海逸軒 (已結業)

一向甚少惠顾酒店入面嘅中菜厅。觉得价钱太贵之余质素亦未必好...今次想搅搅新意思，跟太座一家嚟试一试。坐落环境颇舒适，人不多，并不嘈吵，又有seaview，未食先欣赏美景，一乐也...太座要试龙虾两味--- 炒球加汤泡饭。都OK吖，冇反对..其余叫嘅就算系普通家常小菜--- 梅菜五层腩煲、高汤竹笙露笋、荔芋油鸭鸡煲...前菜小吃有蒜片一口牛及海蜇头。两者用料皆好，牛肉无渣，海蜇头够晒爽口大件，但麻油香不够...五层腩炆得算淰，但未至于入口即化，皮亦因冇乜走过"油"而淰pat pat，冇咗扣肉应有口感；梅菜亦偏甜..露笋感觉好清，大条兼爽口新鲜，配合高汤竹笙，妙不可言，系全晚最出色嘅...荔芋不太够粉，但椰味足；鸡及鸭反而系配角。但若俾我选择，小弟绝对会去帮衬上环坤记嘅 --- 够平之余味道亦更好...龙虾炒球味道无特别；汤泡饭汤味不够鲜，西宛呢味做得更出色...甜品系莲蓉西米焗布甸及合桃露，都做得太甜，不对口味...本来食物不算太突出，但胜在环境搭够，再加埋AE card 有七五折，力挽狂澜...