龍記牛什粉麵

营业中

休息中

【九龙城区】【龙记牛什粉面】之前同大家讲过芜湖街唔少嘅美食，咁我讲过会一直讲落去，就必须要去实行嘅。虽然近排啲 like 数不停下跌，但系我都清楚好似我呢种唔系做「宣传易」嘅，唔系咁容易受到 marketing 集团嘅帮助，所以属正常现象。谂起以前自己有啲 post 求求其其，价钱同菜式名都未必齐全，但系竟然收获几百甚至逾千个 likes，有时都颇感失德败行嘅，根本就唔值得。之后慢慢改善，尽量喺资讯上做到帮手嘅作用，味道系意见，资讯系资讯吖嘛，哈哈。讲咁耐都未入正题呢啲都系我特色，睇得耐嘅读者都惯架喇。嚟得呢间标榜牛杂粉面嘅粉面店，梗系先以 $44 叫碗「牛腩牛杂粗面」食吓。估唔到佢细细间舖，入货嘅牛腩又唔错，整得都几好。而牛杂就正常，都整得唔差嘅。食得呢啲潮式粉面，真系唔会忍住唔叫汽水，用 $10 叫枝「可口可乐」，仲要系玻璃樽装嘅，特别好气呀。舖面唔大，似系一家人做再请啲外人经营咁，有时见到有教小朋友嘅画面，都几有家庭式经营嘅感觉，系有 feel 嘅。呢间我系有二访嘅，第二次我就叫咗 $39 嘅「净四宝丸」，有自制鱼蛋鱼片、爽滑墨丸、普宁肉丸、紫菜，味道上唔算特别，所以都冇咩好讲。