老掌櫃東北菜館 (海之戀商場)

营业中

休息中

喺荃湾行完Donki，正要物色晚饭地点，谂起家姐之前曾经推介过Donki门口转角嘅呢间东北菜馆，由于位置唔起眼，一直都冇留意到佢，择日不如撞日，决定喺度食埋晚饭。猪耳整成果冻状再切片，巧手精致，入口口感爽脆，胶质丰富而且一啲都唔油腻，令人食完一片又一片，非常开胃。口水鸡肉质嫩滑，酱汁味道层次丰富，鲜香麻辣，非常惹味。土豆烧牛肉以煲仔上，份量好足，牛肉够哂腍，薯仔亦够软身，加上香浓嘅汤汁𩠌饭一流。葱爆牛肉大大碟，而且牛肉大大片，份量亦算多，软腍入味，同样系白饭杀手。白菜嫩豆腐家乡味浓，冇过多嘅调味，汤浸旺菜配上嫩滑嘅豆腐，连汤都可以饮埋，清甜舒服。酸辣汤酸度辣度都好够，鲜香醒胃，而且份量亦好大，三四个人分享都唔系问题。秘制牛犇面汤底香浓之余，面条爽滑弹牙，加上牛肉嘅份量俾得相当大方，而且煮得酥软入味，价钱亦超抵，性价比极高，喺一致认为最推荐嘅一道！东北农家炒饭配搭简单，但炒得非常干爽，而且好有镬气，味道亦唔错。自家制豆浆味道较淡，但胜在低糖，系健康之选。大商场里面都食到地道风味嘅小炒，实在系非常有惊喜，虽然匿埋喺商场嘅小角落，但胜在环境舒适，食物质素唔错，而且性价比高，相信会成为常客。