爺爺雞飯 (金百利中心) (已結業)

雷神电影啱啱上画，梗系要先睹为快啦。所以就约埋朋友喺铜锣湾食个DINNER再去睇戏。爷爷鸡饭喺金百利中心7楼，一出地铁站搭转䢂就到，非常方便。为免睇戏饭气攻心，所以拣咗双拼套餐同小食。份量上到枱都好多同朋友SHARE就刚刚好又抵食。爷爷海南鸡饭拼马来肉骨茶。鸡肉嫰滑多汁鸡皮都算爽口，沾上姜蓉甜辣酱一齐食，非常惹味。加上鸡油饭香口得黎唔会太腻，水准唔错。肉骨茶材料都丰富，骨排／支竹／豆卜／冬菇／金菇等，骨排煲完汤都唔鞋口，加上汤底药材味几浓郁，饮完个人都暖笠笠。咖央多士。睇见有咁大块牛油夹住就知够晒邪恶，咖央酱又多，夹住烘底厚多士一齐食。真系跑返几圈运动场都抵啊。叁巴萝卜糕。朋友心血来潮想食就点黎过下口瘾，入口微辣萝卜糕偏软身但味道都唔错。泰式奶茶＆桔桔。奶茶味道不过不失，茶味偏淡但唔太甜。桔桔就好香柑桔味，甜甜酸酸咁好醒胃。整体价钱喺铜锣湾黎讲算好亲民而且选择都多，跟餐饮品亦有半价优惠。临走先发觉佢有OPENRICE PAY，下次帮衬上网睇下有咩优惠一齐用仲抵啊。