，又唔算好暖，食左2啖好快已經凍哂，味道大打折扣。第二次再來食拉麵係發現拉麵有唔夠熱的情況！（2）龍蝦湯海鮮石鍋飯-$98好香，好味，都算有幾多海鮮，有蝦、魚、魷魚、帶子等。石鍋飯會有飯焦香，食到最後可以叫店員加湯。追加飲品+$6，另外可以加配小食。叫左日式餃子（+$28），正常水準！總括然而，食物質素一般，但拉麵唔夠熱會嚴重影響味道，店員有禮貌！

早幾日食完拉麵，唔知點解好有癮又再想食拉麵。喺MegaBox行街見到呢間拉麵，都幾乎坐滿人喎，咁估呢間拉麵店都唔差啦。我老婆叫咗個雞白湯拉麵，之後佢仲追加咗高麗菜，牛舌，同埋蘋果汁。我就嗌咗龍蝦湯拉麵，唐楊雞軟骨同埋都係加咗蘋果汁。佢首先上咗兩罐飲品，係日本牌子的蘋果汁，一飲就有日本的感覺。之後就想咗我哋嗌過兩款小食，牛舌同埋雞軟骨。牛舌要$48 ，雞軟骨要$38。感覺上分量都唔錯，牛舌數落有六片，雞軟骨數落有二三十粒，覺得都幾抵。所有嘢加埋三百零蚊，份量同味道嚟講都算OK。佢應該龍蝦湯拉麵真係唔錯，仲放咗好多櫻花蝦喺上面，我老婆仲係咁偷飲我碗湯。

今日特登去「姨媽」傢俬買個櫃仔同廚房用具，完成任務正直午餐時間，梗係要醫下個肚，當然「姨媽」入面都有嘢食，但我個人覺得真係嘛嘛，上次嚟「探路」，記得個food court 有日本麵食，今次嘅然再嚟呢度，點都要試吓。間嘢好似叫樂拉麵～柯打咗一個～櫻海老拉麵 另一個～赤貓（辛辣）小食～鐵板薄牛舌片同，唐揚魷魚鬚櫻海老依個係有好多櫻花蝦（目測起碼3-4湯匙份量）加龍蝦湯，木耳同葱花，當然仲有幾片叉燒同流心蛋，櫻花蝦加上龍蝦湯二樣嘢撈埋一齊～飲啖湯先，濃郁嘅「蝦」味道衝擊味蕾，喺你嘅口入面一路衝到上腦～正！叉燒亦都係中上水準，呢碗麵整體對得住呢個價錢，當然如果叉燒多一二片就更加完美。😋另一樣鐵板牛舌片～此終係小食份量唔會太多，呢味反而有驚喜～好嫩滑同口感很好，我會建議食咗呢個先，因為鐵板此終係熱，所以耐咗牛舌會「鞋」，效果會差少少。魷魚鬚～唔知係咪炸燶咗小小，所以有小小苦。至於另一碗麵，我無偷食，所以唔知點，但另一半話味道不錯～至小佢其實唔食豬肉都清晒啲叉燒🤫，咁味道應該算不錯吧😅。

上星期去了九龍灣 Mega box ，這個商場有很多美食，有坐得舒適的食店，也有方便快捷的麵店，今次想食日本拉麵，就選了這間店，店舖有日本拉麵店的裝潢。每款拉麵可以選擇粗麵或幼麵，也可選擇麵的軟硬度，叉燒也可以選擇豚腩或豚肩位置，當然也可以選多蔥或少蔥等，非常專業。白猫拉麵 ～ 是豬骨湯底，湯底非常濃郁，豚腩叉燒肥瘦適中，非常香口味美。赤猫拉麵 ～ 豬骨湯加辛辣，味道香濃可口，今次的小辣，很美味。另外小吃，炸芝士年糕，入面有很多軟綿綿的芝士，好好味。日本餃子，啖啖肉，好味。

晚餐黎到叫左碗溏心蛋角切叉燒石鍋飯，入面啲叉燒好多，不肥不瘦，雖然溏心蛋得半隻，而且菜又無乜，但食叉燒都好夠滿足。而家店舖已經QR code落單，但好彩侍應都會不時經過為你添水。整體感覺不錯。

Lunch快閃食個拉麵先～Megabox拉麵店桜海老拉麵激多櫻花蝦，龍蝦味都幾出，不過會有少少咸😗龍蝦湯海鮮石鍋飯配料都好多，加咗芝士好香，份量都幾多～都有少少飯焦😋天婦羅軟殼蟹味噌湯沾麵天婦羅都有好多件，但係可惜嘅係沾麵個味噌湯係唔暖的，同埋過咸，雖然去到後尾好親切嘅店員同我哋講可以加湯，但其實嗰陣時我點準備好走😂😂店員服務態度係幾好，食完過左指定金額仲有得扭蛋！🏠 Rakuraku 樂拉麵 📍 九龍灣宏照道38號企業廣場5期MegaBox 10樓9-10號舖

らくらくRakuraku 樂拉麵，一間以貓為主題既拉麵店，全港3間分店，分別位於MegaBox、太古，以及灣仔，餐廳主打博多風拉麵，以自家製湯底，製作出各種不同味道拉麵；豚骨湯、黑蒜油、辛辣，及龍蝦湯等，亦有提供各種石鍋丼飯選擇，例如叉燒丼飯、蟹盛石鍋飯，蒲燒鰻魚飯等。辛辣拉麵，雖然成碗都係火紅色，但個人認為辣度恰到好處，唔會太過濃味，而且拉麵硬度適中，總結而言係一間幾唔錯，經過可以一試既拉麵店🍜

今日心血嚟潮，揀咗間講究味道嘅食店，叫咗碗濃厚滋味嘅豚腩拉麵。啱啱好，湯頭濃郁得滯，又唔會膩口，一啖湯落肚，真係暖笠笠！豚腩好惹味，啖啖肉，咬落又腍又香，幾解饞。試下佢嘅赤貓辣味拉麵，辣香嗆鼻，正！豚肩腍身又juicy，辣度岩岩好，唔會辣到你喊媽媽；反而係香得嚟又帶啲暖，啱晒啲鐘意微辣嘅朋友。至於隻煎餃子呢，內餡嘅粟米豬肉餡靚嘅，啖啖肉感，粟米香甜，啲皮煎到啱啱好，外脆內腍，真係攞命！😉而嗰碟鐵板海鮮燒餅，係演譯咗日式街頭美食嘅新口味。鐵板保溫，讓熱辣辣嘅餅唔止煙韌，味道更加突出。滿足！跟餐嘅大板燒都得，夠曬心機，料多實在，朋友食住個野菌牛肩石鍋飯，佢話牛肩嫩滑得嚟，野菌香氣十足，食得佢讚唔絕口。😊總括落嚟，呢度嘅食物真係有質素同埋味道好正，又唔會太貴，係可以開心享受嘅地方。🍜👍🏻💯

平時lunch超多人排隊一次都未食過，今次晚上6點來到，唔洗等就直接坐低食。打開menu，拉麵好似唔太岩我口味，見到龍蝦汁海鮮鍋飯好似幾吸引，就依個啦～ 黎到個鍋熱辣辣，龍蝦汁都幾濃味，海鮮有蝦，蟹柳，芝士，鮑螺片同帶子但全部都係冇味，主要係靠個龍蝦汁撈埋d飯一齊食先ok，個鍋睇落去細細地都幾多飯，不過味道就一般。

咁岩經過九龍灣mega box行下見到呢間拉麵就想黎試下，間鋪分二邊都有位坐，佢地有各式拉麵同埋石頭鍋飯比你選擇，我就揀左一款吉列豬扒蛋石頭鍋飯同埋黑蒜叉燒拉麵🍜吉列豬扒蛋石頭鍋飯：份量其實真係好少，如果大食既人基本上都唔會夠食😅我諗幾啖都食得完個飯，不過佢既飯焦都硬唔係易咬，吉列豬扒賣相ok打卡影相都還可以，咬落去肉質都唔錯，唔算好味😄黑蒜叉燒拉麵🍜：呢個拉麵湯還可以，都有好重既黑蒜味，拉麵硬度適中，塊肉就有幾塊，總括而言打卡就可以，如果冇乜食物要求都可以選擇呢間既😂