薈萃閣 (已搬遷) 新店位置

一家五口大年初一去完西环拜年，之后谂住喺附近揾间酒楼食饭，不过当然系fully booked啦，于是妈妈就建议不如食buffet，估计新年应该唔多人拣西餐既，如是拿拿淋打黎book枱，又真系仲有位㖞！7点黎到，都差唔多爆场，呢度放左好多新春布置添加气氛，而更有心思嘅系，佢哋特别加入左好多中式菜式迎合新春主题，好似坐低无耐就会奉上每位一客迷你佛跳墙同一客迷你盆菜，迷你佛跳墙好足料，有花胶又有鲍鱼，而迷你盆菜有虾有鹅掌，令到成餐都好中式好地道。另外有几道美食，侍应会逐一去每枱落order，然后一一奉上枱，都系任食嘅，包括炸蟹钳、萝卜糕炒蟹、腊味糯米饭同豉蒜粉丝蒸带子，唔知系咪前面嘅食客叫得太狠，黎到我地果枱已经无晒炸蟹钳，于是就帮我地转做炸蚝~个炸蚝就认真中伏，非常麻麻，炸粉好厚，不吃也罢~其他值得食嘅我会话系乳鸽，好入味、肉质嫩，热腾腾，食多几只回本无难度。甜品方面亦颇有心思，有印上福字嘅macaroon，好抢手下，雪糕系haagen dazs，又有香滑豆腐花，呢个价钱for年初一食大餐，算相当唔错~