鮨石 (已結業)

又到左半年一次omakase嘅时候，今次拣咗尖沙咀嘅鮨石。我哋叫左「神石」套餐，无论寿司刺身串烧一应俱全。另外仲有Prestige omakase，不过要早两日预订。第一道菜色系车海老，虾肉弹牙鲜甜。第二道菜系北海道剥皮鱼，鱼肉加埋鱼肝嘅味道超正🥰刺身包括粒贝、银鳕鱼白子同烟熏鲣鱼。粒贝嚟自北海道，旁边系柠檬味海盐，味道非常夹。白子比想像中好食，口感滑捋捋几得意，而且加咗柚子有少少甜味。最后系烟熏鲣鱼，味道甘香，带有烟熏香味，非常出色👍🏻鲍鱼配肝酱，鲍鱼肉质弹牙，旁边仲有少少四季豆。慢煮𫚕鱼味道都唔错，鱼味非常浓郁。炸拖罗三文治可以话系今餐最好食嘅菜式，拖罗肉质入口即化，三文治好香脆，呢个配搭冇得弹😍终于到寿司环节！今次食到嘅寿司种类并唔常见，由一开始嘅北海道赤贝、喜之次、秋刀鱼、银鳕鱼去到海胆都好有惊喜，尤其系银鳕鱼，估唔到油脂咁丰富，肉质细嫩。其他omakase餐厅嘅甜品不外乎雪糕或者蛋糕，但鮨石嘅甜品都好有心机，日本清酒啫喱配上北海道无花果同香印提子🤩今餐价钱系$1600，我认为物超所值，食物卖相好靓，味道都好出色，最重要系师傅好幽默，食饭嘅过程充满欢乐🤣