光榮冰室 (厚福街) (已結業)

晚市重开的第一餐，好多嘢都想食，煲仔饭、沙牛面⋯⋯之前睇「沙嗲牛肉面关注组」，有几多人推介过「光荣冰室」，咁啱佢又有煲仔饭，加上呢度唔驶嘟安心码，填资料就得，所以就敲定目的地。坐低好快就点左餐，不过想要的咸鱼肉饼饭因为卖晒肉饼（只系8点左右），而改食豉汁排骨。先来的系常餐（$45），有牛油多士、火腿煎双蛋、叉烧汤意粉同饮品，我转左沙嗲牛肉同要丁面（免费转）。沙嗲牛肉分量都唔少，有差不多十块，好腍，只系一两块有啲筋，沙嗲都好浓郁，少少甜，如果辣辣地会好啲，花生味都有少少。丁面唔驶多讲一定好食，不过因为个汤浓味掩盖左沙嗲香，下次应该叫普通面试真啲。至于个煎蛋虽然有㶶边，但都系太干。煲仔饭落单后要差不多等半个钟先上枱，豉汁排骨煲仔饭（$68）大概有十旧排骨，有豉汁香但唔咸，排骨亦唔会干柴，另加腊肠（$15），油润下饭。甜豉油唔错，饭焦香脆，㶶度刚好。坐低咁耐，不断听到好多嘢售罄，除左我个肉饼冇，食客A叫叉烧蛋饭，侍应「叉烧卖晒㖞」；B叫葱油鸡扒饭，「鸡扒卖晒」；C叫橙茶，「卖晒喇」，好似听紧麦兜同伙记对话咁。所以有心食的最好都系早点来。