鏞記酒家

营业中

休息中

好耐无同屋企人嚟镛记食饭，今次我地要求坐地厅，睇吓个新装修，好好彩有卡位比我地，阿爸阿妈仲响度话当年，话佢地以前拍拖都成日嚟坐卡位。 一坐低梗系要食酸姜皮蛋啦，呢度啲皮蛋只只溏心，食完即时胃口大增。 再嚟系炭烧烧鹅拼叉烧，叉烧够juicy，烧鹅皮香肉嫩，充满炭烧香味，同出面食嘅好唔同！ 其实坊间都好多羊腩煲，价钱差距都几大，今次即管试吓镛记个古法蝴蝶羊腩煲，睇下佢有几巴闭！蝴蝶腩果然比普通羊腩肥美嫩滑，加埋啲入晒味嘅枝竹、冬菇同马蹄等配菜，绝对系大满足！ 我最钟意食脆口嘢，于是叫咗个椒盐吊片，吊片炸得几香口，食落又唔会太油立立，正! 羊腩煲已经好补，所以我地打消咗叫蛇羹嘅念头，叫咗个沙参玉竹炖大斑浓汤，个汤用料十足，非常鲜甜，我地连汤料都食得干干净净。 呢碟生炒糯米饭，除咗腊味香浓，啲糯米仲炒到粒粒分明，口感同味道都好like。 最后只系叫咗一碗红豆沙同芝麻糊share，因为实在太饱了。红豆沙同芝麻糊嘅水准唔错，而家已经好少地方食到咁靓嘅中式甜品。  成餐饭最开心嘅竟然系阿爸阿妈，因为佢地一边食饭一边回味「那些年」。