一品滷水專門店

营业中

休息中

本人特别钟意食卤水食物，包括鸡髀鸡翼、猪大肠、卤水蛋等等，卤水嘅精髓在于卤水汁要够香浓，食物要煮得够入味。嚟到北角就去呢间一品卤水专门店，虽然佢舖头细细，但对正英皇道非常容易揾。门口嘅收银姐姐态度好亲切。睇住个餐牌有太多选择，谂咗一阵我拣咗卤水猪大肠、红肠、鸡蛋、鹅肝同鹅翼，厨师老板好好人，话送多几嚿豆腐俾我食，我梗系即刻讲多谢啦，成个餐盒放到满晒都系$100左右，非常抵食！可能系做开街坊生意，老板同啲客人都好熟络，记得晒啲熟客食咩，客人嚟到都好有亲切感。讲到食物，呢间嘅卤水汁真系非常香浓，未入到店已经闻到𠮶阵好香嘅卤水味，而且不论猪大肠定系鹅肝都完全吸收晒啲卤水汁，一啖咬落去除咗食到本身嘅肉味之外，里面嘅卤水汁渗出嚟，充满个口腔，其实唔使点汁都好好味。我个人最欣赏佢嘅卤水蛋同红肠，卤水蛋够入味，红肠够爽口，食完一块接一块。钟意食卤水嘅朋友，一定要你试一试！